വാഷിങ്ടൺ: എന്തെല്ലാം നേട്ടങ്ങൾ കൈവരിച്ചാലും തനിക്ക് സമാധാനത്തിനുള്ള നൊബേൽ പുരസ്കാരം ലഭിക്കില്ലെന്ന് യുഎസ് പ്രസിഡന്റ് ഡോണൾഡ് ട്രംപ്. ഇന്ത്യ-പാകിസ്ഥാൻ സംഘർഷം അവസാനിപ്പിച്ചുവെന്ന അവകാശവാദം ഇന്ത്യ തള്ളിയിട്ടും, ജനങ്ങൾക്ക് എല്ലാം അറിയാമെന്നും അത് തനിക്ക് മതിയെന്നും ട്രംപ് വ്യക്തമാക്കി.

ട്രംപിന്റെ ഈ പ്രസ്താവനയെ തുടർന്ന്, 2026ലെ നൊബേൽ സമാധാന പുരസ്കാരത്തിന് പാകിസ്ഥാൻ അദ്ദേഹത്തെ നോമിനേറ്റ് ചെയ്തു. ആണവായുധങ്ങളുള്ള ഇന്ത്യ-പാകിസ്ഥാൻ എന്നീ അയൽരാജ്യങ്ങൾ തമ്മിലുള്ള സംഘർഷം ലഘൂകരിക്കുന്നതിൽ ട്രംപ് നിർണായക പങ്ക് വഹിച്ചുവെന്ന് പാകിസ്ഥാൻ അവകാശപ്പെട്ടു. എക്സ് പ്ലാറ്റ്ഫോമിലെ ഒരു പോസ്റ്റിലൂടെയാണ് പാകിസ്ഥാൻ ട്രംപിന് നൊബേൽ പുരസ്കാരം നൽകണമെന്ന് ആവശ്യപ്പെട്ടത്.

നൊബേൽ പുരസ്കാരം "നാലോ അഞ്ചോ തവണ" തനിക്ക് ലഭിക്കേണ്ടതായിരുന്നുവെന്നും എന്നാൽ "ലിബറലുകൾക്ക്" മാത്രമേ അത് നൽകൂ എന്നും ട്രംപ് ആരോപിച്ചു. ഇന്ത്യ-പാക് വെടിനിർത്തൽ ഉൾപ്പെടെ, ഡെമോക്രാറ്റിക് റിപ്പബ്ലിക് ഓഫ് കോംഗോ-റുവാണ്ട സംഘർഷം അവസാനിപ്പിക്കുന്നതിന് യുഎസിന്റെയും ഖത്തറിന്റെയും മധ്യസ്ഥതയിൽ നടന്ന ചർച്ചകളിൽ താൻ പ്രധാന പങ്ക് വഹിച്ചുവെന്നും ട്രംപ് അവകാശപ്പെട്ടു. ഈ ചർച്ചകളുടെ ഫലമായി ഇരു രാജ്യങ്ങളും വെടിനിർത്തലിന് സമ്മതിച്ചതായും, തിങ്കളാഴ്ച കരാറിൽ ഒപ്പുവെക്കുമെന്നും ട്രംപ് ട്രൂത്ത് സോഷ്യൽ പ്ലാറ്റ്ഫോമിൽ പ്രഖ്യാപിച്ചു.

കോംഗോ-റുവാണ്ട സംഘർഷം പതിറ്റാണ്ടുകളായി ആയിരക്കണക്കിന് മരണങ്ങൾക്കും ലക്ഷക്കണക്കിന് ആളുകളുടെ പലായനത്തിനും കാരണമായിരുന്നു. ഇതിന് പുറമെ, സെർബിയ-കൊസോവോ, ഈജിപ്ത്-എത്യോപ്യ, റഷ്യ-യുക്രൈൻ, ഇസ്റാഈഈൽ-ഇറാൻ തുടങ്ങിയ സംഘർഷങ്ങൾ പരിഹരിക്കുന്നതിന് താൻ ശ്രമിച്ചിട്ടും നൊബേൽ പുരസ്കാരം ലഭിക്കില്ലെന്ന് ട്രംപ് പറഞ്ഞു.

താൻ ഒരു "സമാധാനദൂതനാണ്" എന്ന് സ്വയം വിശേഷിപ്പിച്ച ട്രംപ്, ഈ നേട്ടങ്ങൾ ജനങ്ങൾ തിരിച്ചറിയുന്നുണ്ടെന്നും അതാണ് തനിക്ക് പ്രധാനമായിരിക്കുന്നത് എന്നും കൂട്ടിച്ചേർത്തു.