പാലക്കാട്: ദേശീയ പതാകയ്‌ക്കെതിരെ വിവാദ പരാമർശവുമായി ബിജെപി മുൻ ദേശീയ കൗൺസിൽ അംഗം എൻ. ശിവരാജൻ. ഇന്ത്യൻ ദേശീയ പതാകയായ ത്രിവർണ പതാക മാറ്റി പകരം കാവിക്കൊടിയാക്കണമെന്ന് എൻ. ശിവരാജൻ പറഞ്ഞു. ഭാരതാംബ വിവാദത്തിൽ പ്രതികരിക്കുന്നതിനിടെയാണ് ശിവരാജന്റെ വിവാദ പരാമർശം ഉണ്ടായത്.

ദേശീയപതാകയായ ത്രിവർണ പതാകയ്ക്ക്  സമാനമായ പതാക ഉപയോഗിക്കുന്ന കോൺഗ്രസ്, എൻ.സി.പി ഉൾപ്പെടെയുള്ള രാഷ്ട്രീയ പാർട്ടികളുടെ പതാക നിരോധിക്കണമെന്നും ശിവരാജൻ പറഞ്ഞു. കോൺഗ്രസ് പച്ച പതാക ഉപയോഗിക്കട്ടെയെന്നും അദ്ദേഹം പറഞ്ഞു. ഇന്ത്യൻ ചരിത്രമറിയാത്ത പ്രതിപക്ഷ നേതാവ് രാഹുൽഗാന്ധിയും സോണിയാ ഗാന്ധിയും ഇറ്റാലിയൻ കൊടി ഉപയോഗിക്കട്ടെയെന്നും ശിവരാജൻ ആക്ഷേപിച്ചു.

ALSO READ: 'ഒടുവിൽ ദേശീയ പതാക പിടിച്ച് ബിജെപി'; ഭാരതാംബയുടെ ചിത്രത്തിൽ നിന്ന് ആർഎസ്എസ് കൊടിയും ഭൂപടവും മാറ്റി

സിപിഎം വേണമെങ്കിൽ പച്ചയും വെള്ളയും പതാക ഉപയോഗിക്കട്ടെയന്നും എൻ. ശിവരാജൻ പറഞ്ഞു. ഇതോടൊപ്പം വിദ്യാഭ്യാസ മന്ത്രി വി. ശിവൻകുട്ടിയെയും ബിജെപി നേതാവ് ആക്ഷേപിച്ചു. ശിവൻകുട്ടിയെ ശവൻകുട്ടി എന്ന് വിളിച്ചാണ് ശിവരാജൻ ആക്ഷേപിച്ചത്. 

ഭാരതാംബ വിവാദത്തിൽ ബിജെപി നടത്തിയ പ്രതിഷേധ പരിപാടിയിലെ പുഷ്പാർച്ചനയ്ക്കുശേഷമായിരുന്നു പാലക്കാട് നഗരസഭാ കൗൺസിലർകൂടിയായ ശിവരാജന്റെ പ്രതികരണം. പാലക്കാട് കോട്ടമൈതാനത്താണ് ബിജെപിയുടെ പുഷ്പാർച്ചനയും പ്രതിഷേധ പരിപാടിയും നടന്നത്. ആർഎസ്എസിന്റെ കാവി കൊടി പിടിച്ച ഭാരതാംബയുടെ ചിത്രത്തിലായിരുന്നു പുഷ്പാർച്ചന നടന്നത്.

Former BJP National Council member N. Shivarajan has stirred controversy with a remark against the national flag. He stated that the Indian national flag, the Tricolour, should be replaced with the saffron flag. Shivarajan made the controversial statement while commenting on the ongoing Bharat Mata controversy.