ഗസ്സന്‍ ജനതക്കു മേല്‍ ആക്രമണം നടത്തിക്കൊണ്ടിരിക്കേ ഇസ്‌റാഈല്‍ സൈന്യത്തിന് നേരെ പ്രതിരോധ സേനയുടെ മിന്നല്‍ ആക്രമണം. പതിയിരുന്ന് നടത്തിയ ആക്രമണത്തില്‍ സൈന്യമുണ്ടായിരുന്ന കെട്ടിടം തകര്‍ന്നു വീണു. ഇതില്‍ അഞ്ച് ഇസ്‌റാഈലി സൈനികര്‍ കൊല്ലപ്പെട്ടതായും ഇസ്‌റാഈല്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു. 

ഖാന്‍യൂനിസിലാണ് സംഭവം. ചില സൈനികര്‍ക്ക് പരുക്കേറ്റതായും റിപ്പോര്‍ട്ടുകള്‍ പറയുന്നു. പത്തോളം സൈനികരെ സ്ഥസലത്ത് നിന്ന് ഹെലികോപ്ടറില്‍ മാറ്റിയതായി പ്രതിരോധ സേന റിപ്പോര്‍ട്ട് ചെയ്യുന്നു. 

അതേസമയം, പെരുന്നാള്‍ ദിനത്തിലും ഗസ്സയില്‍ ഇസ്റാഈല്‍ കനത്ത ആക്രമണം തുടരുകയാണെന്നാണ് പുറത്തു വരുന്ന റിപ്പോര്‍ട്ടുകള്‍. ഖാന്‍യൂനിസില്‍ പെരുന്നാള്‍നിസ്‌ക്കാരത്തിനെത്തിയവര്‍ക്ക് നേരെ ഇസ്റാഈല്‍ സൈന്യം നടത്തിയ വെടിവെപ്പില്‍ ഒരു കുട്ടിയുള്‍പെടെ നിരവധി പേര്‍ കൊല്ലപ്പെട്ടതായി പാലസ്തീന്‍ ക്രോണിക്കിള്‍ റിപ്പോര്‍ട്ട് ചെയ്യുന്നു.

Israeli occupation helicopters open fire over Khan Yunis during the evacuation of a military unit that fell into a resistance ambush east of the city. pic.twitter.com/Ywxtac23mB

— Quds News Network (@QudsNen) June 6, 2025

ഇന്നലെ ഇസ്‌റാഈല്‍ ആക്രമണത്തില്‍ നാലു മാധ്യമപ്രവര്‍ത്തകര്‍ ഉള്‍പ്പടെ 43 പേര്‍ കൊല്ലപ്പെട്ടിരുന്നു. തെക്കന്‍ ഗസ്സയിലാണ് ഇന്നലെ ഇസ്‌റാഈല്‍ ആക്രമണം ശക്തിപ്പെടുത്തിയത്. ഗസ്സ സിറ്റിയിലെ അല്‍ അഹാലി ആശുപത്രിയില്‍ നടത്തിയ ആക്രമണത്തിലാണ് നാലു മാധ്യമ പ്രവര്‍ത്തകര്‍ കൊല്ലപ്പെട്ടത്.

തെക്കന്‍ ഗസ്സയിലെ നാസര്‍ ആശുപത്രിയില്‍ 21 പേരുടെ മൃതദേഹങ്ങള്‍ എത്തിയതായി ആശുപത്രി വൃത്തങ്ങള്‍ പറഞ്ഞു. ആശുപത്രിക്കു നേരെ നടന്ന ആക്രമണം ഹമാസ് അപലപിച്ചു. എട്ടാം തവണയാണ് ഈ ആശുപത്രിക്കുനേരെ ഇസ്‌റാഈല്‍ ആക്രമണം നടത്തുന്നത്.