തെഹ്റാൻ: ഇറാനിലെ ബുഷെഹർ ആണവനിലയത്തിന് നേരെ ഇസ്റാഈൽ ആക്രമണം നടന്നാൽ ഫുകുഷിമ ദുരന്തത്തിന് സമാനമായ വൻ ആണവ അപകടം സംഭവിക്കാനുള്ള സാധ്യതയുണ്ടെന്ന് മുൻ ഐഎഇഎ ഇൻസ്പെക്ടറും സ്റ്റോക്ക്ഹോം ഇന്റർനാഷണൽ പീസ് റിസർച്ച് ഇൻസ്റ്റിറ്റ്യൂട്ടിലെ വിശിഷ്ട ഗവേഷകനുമായ റോബർട്ട് കെല്ലി മുന്നറിയിപ്പ് നൽകി. രണ്ട് വൻ റിയാക്ടറുകൾ ഉൾക്കൊള്ളുന്ന ബുഷെഹർ സൗകര്യത്തിൽ ഒരെണ്ണം ഇപ്പോഴും നിർമാണത്തിലാണ്.

ഒരു ബോംബ് ആക്രമണമോ തണുപ്പിക്കൽ സംവിധാനങ്ങളുടെ തകരാറോ ഉണ്ടായാൽ, ഫുകുഷിമയിലേതിന് സമാനമായ ഒരു ദുരന്തം ഉണ്ടാകാം. റിയാക്ടർ ഉരുകി, ചെറിയ അളവിൽ വിഷവാതകം പരിസ്ഥിതിയിലേക്ക് പുറന്തള്ളപ്പെടാം," കെല്ലി അൽ ജസീറയോട് വ്യക്തമാക്കി. ഫുകുഷിമയിൽ ആരും മരിച്ചില്ലെന്നും വികിരണം വ്യാപകമായി പടർന്നില്ലെന്നും അദ്ദേഹം ചൂണ്ടിക്കാട്ടി.

ALSO READ: ഇറാൻ ആണവ കേന്ദ്രങ്ങൾ ലക്ഷ്യമിട്ട് യുഎസ് നീക്കം? ദേശീയ സുരക്ഷാ കൗൺസിൽ യോഗത്തിൽ പങ്കെടുക്കാൻ ഒരുങ്ങി ഡൊണാൾഡ് ട്രംപ്

ബുഷെഹർ ഒരു പട്ടണം കൂടിയാണ്. ആക്രമണം നടന്നാൽ അത് റിയാക്ടർ മാത്രം ലക്ഷ്യമാക്കിയുള്ളതാകണമെന്നില്ല," അദ്ദേഹം വിശദീകരിച്ചു. റഷ്യൻ നിർമിതമായ ബുഷെഹർ പ്ലാന്റിന്റെ രണ്ട് റിയാക്ടറുകൾക്ക് നേരെ ആക്രമണം നടന്നാൽ, റഷ്യയ്ക്കും പ്രത്യാഘാതങ്ങൾ നേരിടേണ്ടിവരുമെന്ന് കെല്ലി മുന്നറിയിപ്പ് നൽകി.

ഹൂതികളുടെ മുന്നറിയിപ്പ്

ഇറാനെതിരായ ഇസ്റാഈൽ ആക്രമണങ്ങളിൽ അമേരിക്ക ഇടപെട്ടാൽ, ചെങ്കടലിൽ യുഎസ് കപ്പലുകളെ ലക്ഷ്യമിടുമെന്ന് യമനിലെ ഹൂതി വിമതർ മുന്നറിയിപ്പ് നൽകി. "സയണിസ്റ്റ് ആക്രമണങ്ങൾക്കെതിരെ" ഉറച്ച നിലപാട് സ്വീകരിക്കുമെന്ന് ഹൂതി സൈനിക വക്താവ് യമൻ സ്റ്റേറ്റ് മീഡിയയോട് വ്യക്തമാക്കി.

​ഗസ്സയിലെ ഫലസ്തീനികളെ പിന്തുണയ്ക്കുന്നുവെന്ന് അവകാശപ്പെടുന്ന ഹൂതികൾ, 2023 മുതൽ ഇസ്റാഈലിനെതിരെ ആക്രമണങ്ങളും ചെങ്കടലിലെ കപ്പൽ ഗതാഗതത്തിനെതിരെ നീക്കങ്ങളും ആരംഭിച്ചിട്ടുണ്ട്. 2024 മെയിൽ യുഎസും ഹൂതികളും പരസ്പരം ആക്രമിക്കാതിരിക്കാൻ വെടിനിർത്തൽ കരാറിൽ ഒപ്പുവെച്ചിരുന്നു.