ന്യൂഡൽഹി: തെരഞ്ഞെടുപ്പ് കമ്മീഷനെതിരെ വീണ്ടും രൂക്ഷ വിമർശനവുമായി പ്രതിപക്ഷ നേതാവ് രാഹുൽ ഗാന്ധി. ചോദ്യങ്ങൾക്ക് ഉത്തരം നൽകുന്നതിന് പകരം, തെരഞ്ഞെടുപ്പിന്റെ സിസിടിവി, വെബ്കാസ്റ്റിംഗ്, വീഡിയോ ദൃശ്യങ്ങൾ നശിപ്പിക്കാൻ കമ്മീഷൻ ഉദ്യോഗസ്ഥർക്ക് നിർദേശം നൽകിയെന്ന് അദ്ദേഹം ആരോപിച്ചു. 'മാച്ച് ഫിക്സ്ഡ്' ആണെന്നും, തെരഞ്ഞെടുപ്പുകൾ മുൻകൂട്ടി നിശ്ചയിച്ച് നടത്തുന്നതാണെന്നും, ഭാവിയിലും അട്ടിമറികൾ ഉണ്ടാകാമെന്നും രാഹുൽ ഗാന്ധി ആശങ്ക പ്രകടിപ്പിച്ചു.

മെയ് 30ന് തെരഞ്ഞെടുപ്പ് കമ്മീഷൻ സംസ്ഥാന മുഖ്യ ഇലക്ടറൽ ഓഫീസർമാർക്ക് അയച്ച കത്തിൽ, 45 ദിവസത്തിന് ശേഷം തെരഞ്ഞെടുപ്പിന്റെ സിസിടിവി, വെബ്കാസ്റ്റിംഗ്, വീഡിയോ ദൃശ്യങ്ങൾ നശിപ്പിക്കാൻ നിർദേശിച്ചു. ഇലക്ട്രോണിക് ഡേറ്റ വഴിയുള്ള ദുരുപയോഗം തടയാനാണ് ഈ നടപടിയെന്നാണ് വിശദീകരണം. ജനപ്രാതിനിധ്യ നിയമപ്രകാരം, തെരഞ്ഞെടുപ്പ് ഫലത്തിനെതിരെ 45 ദിവസത്തിനുള്ളിൽ പരാതി നൽകാത്തപക്ഷം ദൃശ്യങ്ങൾ നശിപ്പിക്കാമെന്നാണ് വ്യവസ്ഥ.

കഴിഞ്ഞ ഡിസംബറിൽ, സിസിടിവി ദൃശ്യങ്ങൾ പൊതുജനങ്ങൾക്ക് നൽകാനാവില്ലെന്ന് വ്യവസ്ഥകളിൽ ഭേദഗതി വരുത്തിയിരുന്നു. മഹാരാഷ്ട്ര നിയമസഭാ തെരഞ്ഞെടുപ്പിൽ അട്ടിമറി ആരോപണം ഉന്നയിച്ച് രാഹുൽ ഗാന്ധി പോളിംഗ് ബൂത്തുകളിലെ സിസിടിവി ദൃശ്യങ്ങൾ ആവശ്യപ്പെട്ടിരുന്നെങ്കിലും, കമ്മീഷൻ അത് നിഷേധിക്കുകയും വോട്ടർ പട്ടിക മാത്രം നൽകാമെന്ന് അറിയിക്കുകയും ചെയ്തു.

പുതിയ നിർദേശത്തിനെതിരെ രാഹുൽ ഗാന്ധി കടുത്ത വിമർശനം ഉന്നയിച്ചു. "സിസിടിവി ദൃശ്യങ്ങൾ ചോദിച്ചപ്പോൾ നിയമം മാറ്റി മറച്ചുവച്ചു. വോട്ടർ പട്ടിക ആവശ്യപ്പെട്ടപ്പോൾ നൽകിയില്ല. ഇപ്പോൾ ദൃശ്യങ്ങൾ നശിപ്പിക്കാനുള്ള നീക്കം. ഇത് ജനാധിപത്യത്തിന് വിഷമാണ്," അദ്ദേഹം കുറ്റപ്പെടുത്തി. വിവിപാറ്റ് സംബന്ധിച്ച പരാതികൾ പരിശോധിക്കാൻ രണ്ട് വർഷമായി കോൺഗ്രസ് ശ്രമിക്കുന്നുണ്ടെങ്കിലും, കമ്മീഷൻ സമയം നൽകുന്നില്ലെന്നും അവർ പരാതിപ്പെട്ടു.

Rahul Gandhi has accused the Election Commission of destroying evidence by ordering the deletion of CCTV, webcasting, and video footage 45 days after elections, claiming it indicates "match fixing." He criticized the EC for refusing to share CCTV footage and voter lists, especially after alleging rigging in the Maharashtra Assembly elections. The EC's May 30 directive allows footage destruction if no complaints are filed within 45 days, per the Representation of the People Act. Gandhi warns such actions threaten democracy.