പത്തനംതിട്ട: അഹമ്മദാബാദ് വിമാന ദുരന്തത്തിൽ മരിച്ച രഞ്ജിതയുടെ പൊതുദർശനവും സംസ്കാര ചടങ്ങുകളും നാളെ നടക്കുന്നതിനാൽ പത്തനംതിട്ട ജില്ലയിലെ രണ്ട് വിദ്യാലയങ്ങൾക്ക് അവധി പ്രഖ്യാപിച്ച് ജില്ലാ കളക്ടർ. പുല്ലാട് ശ്രീ വിവേകാനന്ദ ഹൈസ്കൂളിനും പുല്ലാട് വടക്കേകവല മോഡൽ യുപി സ്കൂളിനുമാണ് അവധി. രഞ്ജിതയുടെ മൃതദേഹം ഡിഎൻഎ പരിശോധനയിലൂടെ തിരിച്ചറിഞ്ഞു. മൃതദേഹം നാളെ രാവിലെ തിരുവനന്തപുരം വിമാനത്താവളത്തിൽ എത്തും.

അമ്മ തുളസിയുടെ ഡിഎൻഎ സാമ്പിളുമായി യോജിച്ചതിനെ തുടർന്നാണ് മൃതദേഹം തിരിച്ചറിഞ്ഞത്. നാളെ രാവിലെ 7 മണിക്ക് തിരുവനന്തപുരത്ത് മൃതദേഹം എത്തിച്ച ശേഷം, പുല്ലാട് ശ്രീ വിവേകാനന്ദ ഹൈസ്കൂളിൽ പൊതുദർശനത്തിന് വെക്കും. വൈകിട്ട് വീട്ടുവളപ്പിൽ സംസ്കാര ചടങ്ങുകൾ നടക്കും.

രഞ്ജിത, കേരളത്തിൽ സർക്കാർ ജോലിയിൽ പ്രവേശിക്കാൻ തയ്യാറെടുക്കവേയാണ് വിമാന അപകടത്തിൽ മരിച്ചത്. എട്ട് മാസമായി ബ്രിട്ടനിൽ നഴ്സായി ജോലി ചെയ്തിരുന്ന അവർ, സർക്കാർ ജോലിക്കുള്ള നടപടിക്രമങ്ങൾ പൂർത്തിയാക്കാൻ നാട്ടിലേക്ക് മടങ്ങുകയായിരുന്നു. ജൂലൈയിൽ ജോലിയിൽ പ്രവേശിക്കാനിരുന്ന രഞ്ജിത, ലണ്ടനിലെ ജോലിസ്ഥലത്ത് നിന്നുള്ള വിടുതൽ രേഖകൾ പൂർത്തിയാക്കാനാണ് യാത്ര ചെയ്തത്.

ഗോപകുമാരൻ നായർ-തുളസി ദമ്പതികളുടെ ഇളയ മകളായ രഞ്ജിത, പന്തളത്ത് നഴ്സിങ് ബിരുദം നേടിയ ശേഷം ഗുജറാത്തിലെ ആശുപത്രിയിൽ ജോലി ആരംഭിച്ചു. പിന്നീട് ഒമാനിലേക്കും, അവിടെ നിന്ന് ബ്രിട്ടനിലേക്കും ജോലി മാറി. അഞ്ച് വർഷം മുമ്പ് പത്തനംതിട്ട ജനറൽ ആശുപത്രിയിൽ സർക്കാർ ജോലി നേടിയെങ്കിലും, ദീർഘകാല അവധിയെടുത്ത് വിദേശത്തേക്ക് പോയി. രഞ്ജിതയ്ക്ക് പത്താം ക്ലാസ് വിദ്യാർഥിയായ മകൻ ഇന്ദുചൂഡനും ഏഴാം ക്ലാസ് വിദ്യാർഥിനിയായ മകൾ ഇതികയും അമ്മ തുളസിയുമാണ് ഉള്ളത്.