കൊച്ചി: ക്രിമിനൽ പശ്ചാത്തലമുള്ള ആളുകളെ നിരീക്ഷിക്കുന്നതിന്റെ ഭാഗമായി അർദ്ധരാത്രി പൊലിസ് വീടിന്റെ വാതിലിൽ മുട്ടി വിളിക്കരുതെന്ന ഉത്തരവുമായി ഹൈക്കോടതി. അർദ്ധരാത്രി വീടിന്റെ വാതിൽ മുട്ടി വിളിച്ച് പുറത്തേക്ക് വരാൻ പറയുന്നത് നിയമപരമായ നിർദേശമായി കാണാൻ ആകില്ലെന്നും ഇതിനുള്ള അധികാരം പൊലിസിനില്ലെന്നും കോടതി വ്യക്തമാക്കി.

പൊലിസ് രാത്രി വീട്ടിൽ എത്തി മുട്ടി വിളിച്ചിട്ടും പുറത്തു വരാത്തതിന്റെ പേരിൽ കേസെടുത്തു ചോദ്യം ചെയ്ത കൊച്ചി മുണ്ടംവേലി സ്വദേശിയായ പ്രശാന്ത് നൽകിയ ഹരജിയിലാണ് ഈ ഉത്തരവ്. ഇതിനു പിന്നാലെ തോപ്പുംപടി പൊലിസ് രജിസ്റ്റർ ചെയ്ത കേസിലെ തുടർനടപടികളും റദ്ദാക്കി. ഏപ്രിൽ മൂന്നിന് പുലർച്ചയായിരുന്നു പൊലിസ് പ്രശാന്തിന്റെ വീട്ടിലെത്തി വാതിലിൽ മുട്ടി പുറത്തേക്ക് വരാൻ ആവശ്യപ്പെട്ടത്. എന്നാൽ പുറത്തേക്ക് ഇറങ്ങാതെ പ്രശാന്ത് ഭീഷണിപ്പെടുത്തിയെന്ന് ആരോപിച്ചായിരുന്നു പൊലിസ് കേസ് രജിസ്റ്റർ ചെയ്തത്.

പ്രശാന്തിനെ ഇതിനുമുമ്പ് പോക്സോ കേസിൽ കോടതി കുറ്റവിമുക്തനാക്കിയിരുന്നു. തുടർന്ന് കേസ് രജിസ്റ്റർ ചെയ്ത പൊലിസിനെതിരെ സംസ്ഥാന പൊലിസ് മേധാവിക്ക് പരാതിയും നൽകിയിരുന്നു. ഇതിന്റെ വൈരാഗ്യം തീർക്കാനായി തന്നെ വിവിധതരത്തിൽ ദ്രോഹിക്കുകയാണ് എന്നാരോപിച്ചാണ് പ്രശാന്ത് ഹരജി നൽകിയത്.
ഓരോ ആളുകൾക്കും സ്വന്തം വീട് കൊട്ടാരമോ ക്ഷേത്രമോ ആയിരിക്കുമെന്നും അസ്ഥിത്വപരവും വൈകാരികവും സാമൂഹികവുമായ ഒട്ടേറെ ഘടകങ്ങൾ ചേർന്നതാണ് വീടെന്നും അന്തസ്സോടെ ജീവിക്കാൻ ഓരോരുത്തർക്കും അവകാശം ഉണ്ടെന്നും ജസ്റ്റിസ് വിജി അരുൺ പറഞ്ഞു.