ഐപിഎൽ ഫൈനൽ പോരാട്ടം നാളെയാണ് നടക്കുന്നത്. ഗുജറാത്ത് അഹമ്മദാബാദ് നരേന്ദ്രമോദി സ്റ്റേഡിയത്തിൽ നടക്കുന്ന മത്സരത്തിൽ പഞ്ചാബ് കിങ്‌സും റോയൽ ചലഞ്ചേഴ്‌സ് ബെംഗളൂരുവുമാണ് ഏറ്റുമുട്ടുന്നത്. ഇരുടീമും ചരിത്രത്തിലെ ആദ്യ കിരീടം ലക്ഷ്യം വെച്ചായിരിക്കും കളത്തിൽ ഇറങ്ങുക. 

ഈ ഫൈനൽ പോരാട്ടത്തിൽ ആർസിബി നായകൻ രജത് പടിദാറിന്‌ ശ്രേയസ് അയ്യരിന്റെ ടീമിനോട് കണക്കുതീർക്കാനുള്ള ഒരു അവസരവും കൂടിയാണ് മുന്നിലുള്ളത്. 2024 സയ്യിദ് മുഷ്താഖ് അലി ട്രോഫിയുടെ ഫൈനലിലെ തോൽവിക്ക് പകരം ചോദിക്കാനും കൂടിയായിരിക്കും പടിദാർ ലക്ഷ്യം വെക്കുക.  ശ്രേയസ് അയ്യരിന്റെ മുംബൈയോട് പരാജയപ്പെട്ടായിരുന്നു പടിദാറിന്റെ മധ്യപ്രദേശിന്‌ കിരീടം നഷ്ടമായത്. 

ഫൈനലിൽ മധ്യ പ്രദേശിനെ അഞ്ച് വിക്കറ്റിന് തോൽപിച്ചാണ് മുംബൈ കിരീടം ഉയർത്തിയത്. മധ്യപ്രദേശ് 20 ഓവറിൽ എട്ട് വിക്കറ്റ് നഷ്ടത്തിൽ 174 റൺസെടുത്തപ്പോൾ മുംബൈ 17.5 ഓവറിൽ അഞ്ച് വിക്കറ്റ് നഷ്ടത്തിൽ 180 റൺസ് നേടി. സൂര്യകുമാർ യാദവ് (48), അജിൻക്യ രഹാനെ (37) എന്നിവരുടെ ഇന്നിങ്സുകളാണ് മുംബൈയുടെ വിജയത്തിൽ നിർണായകമായത്. 15 പന്തിൽ പുറത്താവാതെ 36 റൺസ് നേടി വെടിക്കെട്ട് ബാറ്റിങ് പ്രകടനം കാഴ്ചവെച്ച സൂര്യൻഷ് ഷെഡ്ജെ, അങ്ക്ലോകർ (6 പന്തിൽ 16*), ക്യാപ്റ്റൻ ശ്രേയസ് അയ്യർ (ഒമ്പത് പന്തിൽ 16) എന്നിവരെല്ലാം ചേർന്ന് മുംബൈയുടെ വിജയം അനായാസമാക്കി.

 നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ മധ്യപ്രദേശിന് ക്യാപ്റ്റൻ രജത് പടിധാറിന്റെ (40 പന്തിൽ പുറത്താവാതെ 81) ഇന്നിങ്സാണ് മികച്ച സ്‌കോർ സമ്മാനിച്ചത്. 23 റൺസെടുത്ത സുബ്രാൻഷു സേനാപതിയാണ് മധ്യപ്രദേശ് നിരയിലെ രണ്ടാമത്തെ ഉയർന്ന സ്‌കോർ നേടിയത്. മുംബൈ നിരയിൽ ഷാർദുൽ താക്കൂർ, റോയ്സ്റ്റൺ ഡയാസ് എന്നിവർ രണ്ട് വീതം വിക്കറ്റുകൾ വീഴ്ത്തി.

അതേസമയം ഈ സീസണിൽ സ്വപ്ന തുല്യമായ മുന്നേറ്റമാണ് ബെംഗളൂരു നടത്തിയത്. സീസണിലെ ആദ്യ മത്സരത്തിൽ കൊൽക്കത്ത നൈറ്റ് റൈഡേഴ്സിനെ വീഴ്ത്തിയാണ് ബെംഗളൂരു തുടക്കം കുറിച്ചത്. രണ്ടാം മത്സരത്തിൽ ചെന്നൈ സൂപ്പർ കിങ്സിനെയും ആർസിബി പരാജയപ്പെടുത്തി. 17 വർഷങ്ങൾക്ക് ശേഷം ഇതാദ്യമായിട്ടാരുന്നു ചെപ്പോക്കിന്റെ മണ്ണിൽ ആർസിബി ചെന്നൈയെ കീഴടക്കിയത്.

എന്നാൽ മൂന്നാം മത്സരത്തിൽ ഗുജറാത്ത് ടൈറ്റൻസിനോട് ബെംഗളൂരു പരാജയപ്പെട്ടിരുന്നു. പിന്നീട് വാംഖഡെയിൽ മുംബൈ ഇന്ത്യൻസിനെതിരെയുള്ള മത്സരം വിജയിച്ചുകൊണ്ട് ആർസിബി തിരിച്ചുവരികയായിരുന്നു. ഈ സീസണിൽ ഗ്രൂപ്പ് ഘട്ടത്തിൽ നാല് മത്സരങ്ങളിലാണ് ആർസിബി പരാജയപ്പെട്ടത്.