ഒട്ടോവ: ഫലസ്തീനെ സ്വതന്ത്ര രാഷ്ട്രമായി അംഗീകരിക്കാന്‍ കാനഡ. സെപ്തംബറില്‍ ചേരുന്ന ഐക്യരാഷ്ട്രസഭയുടെ വാര്‍ഷിക സമ്മേളനത്തില്‍ ഇതുസംബന്ധിച്ച് ഔദ്യോഗിക പ്രഖ്യാപനം നടത്തുമെന്ന് കാനഡ പ്രധാനമന്ത്രി കാര്‍ണി അറിയിച്ചു.

'ദ്വിരാഷ്ട്ര പരിഹാരത്തിന് കാനഡ വളരെക്കാലമായി പ്രതിജ്ഞാബദ്ധമാണ്. ഇസ്‌റാഈല്‍ രാഷ്ട്രത്തോട് ചേര്‍ന്ന് സമാധാനത്തിലും സുരക്ഷയിലും ജീവിക്കുന്ന ഒരു സ്വതന്ത്രവും പ്രായോഗികവും പരമാധികാരവുമായ ഫലസ്തീന്‍ രാഷ്ട്രം.' കാര്‍ണി പറഞ്ഞു. 

ഐക്യരാഷ്ട്രസഭയുടെ 80-ാമത് ജനറല്‍ അസംബ്ലിയില്‍ പലസ്തീന്‍ സംസ്ഥാനത്തെ അംഗീകരിക്കാനാണ് കാനഡ ഉദ്ദേശിക്കുന്നതെന്നും അദ്ദേഹം കൂട്ടിച്ചേര്‍ത്തു. എന്നാല്‍ ഹമാസിന്റെ പിന്തുണയില്ലാതെ അടുത്ത വര്‍ഷം നടക്കാന്‍ പോകുന്ന ഫലസ്തീനിയന്‍ അതോറിറ്റി തെരഞ്ഞെടുപ്പ് ഉള്‍പ്പെടെയുള്ള കാര്യങ്ങള്‍ നിരീക്ഷിച്ചായിരിക്കും തുടര്‍നടപടികളെന്നും പ്രധാനമന്ത്രി മാര്‍ക്ക് കാര്‍ണി പറഞ്ഞു. ഫലസ്തീന്‍ രാഷ്ട്രത്തെ സൈനികവത്ക്കരിക്കില്ലെന്ന് ഫലസ്തീന്‍ അതോറിറ്റി പ്രസിഡന്റ് ഉറപ്പു നല്‍കിയിട്ടുണ്ടെന്നും അദ്ദേഹം കൂട്ടിച്ചേര്‍ത്തു.

ALSO READ: 'രാജകീയമായി അതിർത്തി കടക്കുന്നു മലയാളത്തിൻ്റെ ചിരട്ട '

ഇതോടെ ഫലസ്തീനെ സ്വതന്ത്ര രാഷ്ട്രമായി അംഗീകരിക്കുമെന്ന് അടുത്തിടെ പ്രഖ്യാപിക്കുന്ന മൂന്നാമത്തെ ജി 7 രാജ്യമായിരിക്കുകയാണ് കാനഡ. ആദ്യം ഫ്രാന്‍സും പിന്നാലെ ബ്രിട്ടണും സമാനമായ പ്രഖ്യാപനം നടത്തിയിരുന്നു.

ഗസ്സയില്‍ സ്ഥിതിഗതികള്‍ അതിവേഗം വഷളായിക്കൊണ്ടിരിക്കുകയാണെന്ന് കാര്‍ണി ചൂണ്ടിക്കാട്ടി. അതിവേഗം വഷളായിക്കൊണ്ടിരിക്കുന്ന ഈ മാനുഷിക ദുരന്തം തടയുന്നതില്‍ ഇസ്‌റാഈല്‍ സര്‍ക്കാര്‍ പരാജയപ്പെട്ടു. അക്രമത്തിന് പകരം സമാധാനം തെരഞ്ഞെടുക്കുന്നവര്‍ക്കൊപ്പം നില്‍ക്കണമെന്നും കാര്‍ണി തുറന്നടിച്ചു.

ഗസ്സയിലെ പട്ടിണി അടിയന്തരമായി പരിഹരിക്കണമെന്നും സാധാരണക്കാര്‍ ഇങ്ങനെ കൊല്ലപ്പെടുന്നത് അംഗീകരിക്കാനാവില്ലെന്നും ഫ്രഞ്ച് പ്രധാനമന്ത്രി ഇമ്മാനുവല്‍ മക്രോണും വ്യക്തമാക്കിയിരുന്നു.

Canadian Prime Minister Carney has announced that Canada will formally recognize Palestine as a sovereign state during the UN General Assembly in September. He reaffirmed Canada’s long-standing commitment to a two-state solution alongside Israel.