ചെന്നൈ: 2025 ഐപിഎൽ സീസണിന് തിരശ്ശീല വീണിരിക്കുകയാണ്. ഈ സീസണിൽ പുതിയ ചാമ്പ്യന്മാരെയാണ് ഐപിഎല്ലിന് ലഭിച്ചിരിക്കുന്നത്. നീണ്ട 18 വർഷത്തെ കിരീട വരൾച്ച അവസാനിപ്പിച്ചുകൊണ്ട് റോയൽ ചലഞ്ചേഴ്സ് ബെംഗളൂരുവാണ് ഇന്ത്യൻ ക്രിക്കറ്റിന്റെ നെറുകയിൽ എത്തിയത്. ഫൈനൽ പോരാട്ടത്തിൽ പഞ്ചാബ് കിങ്സിനെ ആറ് റൺസിന് വീഴ്ത്തിയാണ് ആർസിബി കിരീടം ചൂടിയത്. 

ഈ സീസണിൽ  നിരാശാജനകമായ പ്രകടനങ്ങൾ പുറത്തെടുത്ത ചെന്നൈ സൂപ്പർ കിങ്സ് മറ്റൊരു പട്ടികയിൽ ഒന്നാമത്തെത്തി യിരിക്കുകയാണ്. 2025 ഐപിഎല്ലിലെ ഫെയർ പ്ലേ അവാർഡിൽ ഒന്നാമതായാണ് എം എസ് ധോണിയും സംഘവും നേട്ടം ഉണ്ടാക്കിയത്.  കളിക്കളത്തിലെ മാതൃക പരമായ പെരുമാറ്റത്തിന്റെ അടിസ്ഥാനത്തിലാണ് ഫെയർ പ്ലേ അവാർഡിനുള്ള ടീമിനെ തെരഞ്ഞെടുക്കുന്നത്.

14 മത്സരങ്ങളിൽ നിന്നും 10.21 ആവറേജാണ് ധോണിയും സംഘവും സ്വന്തമാക്കിയത്. 17 മത്സരങ്ങളിൽ നിന്നും 10.18 ആവറേജ് സ്വന്തമാക്കിയ പഞ്ചാബ് ആണ് രണ്ടാം സ്ഥാനത്തുള്ളത്. കിരീടം നേടിയ ആർസിബി ഏഴാം സ്ഥാനത്തുമാണ്. 

ഈ സീസണിൽ 14 മത്സരങ്ങളിൽ നിന്നും വെറും നാല് മത്സരങ്ങളിൽ മാത്രമാണ് ചെന്നൈയ്ക്ക് വിജയിക്കാൻ സാധിച്ചത്. 10 മത്സരങ്ങൾ പരാജയപ്പെട്ട് വെറും എട്ട് പോയിന്റോടെ അവസാന സ്ഥാനത്താണ് ചെന്നൈ ഫിനിഷ് ചെയ്തത്.

അതേസമയം ഇന്നലെ നടന്ന ഫൈനൽ പോരാട്ടത്തിൽ ആറ് റൺസിനായിരുന്നു ആർസിബിയുടെ വിജയം. ഗുജറാത്തിലെ അഹമ്മദാബാദ് നരേന്ദ്രമോദി സ്റ്റേഡിയത്തിൽ നടന്ന മത്സരത്തിൽ നഷ്ടപ്പെട്ട് ആദ്യം ബാറ്റ് ചെയ്ത ബംഗളൂരു 20 ഓവറിൽ 9 വിക്കറ്റ് നഷ്ടത്തിൽ 190 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ പഞ്ചാബിനെ 20 ഓവറിൽ 7 വിക്കറ്റ് നഷ്ടത്തിൽ 184 റൺസിൽ എത്താനെ സാധിച്ചുള്ളൂ.

Chennai Super Kings, who had a disappointing performance in the 2025 IPL season, made up for it by finishing first in the Fair Play Awards