മഴക്കാലമായതോടെ കടല്‍ മല്‍സ്യങ്ങളെ മാറ്റിപ്പിടിച്ച് പുഴ മീനിന്റെയും കായല്‍ മീനിന്റെയും പിറകെയാണ് ആളുകള്‍. ഒമേഗ-3 ഫാറ്റി ആസിഡിനാല്‍ സമ്പുഷ്ടമാണ് പുഴമീന്‍. ആരോഗ്യഗുണങ്ങള്‍ നിരവധിയുള്ള മീനാണ് പുഴമീന്‍. പ്രോട്ടിനാല്‍ സമ്പുഷ്ടവുമാണ്. കറി വച്ചു കഴിക്കുന്നതാണ് ആരോഗ്യത്തിനുത്തമം. 

പുഴമീന്‍ - ഒരുകിലോ
കശ്മീരി മുളകുപൊടി- 4 ടേബിള്‍ സ്പൂണ്‍
മല്ലിപ്പൊടി -2 ടേബിള്‍ സ്പൂണ്‍
മഞ്ഞപ്പൊടി - 1 സ്പൂണ്‍

പുളി-ഒരു ഉരുള
ചെറിയുള്ളി-10 
വെളുത്തുള്ളി - 8 അല്ലി
ഇഞ്ചി- ഒരു കഷണം
കറിവേപ്പില-
ഉലുവ- കടുക്- ഒരു ടീസ്പൂണ്‍
ഉപ്പ് -

ഉണ്ടാക്കുന്ന വിധം

മണ്‍ചട്ടിയില്‍ രണ്ട് സ്പൂണ്‍ വെളിച്ചെണ്ണ ഒഴിച്ച് ചൂടാക്കിയ ശേഷം ഉലുവയും കടുകുമിട്ട്് പൊട്ടിക്കുക. അതിലേക്ക് കറിവേപ്പിലയും ഇഞ്ചിയും ചെറിയുള്ളിയും വെളുത്തുള്ളിയും എന്നിവ ഓരോന്നായി ചേര്‍ത്ത് വഴറ്റുക. ഇതിലേക്ക് മുളകുപൊടിയും മഞ്ഞപൊടിയും മല്ലിപ്പൊടിയും ചേര്‍ത്തു വീണ്ടും വഴറ്റുക.

മസാലകളുടെ പച്ചമണം മാറുന്നതു വരെ വഴറ്റണം. ഇതിലേക്ക് പുളി പിഴിഞ്ഞൊഴിക്കുക. ഉപ്പും പാകത്തിനിടുക. ശേഷം വെള്ളവും ഒഴിച്ചു തിളപ്പിക്കുക. നന്നായി തിളച്ചു കഴിയുമ്പോള്‍ കഴുകി വൃത്തിയാക്കി കഷണങ്ങളാക്കിയ പുഴമീന്‍ ചേര്‍ക്കുക. മീന്‍ വെന്തു കുറുകിവരുമ്പോള്‍ തീ ഓഫ് ചെയ്യുക.

അതിലേക്ക് കറിവേപ്പിലയും പച്ചവെളിച്ചെണ്ണയും ഒഴിച്ചു കൊടുക്കുക. ഒന്ന് ഇളക്കി ചൂടോടെ ചോറിനൊപ്പമോ കപ്പയ്‌ക്കൊപ്പമോ കഴിക്കാം. അടിപൊളി രുചിയായിരിക്കും.