മരണം പെയ്യുന്ന ആകാശത്തിന് കീഴെ ഗസ്സക്ക് ഒരു പെരുന്നാള്‍ കൂടി. വിശന്നും തളര്‍ന്നും അവര്‍ ഒരിക്കല്‍ കൂടി ഒത്തുകൂടി. ഒന്നിച്ച് തക്ബീര്‍ മുഴക്കി. തേങ്ങലമരാത്ത ആ തക്ബീര്‍ ധ്വനികള്‍ തകര്‍ന്ന കോണ്‍ക്രീറ്റ് കഷ്ണങ്ങളില്‍ തട്ടി ആകാശത്തേക്കുയര്‍ന്നു. അവര്‍ക്കുള്ള മരണവാറന്‍രുമായി ഇസ്‌റാഈല്‍  യുദ്ധവിമാനങ്ങള്‍ കുതിച്ചു പായുന്ന അതേ ആകാശത്തേക്ക്. 

പെരുന്നാളാഘോഷിക്കാനെത്തിയ കുരുന്നുകളില്‍ ഭൂരിഭാഗവും അനാഥരാണ്. കുടുംബത്തോടെ ചുട്ടുകരിക്കപ്പെട്ടവര്‍. സ്വന്തമെന്ന് പറയാന്‍ അവിടെ കൂടിയവരില്‍ പലര്‍ക്കും ആരുമില്ലായിരുന്നു. അവര്‍ പരസ്പരം തണലായി. അവര്‍ പരസ്പരം സ്വന്തക്കാരായി. ഒരേ ഈണത്തില്‍ ഒരേ താളത്തില്‍ അവര്‍ പറഞ്ഞു. ദൈവം വലിയവനാണ്. പുതുവസ്ത്രങ്ങളോ കഴിക്കാന്‍ ഭക്ഷണമോ പോലും ഇല്ലാത്ത പെരുന്നാലാണ് അവര്‍ക്ക്. ഏത് സമയത്തും ഒരു മിസൈല്‍ തങ്ങള്‍ക്ക് മുകളില്‍ പൊട്ടിച്ചിതറിയേക്കാമെന്ന ഭീതിയിലുള്ള പെരുന്നാള്‍. 

Gazans mark the fourth consecutive Eid during the ongoing Israeli genocide, with each celebration shadowed by entire families wiped out and the growing absence of relatives and loved ones lost to relentless Israeli massacres. pic.twitter.com/amaPvNMGOk

— Quds News Network (@QudsNen) June 6, 2025

പെരുന്നാള്‍ ദിനത്തിലും ഗസ്സയില്‍ ഇസ്‌റാഈല്‍ കനത്ത ആക്രമണം തുടരുകയാണെന്നാണ് പുറത്തു വരുന്ന റിപ്പോര്‍ട്ടുകള്‍. ഖാന്‍യൂനിസില്‍ പെരുന്നാള്‍നിസ്‌ക്കാരത്തിനെത്തിയവര്‍ക്ക് നേരെ ഇസ്‌റാഈല്‍ സൈന്യം നടത്തിയ വെടിവെപ്പില്‍ ഒരു കുട്ടിയുള്‍പെടെ നിരവധി പേര്‍ കൊല്ലപ്പെട്ടതായി പാലസ്തീന്‍ ക്രോണിക്കിള്‍ റിപ്പോര്‍ട്ട് ചെയ്യുന്നു. 

ഇന്നലെ ഇസ്റാഈല്‍ ആക്രമണത്തില്‍ നാലു മാധ്യമപ്രവര്‍ത്തകര്‍ ഉള്‍പ്പടെ 43 പേര്‍ കൊല്ലപ്പെട്ടിരുന്നു. തെക്കന്‍ ഗസ്സയിലാണ് ഇന്നലെ ഇസ്റാഈല്‍ ആക്രമണം ശക്തിപ്പെടുത്തിയത്. ഗസ്സ സിറ്റിയിലെ അല്‍ അഹാലി ആശുപത്രിയില്‍ നടത്തിയ ആക്രമണത്തിലാണ് നാലു മാധ്യമ പ്രവര്‍ത്തകര്‍ കൊല്ലപ്പെട്ടത്.

തെക്കന്‍ ഗസ്സയിലെ നാസര്‍ ആശുപത്രിയില്‍ 21 പേരുടെ മൃതദേഹങ്ങള്‍ എത്തിയതായി ആശുപത്രി വൃത്തങ്ങള്‍ പറഞ്ഞു. ആശുപത്രിക്കു നേരെ നടന്ന ആക്രമണം ഹമാസ് അപലപിച്ചു. എട്ടാം തവണയാണ് ഈ ആശുപത്രിക്കുനേരെ ഇസ്റാഈല്‍ ആക്രമണം നടത്തുന്നത്.