ന്യൂഡൽഹി: ഓപ്പറേഷൻ സിന്ധുവിവിന്റെ ഭാഗമായി നേപ്പാൾ, ശ്രീലങ്ക രാജ്യങ്ങളിൽ നിന്നുള്ള പൗരന്മാരെ കൂടി ഉൾപ്പെടുത്തുമെന്ന് ടെഹ്‌റാനിലെ ഇന്ത്യൻ എംബസി ശനിയാഴ്ച അറിയിച്ചു. ഇരു രാജ്യത്തെയും സർക്കാരുകളുടെ ഔപചാരിക അഭ്യർത്ഥനകളെത്തുടർന്നാണ് നടപടി. ഇസ്‌റാഈൽ - ഇറാൻ സംഘർഷം തുടർച്ചയായ ഒമ്പതാം ദിവസത്തിലേക്ക് കടക്കുന്നതിനിടെയാണ് ഈ തീരുമാനം.

ഇറാനിലിയും ഇസ്‌റാഈലിലെയും സ്ഥിതിഗതികൾ വഷളാകുന്നതിനിടയിൽ ഇന്ത്യൻ പൗരന്മാരെ സുരക്ഷിത സ്ഥലങ്ങളിലേക്ക് മാറ്റുന്നതിനായി ഇന്ത്യൻ സർക്കാർ ആരംഭിച്ച ഒഴിപ്പിക്കൽ ദൗത്യമാണ് ഓപ്പറേഷൻ സിന്ധു.  ഇതുവരെ, പ്രത്യേക വിമാനങ്ങളിലൂടെയും അതിർത്തി നീക്കങ്ങളിലൂടെയും 517 ഇന്ത്യൻ പൗരന്മാരെ ഇരു രാജ്യങ്ങളിൽ നിന്നുമായി ഒഴിപ്പിച്ചു. മൊത്തം 1,000 ഇന്ത്യൻ പൗരന്മാരെ ഉടൻ തിരിച്ച് എത്തിക്കാനുള്ള ശ്രമങ്ങൾ തുടരുകയാണ്.

ALSO READ: താൻ ഒരു സമാധാനദൂതനാണ്, എന്നിട്ടും നൊബേൽ പുരസ്കാരം തനിക്ക് കിട്ടില്ലെന്ന് ട്രംപ്: "ജനങ്ങൾക്ക് എല്ലാം അറിയാം, അത് മതി"

ഇറാനിൽ നിന്ന് ഒഴിപ്പിക്കാൻ ആഗ്രഹിക്കുന്ന നേപ്പാളി, ശ്രീലങ്കൻ പൗരന്മാർ ഉടൻ തന്നെ എംബസിയെ അവരുടെ സമർപ്പിത ടെലിഗ്രാം ചാനൽ വഴിയോ അടിയന്തര ഹെൽപ്പ്‌ലൈൻ നമ്പറുകൾ വഴിയോ ബന്ധപ്പെടണമെന്ന് ഇന്ത്യൻ എംബസി അറിയിച്ചു.

അതേസമയം, രാജ്യത്ത് കുടുങ്ങിക്കിടക്കുന്ന ഇന്ത്യൻ വിദ്യാർഥികളെ ഒഴിപ്പിക്കുന്നതിനായി ഇറാൻ വ്യോമാതിർത്തി തുറന്നുകൊടുത്തു. വെള്ളിയാഴ്ച രാത്രിയും ശനിയാഴ്ചയും സർവീസ് നടത്താൻ നിശ്ചയിച്ചിരുന്ന മഷ്ഹാദിൽ നിന്ന് ന്യൂഡൽഹിയിലേക്കുള്ള മൂന്ന് പ്രത്യേക വിമാനങ്ങൾക്ക് ടെഹ്‌റാൻ അനുമതി നൽകിയതായി ഇന്ത്യൻ സർക്കാർ സ്ഥിരീകരിച്ചു. ഇറാനിയൻ, ഇസ്‌റാഈൽ സേനകൾ തമ്മിലുള്ള മിസൈൽ, ഡ്രോൺ ആക്രമണങ്ങൾ കാരണം ഇറാനിയൻ വ്യോമാതിർത്തി അടച്ചതിനാൽ മിക്ക അന്താരാഷ്ട്ര വിമാനക്കമ്പനികളും സർവീസ് നിർത്തിവെച്ചിരിക്കുകയാണ്.