ഗസ്സ സിറ്റി: പട്ടിണിയാല്‍ മണ്ണ് വരെ വാരിത്തിന്നുന്നിടത്തു നിന്ന് ഭക്ഷണം കാണിച്ച് വിളിച്ച് കൊന്നൊടുക്കുക. ലോകത്ത് സമാനതകളില്ലാത്ത വിധം ക്രൂരമായി ഗസ്സയില്‍ വംശഹത്യ തുടരുകയാണ് ഇസ്‌റാഈല്‍. കഴിഞ്ഞ ദിവസം മുതല്‍ നടത്തിയ ആക്രമണങ്ങളില്‍ നൂറിലേറെ ഫലസ്തീനികളെയാണ് ഇസ്‌റാഈല്‍ കൊന്നൊടുക്കിയത്. 

ഖാന്‍ യൂനിസില്‍ ട്രക്കുകളില്‍ നിന്ന് സഹായം സ്വീകരിക്കാന്‍ ശ്രമിച്ച ജനക്കൂട്ടത്തിലേക്ക് ഇസ്‌റാഈലി ടാങ്കുകള്‍ വെടിയുതിര്‍ത്തായി ദൃക്സാക്ഷികള്‍ പറഞ്ഞതായി റോയിട്ടേഴ്സ് റിപ്പോര്‍ട്ട് ചെയ്തു. ഇസ്‌റാഈലി ടാങ്കുകള്‍, ഹെവി മെഷീന്‍ ഗണ്ണുകള്‍, ഡ്രോണ്‍ എന്നിവ ഉപയോഗിച്ച് ആക്രമണം അഴിച്ചുവിടുകയായിരുന്നു. 59 പേരാണ് ഇവിടെ കൊല്ലപ്പെട്ടതെന്നാണ് റിപ്പോര്‍ട്ട്.  221 പേര്‍ക്ക് പരുക്കേല്‍ക്കുകയും ചെയ്തുവെന്ന് ഫലസ്തീന്‍ ആരോഗ്യമന്ത്രാലയം അറിയിക്കുന്നു. ഇതില്‍ 20 പേരുടെ നില ഗുരുതരമാണെന്നും ഡോക്ടര്‍മര്‍ അറിയിച്ചു. കാറുകളിലും റിക്ഷകളിലും കഴുത വണ്ടികളിലുമാണ് പരുക്കേറ്റവരെ ആശുപത്രികളിലെത്തിച്ചത്. ചൊവ്വാഴ്ച 70ലേറെ പേര്‍ കൊല്ലപ്പെട്ടതായി റിപ്പോര്‍ട്ടുണ്ട്. 

ALSO READ: വാട്‌സ് ആപ് ഒഴിവാക്കാന്‍ ഇറാന്‍ ജനങ്ങള്‍ക്ക് നിര്‍ദ്ദേശം നല്‍കിയതായി റിപ്പോര്‍ട്ട്; നിര്‍ദ്ദേശം മെറ്റ വിവരങ്ങള്‍ ചോര്‍ത്തുന്നുവെന്ന ആശങ്കക്ക് പിന്നാലെ 

മെയിലാണ് ഗസ്സയില്‍ സഹായവിതരണം യു.എസ്-ഇസ്‌റാഈല്‍ പുനരാരംഭിച്ചത്. ഇതിന് പിന്നാലെ പലപ്പോഴായി ജനക്കൂട്ടത്തിന് നേരെ ഇസ്‌റഈല്‍ നടത്തിയ ആക്രമണങ്ങളില്‍ 300ലധികം പേര്‍ കൊല്ലപ്പെടുകയും 2000ത്തിലധികം പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. 

തിങ്കളാഴ്ച ഖാന്‍ യൂനിസിന് തെക്കുള്ള റഫയില്‍ സഹായകേന്ദ്രത്തില്‍ ഇസ്‌റാഈല്‍ നടത്തിയ വെടിവെപ്പില്‍ 38 പേരായിരുന്നു കൊല്ലപ്പെട്ടത്.

ഇസ്‌റാഈലിന്റെ നീചമായ നടപടിയെ യു.എന്‍ നിരവധി തവണ അപലപിച്ചിട്ടുണ്ട്. സഹായം തേടിയെത്തിയവരെ കൊന്നൊടുക്കുന്നത് അങ്ങേഅറ്റം അപലപനീയമാണെന്ന് യു.എന്‍ മേധാവി പറഞ്ഞു. 

അതിനിടെ, ഗസ്സയുടെ വിവിധ ഇടങ്ങളില്‍ നടന്ന വെടിവയ്പ്പിലും വ്യോമാക്രമണത്തിലും കുറഞ്ഞത് 14 പേരെങ്കിലും കൊല്ലപ്പെട്ടതായി ഡോക്ടര്‍മാര്‍ പറഞ്ഞു. ഇതോടെ ചൊവ്വാഴ്ച കൊല്ലപ്പെട്ടവരുടെ എണ്ണം 73 ആയി. 20 മാസത്തിലേറെയായി നടക്കുന്ന ഇസ്‌റാഈലി ആക്രമണങ്ങളില്‍ ആയിരക്കണക്കിന് കുട്ടികള്‍ ഉള്‍പ്പെടെ 55,362 പേര്‍ കൊല്ലപ്പെട്ടിട്ടുണ്ടെന്നാണ് ഗസ്സയിലെ ആരോഗ്യ വകുപ്പ് മന്ത്രാലയം വ്യക്തമാക്കുന്നത്.

In one of the deadliest assaults, Israel has killed over 100 Palestinians in Gaza, with witnesses reporting Israeli tanks firing at civilians seeking aid in Khan Younis. Hospitals are overwhelmed as casualties continue to rise.