അഹമ്മദാബാദ്: നീണ്ട 18 വർഷത്തെ കിരീട വരൾച്ച അവസാനിപ്പിച്ചുകൊണ്ട് റോയൽ ചലഞ്ചേഴ്സ് ബെംഗളൂരു ഐപിഎല്ലിന്റെ ചാമ്പ്യന്മാരായി മാറിയിരിക്കുകയാണ്. ഫൈനൽ പോരാട്ടത്തിൽ പഞ്ചാബ് കിങ്സിനെ ആറ് റൺസിന് വീഴ്ത്തിയാണ് ആർസിബി ചരിത്രത്തിലെ ആദ്യ കിരീടം സ്വന്തമാക്കിയത്.  ഗുജറാത്തിലെ അഹമ്മദാബാദ് നരേന്ദ്രമോദി സ്റ്റേഡിയത്തിൽ നടന്ന മത്സരത്തിൽ നഷ്ടപ്പെട്ട് ആദ്യം ബാറ്റ് ചെയ്ത ബംഗളൂരു 20 ഓവറിൽ 9 വിക്കറ്റ് നഷ്ടത്തിൽ 190 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ പഞ്ചാബിനെ 20 ഓവറിൽ 7 വിക്കറ്റ് നഷ്ടത്തിൽ 184 റൺസിൽ എത്താനെ സാധിച്ചുള്ളൂ. 

 

ഫൈനലിലെ പഞ്ചാബിന്റെ തോൽവിക്ക് പിന്നാലെ ഒരു താരവും ആഗ്രഹിക്കാത്ത ഒരു ലിസ്റ്റിലാണ് സ്പിന്നർ യുസ്വേന്ദ്ര ചഹൽ ഇടം നേടിയത്. ഐപിഎല്ലിന്റെ ചരിത്രത്തിൽ മൂന്ന് വ്യത്യസ്ത ടീമുകൾക്കൊപ്പം ഫൈനലിൽ തോൽക്കുന്ന താരങ്ങളുടെ പട്ടികയിലേക്കാണ് ചഹലിന്റെ പേരും എഴുതപ്പെട്ടത്. പഞ്ചാബ് കിങ്‌സ്, രാജസ്ഥാൻ റോയൽസ്, റോയൽ ചലഞ്ചേഴ്സ് ബെംഗളൂരു എന്നീ മൂന്ന് ടീമുകൾക്കൊപ്പമാണ് താരം ഫൈനൽ മത്സരം തോറ്റത്. 

2016 ഐപിഎല്ലിൽ ആണ് ചഹൽ തന്റെ ആദ്യ ഫൈനൽ മത്സരം പരാജയപ്പെടുന്നത്. അന്ന് റോയൽ ചലഞ്ചേഴ്സ് ബെംഗളൂരുവിന്റെ താരമായിരുന്നു ചഹൽ. സൺറൈസേഴ്സ് ഹൈദരാബാദിനെതിരെ പരാജയപ്പെട്ടായിരുന്നു 2016ൽ ആർസിബിക്ക് കിരീടം നഷ്ടമായത്. പിന്നീട് 2022ൽ രാജസ്ഥാൻ റോയൽസിന്റെ ജേഴ്സിയിലും താരം ഫൈനലിൽ തോൽവി നേരിട്ടു. ഗുജറാത്ത് ടൈറ്റൻസാണ് രാജസ്ഥാന് പരാജയപ്പെടുത്തിയത്. ഇപ്പോഴിതാ മൂന്ന് വർഷങ്ങൾക്ക് ശേഷം മറ്റൊരു ടീമിനൊപ്പവും ചഹൽ ഫൈനൽ മത്സരത്തിൽ തോൽവി നേരിട്ടിരിക്കുകയാണ്. 

ഈ സീസണിൽ 18 കോടിക്കായിരുന്നു പഞ്ചാബ് ചഹലിനെ സ്വന്തമാക്കിയിരുന്നത്. ഈ സീസണിൽ പഞ്ചാബിന് വേണ്ടി 14 മത്സരങ്ങളിൽ നിന്നും 16 വിക്കറ്റുകളാണ്‌ താരം നേടിയത്. പരുക്കേറ്റതിന് പിന്നാലെ താരത്തിന് രണ്ടു മത്സരങ്ങൾ നഷ്ടമായിരുന്നു. ഫൈനൽ പോരാട്ടത്തിൽ നാലു ഓവറിൽ 37 റൺസ് വഴങ്ങി താരം ഒരു വിക്കറ്റും നേടിയിരുന്നു. 

ചഹലിന് മുമ്പ് മൂന്ന് താരങ്ങൾ മാത്രമാണ് ഈ പട്ടികയിൽ ഇടം നേടിയിരുന്നത്. ആർ അശ്വിൻ, ശിഖർ ധവാൻ, രാഹുൽ ത്രിപാഠി എന്നിവർക്ക് ശേഷം മൂന്ന് വ്യത്യസ്ത ടീമുകൾക്കൊപ്പം ഫൈനലിൽ തോൽക്കുന്ന നാലാമത്തെ താരമാണ് ചഹൽ.

രാജസ്ഥാൻ റോയൽസ്, ഡൽഹി ക്യാപിറ്റൽസ്, ചെന്നൈ സൂപ്പർ കിങ്‌സ് എന്നീ ടീമുകൾ ഒപ്പം ആയിരുന്നു അശ്വിൻ ഫൈനലിൽ പരാജയപ്പെട്ടത്. ധവാൻ മുംബൈ ഇന്ത്യൻസ്,  ഡൽഹി ക്യാപിറ്റൽസ്, സൺറൈസേഴ്‌സ് ഹൈദരാബാദ് എന്നീ ടീമുകൾക്കൊപ്പം ഫൈനലിൽ തോൽവി നേരിട്ടു. റൈസിംഗ് പൂനെ സൂപ്പർ ജയന്റ്സ്, സൺറൈസേഴ്‌സ് ഹൈദരാബാദ് കൊൽക്കത്ത നൈറ്റ് റൈഡേഴ്‌സ് എന്നീ ടീമുകൾക്കൊപ്പമാണ് ത്രിപാഠി ഫൈനലിൽ പരാജയപ്പെട്ടത്. 

Punjab Kings spinner Yuzvendra Chahal joins the list of players to lose in the final with three different teams in IPL history