മക്ക: സൂര്യാഘാതം അടക്കം കടുത്ത ചൂടു മൂലമുള്ള ആരോഗ്യ പ്രശ്‌നങ്ങള്‍ ഒഴിവാക്കാന്‍ ദുല്‍ഹജ് ഒമ്പതിന് ഹജിന്റെ ഏറ്റവും പ്രധാന കര്‍മമായ അറഫ സംഗമത്തില്‍ പങ്കെടുക്കുന്ന ഹാജിമാര്‍ രാവിലെ പത്തു മുതല്‍ വൈകീട്ട് നാലു വരെയുള്ള സമയത്ത് തമ്പുകള്‍ക്കുള്ളില്‍ തന്നെ കഴിയണമെന്ന് ഹജ്, ഉംറ മന്ത്രി ഡോ. തൗഫീഖ് അല്‍റബീഅ ആവശ്യപ്പെട്ടു. ഹജ്ജ് ദിനങ്ങളിൽ ചൂട് കനക്കുമെന്ന് കാലാവസ്ഥ കേന്ദ്രങ്ങൾ മുന്നറിയിപ്പ് നൽകുന്നുണ്ട്.

ചൂടിനെ പ്രതിരോധിക്കാനായി വിവിധ കാര്യങ്ങൾ സജ്ജീകരിച്ചിട്ടുണ്ട്. അന്തരീക്ഷം തണുപ്പിക്കാനുള്ള സംവിധാനങ്ങൾ ഉൾപ്പെടെ ചൂട് ചെറുക്കാനായി മിനായിലും അറഫാതിലും റോഡിലും മറ്റുമായി വിവിധ സംവിധാനങ്ങൾ ഒരുക്കിയിട്ടുണ്ട്. എങ്കിലും ഹാജിമാർക്ക് നിർജിലീകരണം ഉൾപ്പെടെയുള്ള കാര്യങ്ങളിൽ ജാഗ്രത പുലർത്തണമെന്ന് നിർദേശമുണ്ട്.

ദുല്‍ഹജ് ഒമ്പതിന് അറഫ സംഗമത്തില്‍ പങ്കെടുത്ത ശേഷം അറഫയില്‍ നിന്ന് മുസ്ദലിഫയിലേക്ക് കാല്‍നടയായി പോകരുതെന്നും പ്രത്യേകം നിശ്ചയിച്ച ഗതാഗത സംവിധാനങ്ങള്‍ തീര്‍ഥാടകര്‍ ഉപയോഗിക്കണമെന്നും മന്ത്രി നിർദേശിച്ചു. സൂര്യാഘാതം തടയാനുള്ള മാര്‍ഗനിര്‍ദേശങ്ങള്‍ പാലിക്കണമെന്ന് ഹജ്, ഉംറ മന്ത്രാലയവും തീര്‍ഥാടകരോട് ആവശ്യപ്പെട്ടു. സൂര്യാഘാതം തടയാന്‍ ധാരാളം വെള്ളം കുടിക്കണം. തണുത്ത വെള്ളം തളിച്ച് ശരീരം തണുപ്പിക്കണമെന്നും സണ്‍സ്‌ക്രീനും കുടയും ഉപയോഗിക്കുന്നുണ്ടെന്ന് ഉറപ്പാക്കണമെന്നും ഹജ്, ഉംറ മന്ത്രാലയം മന്ത്രാലയം ഉപദേശിച്ചു.

ഇന്ത്യയിൽ നിന്ന് ഇത്തവണ 1,22,518 ഹാജിമാരാണ് ഹജ്ജിന് എത്തിയത്. ഇതിൽ 16,341 പേർ കേരളത്തിൽ നിന്നുള്ളവരാണ്. ഹജ്ജ് കർമങ്ങൾ നടക്കുന്ന സ്ഥലങ്ങൾ തമ്മിൽ ബന്ധിപ്പിച്ചുള്ള മെട്രോ ടെയിൻ സൗകര്യം ഇത്തവണ 59,265 ഇന്ത്യൻ ഹാജിമാർക്കാണ് ലഭിക്കുക. മറ്റു ഹാജിമാരെ ഹജ്ജ് സർവിസ് കമ്പനികൾ മിനയിലേക്കും മറ്റിടങ്ങളിലേക്കും ബസുകളിൽ എത്തിക്കും.