എല്ലാ വീടുകളിലും ബ്രഡ് വാങ്ങുകയോ അല്ലെങ്കില്‍ ഉണ്ടാക്കുകയോ ചെയ്യാറുണ്ട്. വളരെ ഉപയോഗപ്രദമാണ് നമുക്ക് ബ്രഡ്. പെട്ടെന്ന് വിശന്നു കഴിഞ്ഞാല്‍ ബ്രെഡാണ് ആദ്യം ഓര്‍മവരുകയും കഴിക്കുകയും ചെയ്യുക. അപ്പോള്‍ വീടുകളില്‍  ബാക്കിവരുന്ന പഴകിയ ബ്രഡുകള്‍ ഉണ്ടാവുന്നതും സാധാരണം. 

എന്നാല്‍ ബ്രെഡ് പഴയതോ കാലാവധി കഴിഞ്ഞതോ ആണെങ്കില്‍ നമ്മള്‍ അത് വലിച്ചെറിയുകയാണ് പതിവ്. പഴകിയ ബ്രഡ് കൊണ്ട് ചില പണികളുണ്ട്. ഇതറിഞ്ഞാല്‍ നിങ്ങള്‍ ബ്രെഡ് വലിച്ചെറിയുന്നത് നിര്‍ത്തും. കാരണം ഇത് നിങ്ങളുടെ ജോലി എളുപ്പമാക്കുകയും പണം ലാഭിക്കുകയും ചെയ്യുന്നു.

വസ്ത്രങ്ങളിലെ എണ്ണക്കറ

നിങ്ങളുടെ വസ്ത്രങ്ങളിലെ എണ്ണക്കറകള്‍ കഠിനമായവയാണെങ്കിലോ അത് പോകുന്നില്ലെങ്കിലോ നിങ്ങള്‍ക്ക് അവ നീക്കം ചെയ്യാന്‍ വളരെ ബുദ്ധിമുട്ടായിരിക്കും. അതുകൊണ്ട് തന്നെ വസ്ത്രങ്ങളില്‍ കറ പ്രത്യക്ഷപ്പെട്ടാല്‍ ഉടന്‍ ഒരു പഴകിയ ബ്രെഡിന്റെ കഷണം എടുത്ത് ആ ഭാഗത്ത് അമര്‍ത്തി ഉരസുക. ബ്രെഡിന് വസ്ത്രങ്ങളിലുള്ള എണ്ണ ആഗിരണം ചെയ്യുകയും എണ്ണക്കറയുടെ കനം കുറഞ്ഞതായി മാറുകയും ചെയ്യും. തുടര്‍ന്ന് ബേക്കിങ് സോഡ ചേര്‍ത്ത് കഴുകിയാല്‍ തിളങ്ങും.

പോളിഷ് പിച്ചള -ചെമ്പ് പാത്രങ്ങള്‍

ബ്രെഡില്‍ ഉപ്പും നാരങ്ങയും ചേര്‍ത്ത് പിച്ചള, ചെമ്പ് പാത്രങ്ങള്‍ പോളിഷ് ചെയ്യാവുന്നതാണ്. ബ്രെഡ് പൊടിച്ചെടുത്ത് ഉപ്പും നാരങ്ങയും ചേര്‍ത്ത് പേസ്റ്റായും ഉപയോഗിക്കാം. ഇതും പരീക്ഷിക്കാവുന്നതാണ്.

കണ്ണാടി 

ജനലുകളുടെയും വാതിലുകളുടെയും ഗ്ലാസ് വൃത്തിയാക്കണമെങ്കില്‍ പഴകിയ ബ്രെഡ് എടുത്ത് അതില്‍ തേച്ചുപിടിപ്പിച്ച് വൃത്തിയാക്കാവുന്നതാണ്. ചുരുങ്ങിയ സമയത്തിനുള്ളില്‍ ഗ്ലാസിലെ പൊടിയും കറയും നീക്കം ചെയ്യപ്പെടും. ബ്രെഡിലടങ്ങിയ സ്റ്റാര്‍ച്ച് വൃത്തിയാക്കാന്‍ സഹായിക്കുന്നവയാണ്.

ക്രയോണുകളും കളര്‍ സ്റ്റെയിനും

സ്‌കെച്ച് പേന, കളര്‍, ക്രയോണ്‍ എന്നിവ ഉപയോഗിച്ച് കുട്ടികള്‍ വീടിന്റെ ചുവരുകളില്‍ വരച്ചിടാറുണ്ട്. അവ വൃത്തിയാക്കാനും ഒരു കഷണം ബ്രെഡില്‍ ബേക്കിങ് സോഡ തേച്ചാല്‍ ഭിത്തി നിങ്ങള്‍ക്ക് പൂര്‍ണമായും വൃത്തിയാക്കാവുന്നതാണ്.

സുഗന്ധവ്യഞ്ജന പെട്ടികളില്‍ നിന്നോ ജാറുകളിലോ ഈര്‍പ്പമുണ്ടെങ്കില്‍ 

അല്ലെങ്കില്‍ പറ്റിപ്പിടിച്ചിരിക്കുന്നുണ്ടെങ്കില്‍ അത് വൃത്തിയാക്കാനും ബ്രെഡ് സഹായിക്കും. സുഗന്ധവ്യഞ്ജന പാത്രത്തില്‍ ഒരു ചെറിയ കഷണം ബ്രെഡ് ഇടുക. ഈ ബ്രഡ് ഈര്‍പ്പം ആഗിരണം ചെയ്യുന്നതാണ്.