ശ്രീനഗർ: കശ്മീർ താഴ്‌വരയിലെ വിവിധ സ്ഥലങ്ങളിൽ ദേശീയ അന്വേഷണ ഏജൻസി (എൻ‌ഐ‌എ) റെയ്ഡ് നടത്തുന്നു. തെക്കൻ കശ്മീരിലെ ഷോപ്പിയാൻ, കുൽഗാം, പുൽവാമ എന്നിവിടങ്ങളിലും വടക്കൻ കശ്മീരിലെ സോപോർ, കുപ്വാര എന്നിവിടങ്ങളിലുമാണ് റെയ്ഡ് നടക്കുന്നത്. താഴ്‌വരയിലുടനീളമുള്ള 32 സ്ഥലങ്ങളിൽ ഒരേസമയം റെയ്ഡ് നടത്തുന്നുണ്ടെന്ന് ഒരു ഉദ്യോഗസ്ഥൻ പറഞ്ഞു. കേന്ദ്ര അന്വേഷണ ഏജൻസി ഉദ്യോഗസ്ഥർക്കൊപ്പം ജമ്മു കശ്മീർ പൊലിസും അർദ്ധസൈനിക വിഭാഗവും ഉണ്ടായിരുന്നുവെന്ന് പോലീസ് ഉദ്യോഗസ്ഥർ പറഞ്ഞു. ഭീകര ഗൂഢാലോചന കേസുമായി ബന്ധപ്പെട്ടാണ് റെയ്‌ഡെന്നാണ് ഉദ്യോഗസ്ഥർ നൽകുന്ന സൂചന.

തെക്കൻ കശ്മീരിലെ ഷോപ്പിയാനിലെ റെബൻ നിൽദൂറ, ചെക്ക്-ഇ-ചോളണ്ട് ഗ്രാമങ്ങളിലാണ് തിരച്ചിൽ നടക്കുന്നത്. കുൽഗാം ജില്ലയിലെ ദേവ്സർ, ബുഗം, സോണിഗം, മൻസ്ഗാം ഗ്രാമങ്ങളിലും തിരച്ചിൽ തുടരുകയാണെന്ന് ഉദ്യോഗസ്ഥർ പറഞ്ഞു. തെക്കൻ കശ്മീരിലെ പുൽവാമയിലെ ചില സ്ഥലങ്ങളിലും തിരച്ചിൽ നടത്തിയതായി ഉദ്യോഗസ്ഥർ പറഞ്ഞു. 

മൂന്ന് വർഷം മുമ്പ് കേന്ദ്ര ഏജൻസി രജിസ്റ്റർ ചെയ്ത കേസിലാണ് റെയ്ഡുകൾ നടക്കുന്നതെന്ന് ഒരു ഉദ്യോഗസ്ഥൻ പറഞ്ഞു. 2022 ൽ ജമ്മുവിൽ നിരവധി ഭീകര സംഘടനകൾക്കും പ്രവർത്തകർക്കുമെതിരെ ഗൂഢാലോചന നടത്തിയതിന് എൻഐഎ കേസ് രജിസ്റ്റർ ചെയ്തിരുന്നു.

ഏപ്രിൽ 22-ന് പഹൽഗാമിൽ 25 വിനോദസഞ്ചാരികളുടെയും ഒരു നാട്ടുകാരന്റെയും മരണത്തിന് കാരണമായ ഭീകരാക്രമണത്തിന് പിന്നാലെ പ്രദേശത്ത് സുരക്ഷാ ശക്തമാക്കിയിട്ടുണ്ട്. എന്നാൽ പഹൽഗാം ആക്രമണം നടത്തിയ ഭീകരരെ ഇതുവരെ പിടികൂടാൻ ആയിട്ടില്ല.