സൗകര്യപ്രദമായ യാത്രയ്ക്കായി ട്രെയിന്‍ മാര്‍ഗം തിരഞ്ഞെടുക്കുന്നവരാണ് ഒട്ടുമിക്ക ആളുകളും. 
ട്രെയിന്‍ എവിടെ എത്തി എന്ന് അറിയാന്‍ സ്വകാര്യ ആപ്പുകള്‍ ഉപയോഗിക്കുന്നവരാണോ നിങ്ങള്‍? എങ്കില്‍ പണികിട്ടും. അത്തരക്കാര്‍ക്കായി മുന്നറിയിപ്പുമായി എത്തിയിരിക്കുകയാണ് റെയില്‍വേ. ട്രെയിന്‍ പുറപ്പെടുന്ന സമയം ഉള്‍പ്പെടെയുള്ള വിവരങ്ങള്‍ അറിയുന്നതിനായി റെയില്‍വേയുടെ ഔദ്യോഗിക ആപ്പായ നാഷണല്‍ ട്രെയിന്‍ എന്‍ക്വയറി സിസ്റ്റം ഉപയോഗിക്കണമെന്നാണ് റെയില്‍വേ പറയുന്നത്. 

ട്രെയിന്‍ സമയം, റദ്ദാക്കിയ ട്രെയിന്‍, വഴിതിരിച്ചുവിട്ട ട്രെയിന്‍ എന്നിങ്ങനെയുള്ള വിവരങ്ങള്‍ കൃത്യമായി അറിയാന്‍ റെയില്‍വേയുടെ ഔദ്യോഗിക ആപ്പ് തന്നെ ഉപയോഗിക്കണമെന്ന് റെയില്‍വേ അറിയിച്ചു. യാത്രക്കാര്‍ പൊതുവെ വേര്‍ ഈസ് മൈ ട്രെയിന്‍, ഇക്‌സിഗോ തുടങ്ങിയ സ്വകാര്യ ആപ്പുകളാണ് ഉപയോഗിക്കുന്നത്.

ഈ ആപ്പുകള്‍ പലപ്പോഴും യാത്രക്കാരുടെ ജിപിഎസ് ഉപയോഗിച്ചാണ് വിവരങ്ങള്‍ നല്‍കുന്നത്. അതുകൊണ്ട് തന്നെ സ്വകാര്യ അപ്പുകളില്‍ ട്രെയിന്‍ സമയം മാറുന്നതും ഗതാഗത തടസ്സം നേരിടുന്നതും കൃത്യമായി അപ്‌ഡേറ്റ് ആകാറില്ല. മഴക്കാലമായതോടെ റെയില്‍പാളത്തില്‍ മരം വീണും വെള്ളം കയറിയും ട്രെയിന്‍ വൈകുകയും വഴിതിരിച്ചുവിടുകയും ചെയ്യാനുള്ള സാധ്യത വളരെ കൂടുതലാണ്. ഈ കാര്യം കണക്കിലെടുത്ത് യാത്രക്കാര്‍ക്ക് വീണ്ടും മുന്നറിയിപ്പുമായി റെയില്‍വേ എത്തിയിരിക്കുന്നത്.