ഇതൊരു സാധാരണ ക്രിക്കറ്റ് ഗ്രൗണ്ടല്ലാട്ടോ. പച്ച പുതച്ചു നില്‍ക്കുന്ന പ്രകൃതിയുടെ മനോഹാരിത മുഴുവനും ഈ ഗ്രൗണ്ടിനുണ്ട്. വരന്തരപ്പിള്ളിയിലെ ഹാരിസണ്‍സ് മലയാളം പ്ലാന്റേഷനുള്ളിലുള്ള പാലപ്പിള്ളി ഗ്രൗണ്ടാണ് ഇത്. ആമസോണ്‍ മഴക്കാടുകളാണോ എന്നു തോന്നിപ്പോവുന്ന അത്രയും മനോഹരമാണ് ഈ പ്രദേശം.  

ചുറ്റും കാടും നടുക്കൊരു ക്രിക്കറ്റ് ഗ്രൗണ്ടും. ഈ റീല്‍സ് ഇനി കാണാത്തവരുണ്ടാവില്ല എന്നു തന്നെ പറയാം. ഈ ഗ്രൗണ്ടുള്ളത് വിദേശത്തൊന്നും അല്ല. നമ്മുടെ കൊച്ചു കേരളത്തില്‍ തന്നെയാണ് ഇവയുള്ളത്. തൃശൂര്‍ പാലപ്പിള്ളിയിലെ ഹാരിസണ്‍ മലയാളം കമ്പനിയുടെ റബര്‍ തോട്ടങ്ങള്‍ക്ക് നടുവിലാണ് ഈ മൈതാനം.

ഇടതൂര്‍ന്ന റബര്‍മരങ്ങള്‍ക്കിടയിലുള്ള പ്രകൃതിയുടെ കളിത്തട്ടുമാണിത്. പ്രദേശവാസികളുടെ പ്രിയപ്പെട്ട ഇടവും. സംഗതി ഇന്‍സ്റ്റയിലൂടെ പുറംലോകത്തെത്തിയപ്പോള്‍ ഗ്രൗണ്ടിന്റെ ആകാശദൃശ്യങ്ങള്‍ വൈറലായി. പിന്നെ പറയേണ്ട, ക്രിക്കറ്റ് കളിക്കാനും ഫോട്ടൊയെടുക്കാനുമായി കിലോമീറ്ററുകള്‍ താണ്ടിപ്പോലും ആളുകളെത്തിത്തുടങ്ങി. ദിവസവും ഒട്ടേറെ മത്സരങ്ങള്‍ നടക്കുന്ന കേരളത്തിലെ ഈ പിച്ചിന് ഇന്നു വിദേശത്തും ആരാധകര്‍ ഏറെയാണ്.

മുമ്പ് ഇതൊരു ഫുട്‌ബോള്‍ ഗ്രൗണ്ടായിരുന്നുവെന്നും താല്‍ക്കാലിക ഗാലറി നിര്‍മിച്ച് ഫുട്‌ബോള്‍ ടൂര്‍ണമെന്റുകള്‍ ഉള്‍പ്പെടെ ഇവിടെ നടന്നിരുന്നുവെന്നുമാണ് പ്രദേശവാസികള്‍ പറുന്നത്. ഈ മൈതാനത്തിനു ചുറ്റും വാകമരങ്ങളാണുള്ളത്. ഇത് പൂക്കുന്നതോടെ ആകാശക്കാഴ്ച അതിമനോഹരമായിരിക്കുമെന്ന് പ്രദേശവാസികള്‍ പറയുന്നു.

തൃശൂര്‍ ജില്ലയില്‍ ഒളിഞ്ഞിരിക്കുന്ന അതിമനോഹരമായ ഒരു ക്രിക്കറ്റ് ഗ്രൗണ്ട് ഒരു ഇന്‍ഫഌവന്‍സറാണ് ഡ്രോണ്‍ വിഡിയോ എടുത്ത് പങ്കുവച്ചത്.