ഹസക്ക: സിറിയയിലെ ഹസക്കയിൽ സ്ഥിതി ചെയ്യുന്ന അമേരിക്കൻ സൈനിക താവളത്തിന് നേരെ മിസൈൽ ആക്രമണം നടന്നതായി ഇറാൻ മാധ്യമങ്ങൾ റിപ്പോർട്ട് ചെയ്തു. വടക്കുകിഴക്കൻ സിറിയയിലെ ഹസക്കയുടെ വടക്കൻ ഭാഗത്തുള്ള അൽ ദാർബാസിയായിലെ യുഎസ് സൈനിക കേന്ദ്രത്തിന് സമീപം ഞായറാഴ്ച രാത്രി തിരിച്ചറിയാത്ത മിസൈലുകൾ കണ്ടെത്തിയതായാണ് ഇറാൻ മാധ്യമങ്ങൾ വ്യക്തമാക്കുന്നത്. രാത്രിയിൽ അജ്ഞാത ദിശയിൽ നിന്നെത്തിയ മിസൈലുകൾ ദൃശ്യമായിരുന്നുവെന്നും റിപ്പോർട്ടുകളുണ്ട്.

ALSO READ: ഇറാനിലെ ഫോർഡോ ആണവ കേന്ദ്രത്തിനു സമീപം ഇസ്റാഈൽ ആക്രമണം 

താവളത്തിൽ പതിക്കുന്നതിന് മുമ്പ് മിസൈലുകൾ നിർവീര്യമാക്കപ്പെട്ടതായാണ് പുറത്തുവരുന്ന വിവരം. യുഎസ് പ്രസിഡന്റ് ഡൊണാൾഡ് ട്രംപ് ഇറാനിലെ ആണവ കേന്ദ്രങ്ങൾ ആക്രമിച്ചതായി പ്രഖ്യാപിച്ചതിന് പിന്നാലെയാണ് ഈ ആക്രമണം നടന്നത്. എന്നാൽ, മിസൈൽ ആക്രമണത്തെക്കുറിച്ച് യുഎസ് സെൻട്രൽ കമാൻഡോ സിറിയൻ ഡെമോക്രാറ്റിക് ഫോഴ്സോ ഔദ്യോഗികമായി പ്രതികരിച്ചിട്ടില്ല. അമേരിക്കൻ സൈനിക താവളത്തിന് നേരെയുള്ള ആക്രമണത്തിന് പിന്നിൽ ഇറാനാണെന്ന് ഇറാനിലെ മെഹർ, ഫാർസ് ന്യൂസ് ഏജൻസികൾ റിപ്പോർട്ട് ചെയ്യുന്നു.

ALSO READ: ഇറാനിലെ സർക്കാർ, സൈനിക കേന്ദ്രങ്ങൾ ലക്ഷ്യമിട്ട് ഇസ്റാഈൽ വ്യോമാക്രമണം: കുപ്രസിദ്ധമായ എവിൻ ജയിലിന് നേരെയും ആക്രമണം

നേരത്തെ, ഏപ്രിൽ മാസത്തിൽ ഈ താവളത്തിൽ നിന്ന് അമേരിക്കൻ സൈനികരെ പിൻവലിച്ചതായി വാർത്തകൾ പ്രചരിച്ചിരുന്നു. ഇതിനിടെ, അമേരിക്കൻ ആക്രമണത്തിന് പിന്നാലെ ഇറാനിലെ ഫോർദോ ആണവനിലയത്തിന് നേരെ ഇസ്റാഈൽ വീണ്ടും ആക്രമണം നടത്തിയതായും റിപ്പോർട്ടുകളുണ്ട്. ഇറാന്റെ തലസ്ഥാനമായ ടെഹ്റാനിലെ എവിൻ ജയിലും ഇറാന്റെ ഔദ്യോഗിക ടെലിവിഷൻ ചാനലായ ഐആർഐബി (ഇറേനിയൻ സ്റ്റേറ്റ് ബ്രോഡ്കാസ്റ്റിംഗ്) നിലയവും ഇസ്റാഈൽ ആക്രമിച്ചതായി ഇറാൻ മാധ്യമങ്ങൾ റിപ്പോർട്ട് ചെയ്യുന്നു.