ഡൽഹി: ഡൽഹിയിൽ നിന്ന് റാഞ്ചിയിലേക്ക് പുറപ്പെട്ട എയർ ഇന്ത്യ വിമാനം സാങ്കേതിക തകരാർ സംശയിച്ച് ഡൽഹിയിൽ തിരിച്ചിറക്കി. തിങ്കളാഴ്ച വൈകുന്നേരം 4:25ന് ഡൽഹി ഇന്ദിര ഗാന്ധി അന്താരാഷ്ട്ര വിമാനത്താവളത്തിൽ നിന്ന് പറന്നുയർന്ന എ.ഐ 9695 വിമാനം വൈകുന്നേരം 6:20ന് റാഞ്ചിയിലെ ബിർസ മുണ്ട എയർപോർട്ടിൽ ഇറങ്ങേണ്ടതായിരുന്നു. എന്നാൽ, ടേക്കോഫിന് തൊട്ടുപിന്നാലെ വിമാനത്തിന് സാങ്കേതിക പ്രശ്നമുണ്ടെന്ന് പൈലറ്റിന് സംശയം തോന്നിയതിനെ തുടർന്ന് വിമാനം ഡൽഹിയിൽ തിരിച്ചിറക്കുകയായിരുന്നു.

ആവശ്യമായ സുരക്ഷാ പരിശോധനകൾ നടത്തി ക്ലിയറൻസ് ലഭിച്ച ശേഷം വിമാനം വീണ്ടും റാഞ്ചിയിലേക്ക് പുറപ്പെട്ടതായി എയർ ഇന്ത്യ അധികൃതർ അറിയിച്ചു. യാത്രക്കാർക്ക് ഉണ്ടായ അസൗകര്യത്തിൽ കമ്പനി ഖേദം പ്രകടിപ്പിച്ചു. സംഭവത്തിന്റെ കൂടുതൽ വിശദാംശങ്ങൾ എയർ ഇന്ത്യ വെളിപ്പെടുത്തിയിട്ടില്ല.

അതേ ദിവസം മറ്റൊരു സംഭവത്തിൽ, ഹോങ്കോങിൽ നിന്ന് ഡൽഹിയിലേക്ക് പുറപ്പെട്ട എയർ ഇന്ത്യയുടെ എ.ഐ 315 വിമാനവും സാങ്കേതിക തകരാർ സംശയിച്ച് ഹോങ്കോങിൽ തിരിച്ചിറക്കി. ഉച്ചയ്ക്ക് 12:16ന് (പ്രാദേശിക സമയം) മൂന്നര മണിക്കൂർ വൈകിയാണ് വിമാനം ഹോങ്കോങിൽ നിന്ന് പുറപ്പെട്ടത്. എന്നാൽ, അൽപദൂരം പറന്ന ശേഷം, സാങ്കേതിക പ്രശ്നം സംശയിച്ച് ഉച്ചയ്ക്ക് 1:00 മണിയോടെ (പ്രാദേശിക സമയം) വിമാനം ഹോങ്കോങ് വിമാനത്താവളത്തിൽ തിരിച്ചിറക്കി.

സംഭവവുമായി ബന്ധപ്പെട്ട കൂടുതൽ വിവരങ്ങൾ ലഭ്യമല്ലെങ്കിലും, യാത്രക്കാരുടെ സുരക്ഷ ഉറപ്പാക്കാൻ എല്ലാ നടപടികളും സ്വീകരിച്ചതായി എയർ ഇന്ത്യയും വിമാനത്താവള അധികൃതരും അറിയിച്ചു.

An Air India flight (AI 9695) from Delhi to Ranchi returned to Delhi’s Indira Gandhi International Airport on June 16, 2025, after a suspected technical fault shortly after takeoff at 4:25 PM. The aircraft underwent safety checks, received clearance, and resumed its journey. A separate Air India flight (AI 315) from Hong Kong to Delhi also returned to Hong Kong due to a similar issue. The company apologized for the inconvenience.