​

റോം: ​ഗസ്സയിൽ നിന്നുള്ള ദൈനംദിന ദുരന്തങ്ങൾ ലോകം മറക്കരുതെന്ന് ലിയോ മാർപ്പാപ്പ ലോകരാഷ്ട്രങ്ങളോട് അഭ്യർത്ഥിച്ചു. ഇസ്റാഈലിന്റെ തുടർച്ചയായ ആക്രമണങ്ങളിൽ നൂറുകണക്കിന് ഫലസ്തീനികൾ കൊല്ലപ്പെടുകയും പരുക്കേൽക്കുകയും ചെയ്യുന്ന സാഹചര്യത്തിൽ, ഇറാന്റെ ആണവകേന്ദ്രങ്ങളിൽ അമേരിക്ക നടത്തിയ ആക്രമണത്തെ തുടർന്ന്, ഇസ്റാഈൽ-ഇറാൻ സംഘർഷം രൂക്ഷമാകുന്നതിനിടെയാണ് റോമൻ കത്തോലിക്കാ സഭയുടെ തലവൻ ഈ ആഹ്വാനം നടത്തിയത്.

ഗസ്സയിലും മറ്റ് പ്രദേശങ്ങളിലും ജനങ്ങൾ അനുഭവിക്കുന്ന കഷ്ടപ്പാടുകൾ ലോകം വിസ്മരിക്കരുത്. മാനുഷിക സഹായത്തിന്റെ അടിയന്തര ആവശ്യകത വർധിച്ചുവരികയാണ്, തീർത്ഥാടകരോടൊപ്പമുള്ള കുർബാന പ്രാർത്ഥനയിൽ മാർപ്പാപ്പ പറഞ്ഞു. നയതന്ത്രം ആയുധങ്ങളെ നിശബ്ദമാക്കണം. രാഷ്ട്രങ്ങൾ സമാധാന ശ്രമങ്ങളിലൂടെ ഭാവി രൂപപ്പെടുത്തണം, അക്രമത്തിലൂടെയല്ല," അദ്ദേഹം കൂട്ടിച്ചേർത്തു.

​ഗസ്സയിൽ മാനുഷിക പ്രതിസന്ധി രൂക്ഷം; 29 പലസ്തീനികൾ കൊല്ലപ്പെട്ടു

ഗസ്സയിൽ ഇസ്റാഈൽ സൈന്യം തുടരുന്ന ആക്രമണങ്ങൾ മാനുഷിക പ്രതിസന്ധി കൂടുതൽ വഷളാക്കുന്നു. ഇന്ന് 29 ഫലസ്തീനികൾ കൊല്ലപ്പെട്ടതായി ഗസ്സ ആരോഗ്യ മന്ത്രാലയം അറിയിച്ചു. ഇതിൽ ആറ് പേർ സഹായം തേടുന്നതിനിടെ വെടിയേറ്റാണ് മരിച്ചതെന്ന് ആശുപത്രി വൃത്തങ്ങൾ അൽ ജസീറയോട് വ്യക്തമാക്കി. കഴിഞ്ഞ 24 മണിക്കൂറിനിടെ 51 പേർ കൊല്ലപ്പെട്ടതായും മന്ത്രാലയം പറഞ്ഞു.

2023 ഒക്ടോബർ 7ന് ഹമാസ് നടത്തിയ ആക്രമണത്തിൽ തടവിലാക്കപ്പെട്ട മൂന്ന് ഇസ്റാഈലികളുടെ മൃതദേഹങ്ങൾ ഗസ്സയിൽ നിന്ന് "പ്രത്യേക ഓപ്പറേഷനിൽ" ഇസ്റാഈൽ സൈന്യം കണ്ടെടുത്തു. ഓഫ്ര കെയ്ദാർ (71), യോനാറ്റൻ സമേരാനോ (21), ഷേ ലെവിൻസൺ (19) എന്നിവരുടെ മൃതദേഹങ്ങളാണ് കണ്ടെത്തിയത്. ഒക്ടോബർ 7ന് ഹമാസ് ആക്രമണത്തിൽ 1,100-ലധികം പേർ കൊല്ലപ്പെടുകയും 250-ലധികം പേർ തടവിലാക്കപ്പെടുകയും ചെയ്തിരുന്നു.

ഇസ്റാഈൽ ഉപരോധം: ഗസ്സയിൽ പട്ടിണിയും മരണവും

ഇസ്റാഈലിന്റെ ഉപരോധം ഗസ്സയിൽ ഭക്ഷണത്തിനും ഇന്ധനത്തിനും ക്ഷാമം രൂക്ഷമാക്കി. ആംബുലൻസ് സേവനങ്ങൾ പൂർണമായും നിലച്ചതായി മെഡിക്കൽ വൃത്തങ്ങൾ അറിയിച്ചു. രണ്ട് ദശലക്ഷത്തിലധികം ജനങ്ങൾ പട്ടിണിയുടെ വക്കിലാണ്. മാർച്ച് 18ന് ഇസ്റാഈൽ വെടിനിർത്തൽ ലംഘിച്ച് നടത്തിയ ആക്രമണത്തിന് ശേഷം 5,647 ഫലസ്തീനികൾ കൊല്ലപ്പെടുകയും 19,201 പേർക്ക് പരുക്കേൽക്കുകയും ചെയ്തതായി മന്ത്രാലയം വ്യക്തമാക്കി.

ഹമാസിന്റെ നിർദേശം തള്ളി ഇസ്റാഈൽ

ഗസ്സയിലെ യുദ്ധം അവസാനിപ്പിക്കാനും ഇസ്റാഈൽ സൈന്യം പൂർണമായി പിൻവലിക്കാനും ഫലസ്തീൻ തടവുകാരെ മോചിപ്പിക്കുന്നതിന് പകരമായി ഇസ്റാഈലി ബന്ദികളെ വിട്ടയക്കാൻ തയ്യാറാണെന്ന് ഹമാസ് ആവർത്തിച്ചു. എന്നാൽ, ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹു ഈ നിർദേശം നിരസിച്ചു. 2023 മുതൽ തുടരുന്ന യുദ്ധത്തിൽ 56,000-ത്തോളം പലസ്തീനികൾ കൊല്ലപ്പെട്ടതായി യു.എൻ. റിപ്പോർട്ട് ചെയ്യുന്നു, ഇതിൽ ഭൂരിഭാഗവും സ്ത്രീകളും കുട്ടികളുമാണ്.

അന്താരാഷ്ട്ര സമൂഹത്തിന് ഉത്തരവാദിത്തമുണ്ട്

യുദ്ധത്തിന്റെ ദുരന്തം പരിഹരിക്കാനാവാത്ത അവസ്ഥയിലേക്ക് നീങ്ങുന്നത് തടയാൻ അന്താരാഷ്ട്ര സമൂഹത്തിന് ധാർമിക ഉത്തരവാദിത്തമുണ്ട്," മാർപ്പാപ്പ ഓർമിപ്പിച്ചു. മിഡിൽ ഈസ്റ്റിൽ യുദ്ധം വ്യാപിക്കുന്ന സാഹചര്യത്തിൽ, ​ഗസ്സയിലെ മാനുഷിക പ്രതിസന്ധി അവഗണിക്കപ്പെടരുതെന്ന് അദ്ദേഹം വീണ്ടും പറഞ്ഞു.