ന്യൂഡല്‍ഹി: ഇസ്രായേല്‍- ഇറാന്‍ സംഘര്‍ഷത്തിന്റെ ഭാഗമായി ഇന്ത്യ ആരംഭിച്ച ഓപറേഷന്‍ സിന്ധുവിന്റെ ഭാഗമായി ഇറാനില്‍ നിന്ന് ഇന്ത്യയിലേക്ക് തിരിച്ചെത്തിയവരില്‍ മലയാളിയും. ശനിയാഴ്ച പ്രത്യേക വിമാനത്തിലെ യാത്രസംഘത്തിലുള്ള ഏകമലയാളി വിദ്യാര്‍ഥിനി ഫാദില കച്ചക്കാരന്‍ ഡല്‍ഹിയില്‍ എത്തി.

മലപ്പുറം മുടിക്കോട് സ്വദേശി മുഹമ്മദിന്റെ മകളാണ് ഫാദില. സൗദിയില്‍ സിവില്‍ എഞ്ചിനിയീറായ പിതാവ് മുഹമ്മദിന്റെ കൂടെയാണ് ഡല്‍ഹിയില്‍ നിന്നു ഫാദില നാട്ടിലെത്തിയത്. ഇറാനില്‍ നിന്നും നാട്ടിലെത്തിയ സംഘത്തിലെ ആദ്യ മലയാളിയാണ് ഫാദില. മകള്‍ നാട്ടില്‍ വരുമ്പോള്‍ സ്വീകരിക്കാന്‍ ദമാമില്‍ നിന്ന് പിതാവ് മുഹമ്മദ് ഡല്‍ഹി വിമാനത്താവളത്തിലെത്തുകയായിരുന്നു.

ഇരുവരും ശനിയാഴ്ച രാത്രിയാണ് വിമാനത്തില്‍ കൊച്ചിയിലേക്ക് തിരിച്ചത്. തെഹ്‌റാനിലെ ഷാഹിദ് ബിഹിഷ്ഠി യൂണിവേഴ്‌സിറ്റി ഓഫ് മെഡിക്കല്‍ സയന്‍സസില്‍ എംബിബിഎസ് വിദ്യാര്‍ത്ഥിയാണ് ഫാദില. ഓപ്പറേഷന്‍ സിന്ധുവിന്റെ ഭാഗമായി രണ്ടാമത്തെ വിമാനമാണ് കഴിഞ്ഞ ദിവസം ഇന്ത്യയിലെത്തിയത്. 256 പേരാണ് സംഘത്തില്‍ ഉണ്ടായിരുന്നത്.

സംഘര്‍ഷം കടുത്തതോടെ ഒഴിപ്പിക്കല്‍ നടപടി വേഗത്തിലാക്കിയിരിക്കുകയാണ് ഇന്ത്യ. ഇന്ന് രണ്ട് വിമാനങ്ങളില്‍ 600 പേര്‍ കൂടി ഇന്ത്യയിലേക്കെത്തുന്നതാണ്. 800 പേരെ കൂടി ഉടന്‍ തിരിച്ചെത്തിക്കും. ഇറാനില്‍ നിന്ന് ഇതുവരെ 1,100 പേരെയാണ് തിരിച്ചെത്തിച്ചിരിക്കുന്നത്. ശ്രീലങ്ക -നേപ്പാള്‍ പൗരന്മാരുടെ പട്ടികയും ഇന്ത്യന്‍ എംബസി തയ്യാറാക്കിയിട്ടുണ്ട്. ഇന്ത്യന്‍ എംബസിയുമായി ബന്ധപ്പെടാന്‍ പൗരന്മാര്‍ക്ക് ശ്രീലങ്കയും നേപ്പാളും നിര്‍ദേശം നല്‍കിയിട്ടുമുണ്ട്.