ദോഹ: ഇറാന്‍-ഇസ്രാഈല്‍ സംഘര്‍ഷം തുടരുന്നതിനിടെ വ്യോമപാത അടച്ച് ഖത്തര്‍. താല്‍ക്കാലികമായാണ് വ്യോമഗതാഗതത്തിന് നിരോധനം ഏര്‍പ്പെടുത്തിയത്. മേഖലയിലെ സ്ഥിതിഗതികള്‍ സൂക്ഷ്മമായി നിരീക്ഷിക്കുകയാണെന്നും ഖത്തര്‍ വിദേശകാര്യ മന്ത്രാലയം അറിയിച്ചു. പൗരന്‍മാരുടെയും, പ്രവാസികളുടെയും, സന്ദര്‍ശകരുടെയും സുരക്ഷ കണക്കിലെടുത്താണ് നടപടിയെന്നും വിദേശ കാര്യ മന്ത്രാലയം അറിയിച്ചു. 

കൂടാതെ ഖത്തര്‍ നിവാസികള്‍ ഔദ്യോഗിക കേന്ദ്രങ്ങളില്‍ നിന്നുള്ള വിവരങ്ങള്‍ മാത്രം വിശ്വസിക്കണമെന്നും, ഫേക്ക് ന്യൂസുകളില്‍ നിന്ന് ജാഗ്രത പാലിക്കണമെന്നും ഭരണകൂടം അറിയിച്ചു. അമേരിക്ക ഇറാനില്‍ ആക്രമണം നടത്തിയതിന് പിന്നാലെയാണ് ആഭ്യന്തര സുരക്ഷ ശക്തമാക്കാന്‍ ഖത്തര്‍ തീരുമാനിച്ചത്.

ALSO READ: പൂരം കലക്കല്‍; മുന്നറിയിപ്പുണ്ടായിട്ടും ജാഗ്രത പുലര്‍ത്തിയില്ല; എംആര്‍ അജിത് കുമാറിന് ഗുരുതര വീഴച്ച പറ്റിയെന്ന് ഡിജിപിയുടെ അന്വേഷണ റിപ്പോര്‍ട്ട്

നിലവില്‍ അതീവ സുരക്ഷ പ്രതിസന്ധികള്‍ ഖത്തറിനില്ലെന്നും, മുന്‍കരുതല്‍ നടപടിയുടെ ഭാഗമായാണ് വ്യോമപാത അടച്ചതെന്നും ഖത്തര്‍ വിദേശകാര്യ മന്ത്രാലയം കൂട്ടിച്ചേര്‍ത്തു. എന്നാൽ നിരോധനം എന്ന് അവസാനിക്കുമെന്ന് റിപ്പോർട്ടിൽ വ്യക്തമാക്കിയിട്ടില്ല.

ഖത്തർ വിദേശകാര്യ മന്ത്രാലയ വക്താവ് ഡോ. മജീദ് ബിൻ മുഹമ്മദ് അൽ-അൻസാരി പറഞ്ഞതനുസരിച്ച്, രാജ്യത്തെ സുരക്ഷാ സ്ഥിതി സുസ്ഥിരമാണ്. പൗരന്മാർ, താമസക്കാർ, സന്ദർശകർ എന്നിവരുടെ സുരക്ഷ ഉറപ്പാക്കാൻ ആവശ്യമായ എല്ലാ നടപടികളും അധികൃതർ സ്വീകരിച്ചിട്ടുണ്ട്. ചില സ്ഥലങ്ങൾ ഒഴിവാക്കാനോ മുൻകരുതലുകൾ എടുക്കാനോ നൽകിയ ഉപദേശം, വിവിധ രാജ്യങ്ങൾ പിന്തുടരുന്ന പൊതു യാത്രാ മാർഗനിർദേശങ്ങളുടെ ഭാഗമാണെന്നും പ്രത്യേക ഭീഷണികളെ ഇത് പ്രതിഫലിപ്പിക്കുന്നില്ലെന്നും അദ്ദേഹം പറഞ്ഞു. 

മേഖലയിലെ സംഘർഷങ്ങൾ കുറയ്ക്കാനും പ്രാദേശിക സുരക്ഷയും സ്ഥിരതയും ഉറപ്പാക്കാനും ഖത്തർ നയതന്ത്ര ശ്രമങ്ങൾ സജീവമായി തുടരുകയാണ്. പ്രധാന പങ്കാളികളുമായും പ്രാദേശിക-അന്തർദേശീയ സഹകരണത്തിലൂടെയും ഈ ലക്ഷ്യം കൈവരിക്കാൻ ഖത്തർ പ്രതിജ്ഞാബദ്ധമാണെന്നും വക്താവ് നേരത്തെ വ്യക്തമാക്കിയിരുന്നു. 

Amid rising tensions between Iran and Israel, Qatar has temporarily closed its airspace, imposing restrictions on flight operations.