ഫ്രഞ്ച് ഇതിഹാസം സിനദീൻ സിദാനെ പുതിയ പരിശീലകനായി നിയമിക്കാനുള്ള സഊദി ക്ലബ് അൽ ഹിലാലിന്റെ ശ്രമങ്ങൾക്ക് തിരിച്ചടി. സിദാനെ ടീമിന്റെ മുഖ്യ പരിശീലകനായി എത്തിക്കാനായി 100 മില്യൺ യൂറോക്ക് മുകളിലുള്ള വമ്പൻ ഓഫർ അൽ ഹിലാൽ മുന്നോട്ട് വെച്ചുവെന്നും എന്നാൽ സിദാൻ ഈ ഓഫർ നിരസിച്ചുവെന്നുമാണ് റിപ്പോർട്ടുകൾ. എക്വിപ്പ് ആണ് ഇക്കാര്യം റിപ്പോർട്ട് ചെയ്യുന്നത്. 

ഫ്രാൻസ് ദേശിയ ടീമിന്റെ നിലവിലെ പരിശീലകൻ ദിദിയർ ദെഷാംപ്‌സിന്റെ ടീമിനൊപ്പമുള്ള കരാർ അവസാനിച്ചുകഴിഞ്ഞാൽ ഫ്രാൻസിന്റെ പുതിയ പരിശീലകനായി പ്രവർത്തിക്കാൻ സിദാൻ ആഗ്രഹിക്കുന്നുണ്ടെന്നും റിപ്പോർട്ടിൽ പറയുന്നുണ്ട്. ഫ്രാൻസിനൊപ്പമുള്ള ദെഷാംപ്‌സിന്റെ കരാർ ഒരു വർഷത്തിനുള്ളിൽ അവസാനിക്കും. ഇതിന് ശേഷം ദെഷാംപ്‌സിന്റെ പകരക്കാരനായി സിദാൻ എത്തുമോയെന്നും കണ്ടുതന്നെ അറിയണം. 

അൽ ഹിലാൽ തങ്ങളുടെ പരിശീലകനായ ജോർജ് ജീസസിനെ മെയ് മാസത്തിലാണ് പുറത്താക്കിയത്. ഈ സീസണിൽ സഊദി പ്രൊ ലീഗ് കിരീടം നിലനിർത്തുന്നതിൽ അൽ ഹിലാൽ പരാജയപ്പെട്ടിരുന്നു. ഇതിന് പിന്നാലെയാണ് ജോർജ് ജീസസിനെ അൽ ഹിലാൽ പുറത്താക്കിയത്. ഇപ്പോൾ ജൂൺ 14 മുതൽ ആരംഭിക്കുന്ന ഫിഫ ക്ലബ് ലോകകപ്പിന് തയ്യാറെടുക്കുന്ന അൽ ഹിലാൽ പുതിയൊരു പരിശീലകനെ നിയമിക്കാൻ ഒരുങ്ങിയിരിക്കുകയാണ്. 

ഫുട്ബോളിൽ കളിക്കാരൻ എന്ന നിലയിലും പരിശീലകനെന്ന നിലയിലും മികച്ച അനുഭവ സമ്പത്തുള്ള താരമാണ് സിദാൻ. പരിശീലകനായി റയൽ മാഡ്രിഡിന് ഒരുപിടി കിരീടങ്ങൾ നേടിക്കൊടുക്കാൻ സിദാന് സാധിച്ചിട്ടുണ്ട്.  റയൽ മാഡ്രിഡിനെ തുടർച്ചയായ മൂന്ന് ചാമ്പ്യൻസ് ലീഗ് കിരീടങ്ങളിലേക്ക് നയിച്ച പരിശീലകൻ കൂടിയാണ് സിദാൻ.  

Saudi club Al Hilals attempts to appoint French legend Zinedine Zidane as their new coach have been thwarted