തൃശൂർ: ഭാര്യയെ കഴുത്ത് ഞെരിച്ച് ശ്വാസം മുട്ടിച്ച് കൊലപ്പെടുത്തി ഭർത്താവ്. വരന്തരപ്പിള്ളിയിൽ വാടകവീട്ടിൽ താമസിക്കുന്ന കുഞ്ഞുമോന്റെ (40) ഭാര്യ ദിവ്യ (36) ആണ് മരിച്ചത്. നെഞ്ചുവേദനയെ തുടർന്നാണ് ഭാര്യ മരിച്ചതെന്ന് കുഞ്ഞുമോൻ ബന്ധുക്കളെ അറിയിച്ചിരുന്നു. എന്നാൽ, ഇൻക്വസ്റ്റ് നടപടികൾക്കിടെ മൃതദേഹത്തിൽ പാടുകൾ കണ്ടതിനെ തുടർന്ന് സംശയം തോന്നിയ പൊലീസ് വിശദമായ അന്വേഷണം ആരംഭിക്കുയായിരുന്നു. പൊലീസിന്റെ വിശദമായ ചോദ്യം ചെയ്യലിൽ കുഞ്ഞുമോൻ കുറ്റം സമ്മതിക്കുകയായിരുന്നു.

ദിവ്യ ജോലി ചെയ്തിരുന്ന തുണിക്കടയിലെ ജീവനക്കാരനുമായി ബന്ധമുണ്ടെന്ന സംശയം കുഞ്ഞുമോനുണ്ടായിരുന്നതായി പൊലീസ് പറയുന്നു. ഇതുമായി ബന്ധപ്പെട്ട തർക്കമാണ് കൊലപാതകത്തിലേക്ക് നയിച്ചതെന്നാണ് നി​ഗമനം.

ജോലി ചെയ്യുന്ന തുണിക്കടയിലേക്ക് ദിവ്യ ബസിലാണ് പോകാറുണ്ടായിരുന്നത്. ദിവ്യയ്ക്ക് മറ്റൊരു യുവാവുമായി സൗഹൃദമുണ്ടെന്ന സംശയത്തിൽ കുഞ്ഞുമോൻ ഭാര്യയെ പിന്തുടർന്നിരുന്നു. ഒരു ദിവസം, ജോലിക്ക് പോകവേ ദിവ്യ ബസിൽ നിന്നിറങ്ങി ഒരു യുവാവിന്റെ ബൈക്കിൽ കയറിപ്പോകുന്നത് കുഞ്ഞുമോൻ കണ്ടു. ഇതേക്കുറിച്ചുള്ള വഴക്കാണ് കൊലപാതകത്തിന് കാരണമായതെന്ന് പൊലീസ് സംശയിക്കുന്നു.

ALSO READ: ഒമ്പത് മാസം പ്രായമുള്ള കുഞ്ഞിന്റെ ശ്വാസനാളത്തിൽ എൽഇഡി ബൾബ്; ശസ്ത്രക്രിയയിലൂടെ പുറത്തെടുത്തു

ഫൊറൻസിക്, വിരലടയാള വിദഗ്ധർ സംഭവസ്ഥലത്തെത്തി തെളിവുകൾ ശേഖരിച്ചു. മൃതദേഹം പോസ്റ്റ്മോർട്ടത്തിനായി തൃശൂർ മെഡിക്കൽ കോളജ് ആശുപത്രിയിലേക്ക് മാറ്റി. പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകും. ദമ്പതികൾക്ക് 11 വയസുള്ള ഒരു മകനുണ്ട്. കുഞ്ഞുമോനെതിരെ കൊലക്കുറ്റത്തിന് കേസെടുക്കുമെന്ന് പൊലീസ് അറിയിച്ചു. പ്രതിയെ വിശദമായി ചോദ്യം ചെയ്തുവരികയാണ്.