ന്യൂഡല്‍ഹി: ഓപ്പറേഷന്‍ സിന്ധുവിന്റെ ഭാഗമായി ഇറാനില്‍ രണ്ട് മലയാളികള്‍ കൂടി തിരിച്ചെത്തി. ഇന്ന് വൈകുന്നേരം 7: 30 നാണ് കോഴിക്കോട് ഇരഞ്ഞിക്കല്‍ സ്വദേശി റഷീദ് മുതിരക്കതറമ്മേല്‍, മലപ്പുറം തിരൂര്‍ സ്വദേശി മുഹമ്മദ് ഇംതിയാസ് ചക്കാലയ്ക്കല്‍ എന്നിവരാണ് ഡല്‍ഹിയിലെത്തിയത്. ജോലി സംബന്ധമായ ആവശ്യങ്ങള്‍ക്കായാണ് ഇരുവരും ടെഹ്‌റാനില്‍ എത്തിയത്. 

രാത്രി 9.40 നുള്ള വിമാനത്തില്‍ റഷീദ് കണ്ണൂരിലേക്ക് പുറപ്പെടും. നാളെ പുലര്‍ച്ചെയുള്ള വിമാനത്തില്‍ മുഹമ്മദ് ഇംതിയാസ് കൊച്ചിയിലേക്കും മടങ്ങും. 

ഇറാന്‍, ഇസ്രാഈല്‍ സംഘര്‍ഷം രൂക്ഷമായ സാഹചര്യത്തിലാണ് ഇന്ത്യ ഓപ്പറേഷന്‍ സിന്ധു ദൗത്യത്തിന് ഒരുങ്ങിയത്. 4 ദിവസങ്ങളിലായി ഇതുവരെ 1428 ഇന്ത്യന്‍ പൗരന്‍മാരെയാണ് തിരികെ എത്തിയത്. മെഡിക്കല്‍ വിദ്യാര്‍ഥികളും, തീര്‍ഥാടകരുമാണ് മടങ്ങിയെത്തിയവരില്‍ അധികവും. 

ALSO READ: ഇറാന്‍-ഇസ്രാഈല്‍ സംഘര്‍ഷം; വ്യോമപാത അടച്ച് ഖത്തര്‍; വിമാനങ്ങള്‍ക്ക് നിരോധനം 

ഇസ്രാഈലിലുള്ള ഇന്ത്യക്കാരെ തിരിച്ചെത്തിക്കാനും നടപടികള്‍ ആരംഭിച്ചിട്ടുണ്ട്. ടെല്‍അവീവിലുള്ള ഇന്ത്യന്‍ എംബസിയുമായി ബന്ധപ്പെടണമെന്ന് വിദേശകാര്യ മന്ത്രാലയം അറിയിച്ചു. 

അതേസമയം പശ്ചിമേഷ്യയിൽ രൂക്ഷമാകുന്ന സംഘർഷങ്ങൾക്കിടെ പരസ്പര സഹകരണം ശക്തമാക്കാൻ ഒരുങ്ങി റഷ്യയും ഇറാനും. ഇറാനിലെ ആണവ കേന്ദ്രങ്ങൾക്കെതിരെ അമേരിക്ക നടത്തിയ ആക്രമണങ്ങളെ അപലപിച്ച് റഷ്യൻ പ്രസിഡന്റ് വ്ലാദിമിർ പുടിൻ പ്രതികരിച്ചു. ഇറാനെതിരെ ഒരു പ്രകോപനവുമില്ലാതെ നടത്തിയ ഈ ആക്രമണത്തിന് യാതൊരു ന്യായീകരണവുമില്ലെന്നും, ഇത്തരമൊരു നടപടിക്ക് അന്താരാഷ്ട്ര നിയമത്തിൽ സ്ഥാനമില്ലെന്നും പുടിൻ വ്യക്തമാക്കി.

അമേരിക്കൻ ആക്രമണത്തിന് പിന്നാലെ, ഇറാന്റെ വിദേശകാര്യമന്ത്രി അബ്ബാസ് അറാഗ്ചി റഷ്യയിലെത്തി പുടിനുമായും മറ്റ് ഉന്നത റഷ്യൻ നേതാക്കളുമായും ചർച്ചകൾ നടത്തി. ഇരുരാജ്യങ്ങളും തമ്മിലുള്ള ബന്ധം കൂടുതൽ ശക്തിപ്പെടുത്താനും, ആണവ സുരക്ഷയുടെ പേരിൽ നടക്കുന്ന ആക്രമണങ്ങൾക്കെതിരെ ഒരുമിച്ച് പ്രതികരിക്കാനും തീരുമാനമായതായി റഷ്യൻ മാധ്യമങ്ങൾ റിപ്പോർട്ട് ചെയ്തു.

Operation Sindhu Two More Malayalees Arrive in Delhi from Iran