ദുബൈ: ലോകത്തിലെ ഏറ്റവും ഉയരം കൂടിയ മെട്രോ സ്റ്റേഷന്‍ ദുബൈയില്‍ ഒരുങ്ങുന്നു. ദുബൈ മെട്രോ ബ്ലൂ ലൈനിന്റെ ശിലാസ്ഥാപന വേളയില്‍, യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം ലോകത്തിലെ ഏറ്റവും ഉയരം കൂടിയ മെട്രോ സ്റ്റേഷനായ 74 മീറ്റര്‍ ഉയരമുള്ള ഇമാര്‍ പ്രോപ്പര്‍ട്ടീസ് സ്റ്റേഷന്റെ ഡിസൈനും അംഗീകാരം നല്‍കി.

ALSO READ: ഇന്ത്യന്‍ രൂപയും മറ്റ് രാജ്യങ്ങളിലെ കറന്‍സികളും തമ്മിലുള്ള ഇന്നത്തെ വിനിമയ നിരക്ക് | India Rupee Value Today

ക്രോസിംഗ് ഗേറ്റ്‌വേ എന്ന ആശയത്തില്‍ നിന്ന് പ്രചോദനം ഉള്‍ക്കൊണ്ട്, ലോകത്തിലെ മുന്‍നിര ഡിസൈന്‍ സ്റ്റുഡിയോകളില്‍ ഒന്നായ പ്രശസ്ത അമേരിക്കന്‍ ആര്‍ക്കിടെക്ചറല്‍ സ്ഥാപനമായ സ്‌കിഡ്‌മോര്‍, ഓവിംഗ്‌സ് & മെറില്‍ ആണ് സ്റ്റേഷന്‍ രൂപകല്‍പ്പന ചെയ്തിരിക്കുന്നത്. ബുര്‍ജ് ഖലീഫ, ന്യൂയോര്‍ക്കിലെ ഒളിമ്പിക് ടവര്‍, ചിക്കാഗോയിലെ സിയേഴ്‌സ് ടവര്‍ തുടങ്ങിയ ഐക്കണിക് ലാന്‍ഡ്മാര്‍ക്കുകള്‍ നിര്‍മ്മിച്ചതും ഇതേ കമ്പനിയാണ്.

ഏകദേശം 11,000 ചതുരശ്ര മീറ്റര്‍ വിസ്തൃതിയുള്ള ഈ സ്റ്റേഷന്‍ പ്രതിദിനം 160,000 യാത്രക്കാരെ ഉള്‍ക്കൊള്ളാന്‍ കഴിയുന്ന തരത്തിലാണ് രൂപകല്‍പ്പന ചെയ്തിരിക്കുന്നത്. 2040 ആകുമ്പോഴേക്കും ഈ സ്റ്റേഷന്‍ ഉപയോഗിക്കുന്ന പ്രതിദിന ഉപയോക്താക്കളുടെ എണ്ണം 70,000 ആകുമെന്നാണ് പ്രതീക്ഷിക്കുന്നത്.

ബ്ലൂ ലൈന്‍ പദ്ധതി പൂര്‍ത്തിയാകുന്നതോടെ, ദുബൈ റെയില്‍ ശൃംഖല 78 സ്റ്റേഷനുകളും 168 ട്രെയിനുകളും ഉള്‍പ്പെടെ മൊത്തം 131 കിലോമീറ്ററായി വികസിക്കും.

2009ല്‍ ആരംഭിച്ചതുമുതല്‍ 2024 അവസാനം വരെ 2.527 ബില്യണിലധികം യാത്രക്കാരാണ് ദുബൈ മെട്രോ വഴി യാത്ര ചെയ്തത്. 2024ല്‍ മെട്രോ വഴി പ്രതിദിനം 900,000 യാത്രക്കാരാണ് സഞ്ചരിച്ചത്. വര്‍ഷം തോറും ദുബൈ മെട്രോ ഉപയോഗിക്കുന്നവരുടെ എണ്ണത്തില്‍ വന്‍വര്‍ധനവാണ് ഉണ്ടായിക്കൊണ്ടിരിക്കുന്നത്. 

2010ല്‍ 38.887 ദശലക്ഷമായിരുന്ന യാത്രക്കാരുടെ എണ്ണം 2011ല്‍ 69 ദശലക്ഷമായി. 77 ശതമാനം വളര്‍ച്ചാ നിരക്കാണ് ഈ വര്‍ഷത്തില്‍ രേഖപ്പെടുത്തിയത്. 2012ല്‍ ഇത് 109 ദശലക്ഷമായി ഉയര്‍ന്നു. 2024ല്‍ ഇത് 275.4 ദശലക്ഷം കവിഞ്ഞു.

ALSO READ: ദുബൈ മെട്രോ ബ്ലൂ ലൈന് ദുബൈ ഭരണാധികാരി തറക്കല്ലിട്ടു; ബ്ലൂ ലൈന്റെ ദൈര്‍ഘ്യം 30 കിലോമീറ്റര്‍

പഠനങ്ങള്‍ പ്രകാരം, 2026ല്‍ ദുബൈ മെട്രോ യാത്രക്കാരുടെ എണ്ണം 300 ദശലക്ഷം കവിയുമെന്നും 2031ഓടെ ഇത് 320 ദശലക്ഷത്തിലെത്തുമെന്നാണ് പ്രതീക്ഷിക്കുന്നത്. 

മെട്രോ സ്റ്റേഷനുകളുടെ വിപുലീകരണത്തെക്കുറിച്ചും അദ്ദേഹം വിശദീകരിച്ചു. 2009ല്‍ 10 സ്റ്റേഷനുകളോടെ ആരംഭിച്ച ദുബൈ മെട്രോ 2010ല്‍ 26 സ്റ്റേഷനുകളും
2011ല്‍ 46 സ്റ്റേഷനുകളായും വളര്‍ന്നു. 2021ല്‍, മെട്രോയുടെ റൂട്ട് 2020 ആരംഭിച്ചതോടെ ഏഴ് സ്റ്റേഷനുകള്‍ കൂടിച്ചേര്‍ന്ന് മൊത്തം 64 ആയി ഉയര്‍ന്നു. വരാനിരിക്കുന്ന ബ്ലൂ ലൈന്‍ ശൃംഖലയിലേക്ക് 14 പുതിയ സ്റ്റേഷനുകള്‍ കൂടി വരുന്നതോടെ ആകെ സ്‌റ്റേഷനുകളുടെ എണ്ണം 78 ആകും.

Dubai announces plans to construct the world’s tallest metro station, reinforcing its global leadership in innovative infrastructure and urban transit development.