തെഹ്‌റാൻ: ഇസ്റാഈൽ ഇറാന്റെ ആണവ കേന്ദ്രങ്ങൾക്ക് നേരെ തുടർച്ചയായ ആക്രമണങ്ങൾ നടത്തുന്നത് ആണവ ചോർച്ചയ്ക്ക് കാരണമായാൽ, അതിനെ നേരിടാൻ പൂർണ സജ്ജമാണെന്ന്  ഇറാൻ ഡെപ്യൂട്ടി ആരോഗ്യ മന്ത്രി അലി ജാഫരിയൻ. ഇസ്റാഈൽ പാരമ്പര്യേതര ആയുധങ്ങൾ ഉപയോഗിച്ചതിന് തെളിവില്ലെങ്കിലും, എല്ലാ അടിയന്തര സാഹചര്യങ്ങൾക്കും തയ്യാറാണെന്ന് അദ്ദേഹം വ്യക്തമാക്കി.

"ആണവ റിയാക്ടറുകൾക്ക് നേരെ ആക്രമണം നടന്നാൽ, അതിന്റെ പ്രത്യാഘാതങ്ങൾ നേരിടാൻ ഞങ്ങൾ സജ്ജരാണ്. എന്നാൽ, അത്തരമൊരു സാഹചര്യം ഉണ്ടാകില്ലെന്നാണ് ഞങ്ങളുടെ പ്രതീക്ഷ," ജാഫരിയൻ പറഞ്ഞു.

ആശുപത്രികൾക്ക് നേരെ ആക്രമണം: 430 മരണം

ഇസ്റാഈലിന്റെ ആക്രമണങ്ങളിൽ മൂന്ന് ആശുപത്രികൾ തകർക്കപ്പെട്ടതായും കെർമാൻഷായിലെ ആശുപത്രി പൂർണമായി ഒഴിപ്പിച്ചതായും ജാഫരിയൻ അറിയിച്ചു. എട്ട് ദിവസത്തിനിടെ 430 സാധാരണക്കാർ കൊല്ലപ്പെടുകയും 3,500-ലധികം പേർക്ക് പരുക്കേൽക്കുകയും ചെയ്തു.

ഇറാനിലെ സിവിലിയൻ മനുഷ്യർക്കു നേരെ ഇസ്റാഈൽ നടത്തുന്ന ആക്രമണങ്ങളിൽ ലോകാരോഗ്യ സംഘടനയും അന്താരാഷ്ട്ര റെഡ് ക്രോസും ഇസ്റാഈലിനെതിരെ നടപടി എടുക്കണമെന്നും അതേസമയം ​ഗസ്സയിൽ ഒന്നര വർഷമായി അവർക്ക് ഒന്നും ചെയ്യാൻ കഴിഞ്ഞിട്ടില്ലയെന്നും" അദ്ദേഹം ആരോപിച്ചു.

ഇസ്റാഈൽ മനുഷ്യാവകാശ ലംഘനം: ഇറാന്റെ വിമർശനം

ഇസ്റാഈലിനെക്കാൾ അന്താരാഷ്ട്ര മനുഷ്യാവകാശ ലംഘനങ്ങൾ നടത്തിയ മറ്റൊരു രാജ്യവുമില്ലെന്ന് ഇറാൻ വിദേശകാര്യ മന്ത്രാലയ വക്താവ് എസ്മായിൽ ബഗായ് കുറ്റപ്പെടുത്തി. "തങ്ങളുടെ കുറ്റകൃത്യങ്ങൾക്ക് ശിക്ഷയിൽ നിന്ന് ഇസ്റാഈൽ എപ്പോഴും രക്ഷപ്പെട്ടിട്ടുണ്ട്," ഐആർഎൻഎ വാർത്താ ഏജൻസി റിപ്പോർട്ട് ചെയ്തു.

ഈ അനീതിക്കെതിരെ നിലകൊള്ളാൻ ഐക്യരാഷ്ട്രസഭയിലെ എല്ലാ അംഗരാജ്യങ്ങൾക്കും ഉത്തരവാദിത്തമുണ്ട്. ബലപ്രയോഗം നിരോധിക്കുന്നത് യുഎൻ ചാർട്ടറിന്റെ അടിസ്ഥാന തത്വമാണ്," ബഗായ് പറഞ്ഞു.