കാസര്‍കോഡാണ് സംഭവം. അതും സ്‌കൂളില്‍ പഠിക്കുമ്പോള്‍. നാലാം ക്ലാസില്‍. ഇപ്പോള്‍ കക്ഷിക്ക് 62 വയസായി. ഇത് കെട്ടുകഥയോ സിനിമാകഥയോ ഒന്നുമല്ല. നമ്മുടെ കേരളത്തില്‍ നടന്ന സംഭവമാണ്. കാസര്‍കോഡ് വെള്ളരിക്കുണ്ടില്‍ നടന്ന പ്രതികാര സംഭവമാണ് ഇത്.

മാലോത്തെ ബാലകൃഷ്ണനാണ് തന്റെ ചെറുപ്പകാലത്തെ പിണക്കത്തിന് പ്രതികാരം ചെയ്ത് കേസില്‍ കുടുങ്ങിയിരിക്കുന്നത്. മാലോം ടൗണിനടുത്ത് താമസിക്കുന്ന വെട്ടിക്കൊമ്പില്‍ വിജെ ബാബുവാണ്(62) പരാതിക്കാരന്‍. മാലോം സ്വദേശികളായ ബാലകൃഷ്ണന്‍(62), സൂഹൃത്ത് വലിയ പ്ലാക്കല്‍ മാത്യു(61) എന്നിവരുടെ പേരിലാണ് കേസ്. ഒരാഴ്ച മുമ്പ് മാലോം ടൗണില്‍ വച്ച് ബാലകൃഷ്ണനും ബാബുവും തമ്മില്‍ വാക്കേറ്റം നടന്നിരുന്നു.

നാലാം ക്ലാസില്‍ വച്ച് എന്നെ അടിച്ചത് മറന്നിട്ടില്ലെന്നാണ് അന്ന് ബാബു പറഞ്ഞത്. വാക്കേറ്റം നാട്ടുകാര്‍ ഇടപെട്ട് ഒത്തുതീര്‍പ്പാക്കുകയും ചെയ്തിരുന്നു. എന്നാല്‍ കുറച്ചു ദിവസം മുമ്പ് ടൗണില്‍ വച്ച് ഇരുവരും വീണ്ടും വഴക്കിട്ടു.

ബാലകൃഷ്ണന്റെ സുഹൃത്തും ഒപ്പമുണ്ടായിരുന്നു. ബാലകൃഷ്ണന്‍ ബാബുവിനെ തടഞ്ഞു വയ്ക്കുകയും മാത്യു കല്ലുകൊണ്ട് മുഖത്തടിക്കുകയും ചെയ്‌തെന്നാണ് കേസ്. ബാബുവിന്റെ രണ്ടു പല്ലുകള്‍ക്കാണ് കേടുപറ്റിയത്. 

നാലാം തരത്തില്‍ ബാബുവും ബാലകൃഷ്ണനും ഒരേ ക്ലാസിലായിരുന്നു പഠിച്ചത്. ഇടയ്ക്ക് വഴക്കിടുകയും അടിപിടി കൂടുകയും ചെയ്തിരുന്നതായി ബാലകൃഷ്ണന്‍ പൊലിസിനോട് പറഞ്ഞു. അന്ന് ബാബു തന്നെ മര്‍ദിച്ചതിനുള്ള വിരോധമാണ് ഇപ്പോഴത്തെ അടിപിടി എന്നുമാണ് ബാലകൃഷ്ണന്റെ മൊഴി.