മേപ്പാടി(വയനാട്): മുണ്ടക്കൈ ഗ്രാമത്തിന്റെയും അവിടുത്തെ തങ്ങളുടെ പ്രിയപ്പെട്ട അക്ഷരമുറ്റത്തിന്റെയും ഭംഗി അശ്വതി ടീച്ചറുടെ മനസിൽ നിന്ന് ഇന്നും മാഞ്ഞുപോയിട്ടില്ല. 2024 ജൂലൈ 30ന് അർധരാത്രിയിൽ വെള്ളൊലിപ്പാറയിൽ നിന്ന് ഉരുൾ പുന്നപ്പുഴയിലൂടെ കുത്തിയൊലിച്ച് ഒഴുകിപ്പോയപ്പോഴാണ് ടീച്ചറുടെയും മറ്റ് അധ്യാപകരുടെയും പ്രിയപ്പെട്ട വിദ്യാലയം അനാഥമായത്. ഒപ്പം അവരുടെ പ്രിയപ്പെട്ട പല കുട്ടികളും ഇല്ലാതായി.

 ആ കണ്ണീരിന്റെ ഓർമ്മകൾ ഇന്നും സ്‌കൂളിലെ അധ്യാപകരെയെല്ലാം അലട്ടുന്നുണ്ട്. അപ്പോഴും അവർ തങ്ങളുടെ പ്രിയപ്പെട്ട വിദ്യാലയത്തിന്റെ ഉയർത്തെഴുന്നേൽപ്പിനായി കൊതിച്ചിരുന്നു. ഒടുവിൽ മേപ്പാടി പഞ്ചായത്ത് കമ്മ്യൂണിറ്റി ഹാളിൽ പുതുപ്രതീക്ഷകളുയർത്തി സ്‌കൂൾ പുനരാരംഭിച്ചപ്പോൾ ആ വർഷം സ്ഥലംമാറ്റം കിട്ടിപ്പോയ അശ്വതി ടീച്ചർ അത് റദ്ദാക്കി വീണ്ടും സ്‌കൂളിലെത്തി. 

തന്റെ പ്രിയപ്പെട്ട കുട്ടികൾക്ക് കരുത്ത് പകരുക എന്നതായിരുന്നു ആ വരവിന്റെ ഉദ്ദേശം. വർഷം ഒന്നിലേക്ക് അടുക്കുമ്പോൾ ടീച്ചർ സ്‌കൂളിനോടുള്ള സ്‌നേഹം ഒന്നുകൂടി ഊട്ടിയുറപ്പിച്ചത്, തനിക്ക് ഒരുപാട് മക്കളെ തന്ന മുണ്ടക്കൈ സ്‌കൂളിൽ തന്റെ മക്കളെയും കൂടി ചേർത്താണ്. കൽപ്പറ്റ എമിലിയിൽ താമസിക്കുന്ന ടീച്ചറുടെ രണ്ട് മക്കളും പഠിച്ചിരുന്നത് കൽപ്പറ്റ ഗവ.എൽ.പി സ്‌കൂളിലായിരുന്നു. 

ഇവിടെ നിന്നും 10 കിലോമീറ്ററിൽ അധികമുണ്ട് മേപ്പാടിക്ക്. എന്നാൽ മുണ്ടക്കൈ സ്‌കൂളിനോടുള്ള പ്രിയം ഒന്നുകൊണ്ട് മാത്രം യാത്രാക്ലേശങ്ങളെല്ലാം മറന്ന് ടീച്ചർ തന്റെ രണ്ട് മക്കളെയും അവിടെ ചേർത്തു. ഒരു വർഷം മുൻപ് ഉരുളിന്റെ ഭീതി അതിജീവിച്ച കുട്ടികളുടെ വിളികേട്ട് തിരികെയെത്തിയ ടീച്ചർ സ്‌കൂളിൽ തന്റെ കുട്ടികളെയും ചേർത്തത് ഏറെ അഭിമാനത്തോടെയാണ് കാണുന്നത്. 

മൂത്ത മകൾ അദ്രിക ലക്ഷ്മി മൂന്നാം തരത്തിലും അനുജൻ അദ്രിനാഥ് യു.കെ.ജിയിലുമാണ് ചേർന്നത്. രണ്ടാംതരത്തിലെ അധ്യാപികയാണ് അശ്വതി. സ്‌കൂളിലെ അറബി അധ്യാപികയായ ഫൗസിയ ടീച്ചർ തന്റെ മകൾ ജന്ന ഫാത്തിമയെ എൽ.കെ.ജിയിൽ ചേർത്തും മുണ്ടക്കൈ സ്‌കൂളിന്റെ തിരിച്ചുവരവിന് കരുത്ത് പകരുന്നുണ്ട്.