കുവൈത്ത് സിറ്റി : കുവൈത്തിൽ മദ്യം, മയക്കുമരുന്ന് പോലുള്ള ലഹരി കേസുകളിൽ പിടിയിലാകുന്ന പ്രതികളുടെയും അവരെ സഹായിക്കുന്ന സ്വദേശികളുടെയും ഉൾപ്പെടെ പേരും ചിത്രവും ഇനി പ്രശ്യപ്പെടുത്തും. സമൂഹത്തെ ലഹരിയിൽ നിന്ന് സംരക്ഷിക്കുന്നതിനുള്ള സാമൂഹികവും ധാർമ്മികവുമായ ഉത്തരവാദിത്തം നിറവേറ്റുന്നതിന്റെ ഭാഗമായാണ് ഈ അസാധാരണ നടപടിയെന്ന് കുവൈത്ത് ആഭ്യന്തര മന്ത്രാലയം ഔദ്യോഗിക വക്താവ് ബ്രിഗേഡിയർ ജനറൽ നാസർ ബു സുലൈബ് അറിയിച്ചു. സാധാരണ ഇത്തരം കേസുകളിൽ പിടിക്കപ്പെടുന്നവരുടെ സ്വകാര്യ വിവരങ്ങൾ മാധ്യമങ്ങൾക്ക് നൽകാറില്ല. അതിനാൽ പുതിയ നീക്കത്തെ "പാരമ്പര്യേതര നടപടി" എന്ന് ആണ് ഉദ്യോഗസ്ഥർ വിശേഷിപ്പിക്കുന്നത്.

പൊതുജനാരോഗ്യവും സാമൂഹിക സ്ഥിരതയും സംരക്ഷിക്കാനുള്ള മന്ത്രാലയത്തിന്റെ കടമയുമായി ഈ നടപടി യോജിക്കുന്നുവെന്ന് അദ്ദേഹം പറഞ്ഞു. പ്രാദേശികമായി മദ്യം നിർമ്മിക്കുന്നവർക്ക് ചില സ്വദേശികൾ പ്രതിമാസം 1,500 ദിനാർ (4.30 ലക്ഷം രൂപ) വരെ വാങ്ങി വീടുകൾ വാടകയ്ക്ക് നൽകുന്നതായി റിപ്പോർട്ടുകളുണ്ട്. ഇത്തരം വീടുകളിൽ നടക്കുന്ന നിയമവിരുദ്ധ പ്രവർത്തനങ്ങൾ ഉടമകൾ പലപ്പോഴും ശ്രദ്ധിക്കാറില്ല, പ്രത്യേകിച്ച് സാധാരണ താമസപ്രദേശങ്ങളിൽ സ്ഥിതി ചെയ്യുന്ന വീടുകളിൽ. ലഹരി കടത്തിനും അനധികൃത മദ്യനിർമ്മാണത്തിനും എതിരായ പോരാട്ടത്തിന്റെ ഭാഗമായി, നിയമവിരുദ്ധ പ്രവർത്തനങ്ങൾ നടക്കുന്ന സ്ഥലങ്ങളിലേക്ക് വീടുകൾ വാടകയ്ക്ക് നൽകുന്ന പൗരന്മാരുടെ വിവരങ്ങളും പ്രസിദ്ധീകരിക്കും- "നിയമങ്ങൾ-സംഖ്യകൾ-നേട്ടങ്ങൾ 2025" എന്ന തലക്കെട്ടിൽ ഗവൺമെന്റ് കമ്മ്യൂണിക്കേഷൻ സെന്ററിൽ ബുധനാഴ്ച സംപ്രേഷണം ചെയ്ത വീഡിയോ അവതരണത്തിലാണ് നാസർ ബു സുലൈബ് ഈ പരാമർശം നടത്തിയത്.

The names and pictures of suspects arrested in alcohol and drug cases in Kuwait, as well as those of the natives who assist them, will now be published in the media.