ഗുരുഗ്രാം: ഇൻഡിഗോ വിമാനക്കമ്പനിയിലെ 35-കാരനായ ട്രെയിനി പൈലറ്റ് ശരൺ എന്നയാളെ ജാതി അടിസ്ഥാനത്തിൽ അപമാനിച്ചതിന് മൂന്ന് മുതിർന്ന ഉദ്യോഗസ്ഥർക്കെതിരെ പൊലീസ് കേസെടുത്തു. തപസ് ഡേ, മനീഷ് സഹാനി, ക്യാപ്റ്റൻ രാഹുൽ പാട്ടീൽ എന്നിവർക്കെതിരെയാണ് കേസ്.

ബെംഗളൂരുവിൽ ആദ്യം ഫയൽ ചെയ്ത പരാതി, സംഭവം നടന്ന ഗുരുഗ്രാമിലെ ഡിഎൽഎഫ്-1 പൊലീസ് സ്റ്റേഷനിലേക്ക് മാറ്റി. എസ്‌സി/എസ്ടി (അതിക്രമം തടയൽ) നിയമത്തിലെ വകുപ്പുകൾക്ക് പുറമെ ഭാരതീയ ന്യായ സംഹിത (ബിഎൻഎസ്) പ്രകാരമാണ് നടപടി.

ഏപ്രിൽ 28-ന് ഗുരുഗ്രാമിലെ ഇൻഡിഗോയുടെ കോർപ്പറേറ്റ് ഓഫീസിൽ വെച്ചാണ് സംഭവം നടന്നതെന്ന് പൈലറ്റ് പറഞ്ഞു. ഓഫീസിലെത്തിയ ഉടൻ തപസ് ഡേ അപമാനകരമായി ഫോണും ബാഗും മുറിക്ക് പുറത്ത് വയ്ക്കാൻ ആവശ്യപ്പെട്ടതോടെ പീഡനം തുടങ്ങിയതായി പരാതിയിൽ പറയുന്നു. ഉച്ചയ്ക്ക് 3:30-ന് തുടങ്ങിയ കൂടിക്കാഴ്ചയിൽ മൂന്ന് ഉദ്യോഗസ്ഥരും ജാതി അധിക്ഷേപം നടത്തിയെന്നാണ് ആരോപണം.

നിനക്ക് വിമാനം പറത്താൻ കഴിവില്ല, പോയി ചെരിപ്പ് തുന്നുക”, “നിനക്ക് ഇവിടെ കാവൽക്കാരനാകാൻ പോലും യോഗ്യതയില്ല” തുടങ്ങിയ അധിക്ഷേപങ്ങൾ പട്ടിക ജാതിക്കാരനായ തന്നെ അപമാനിക്കാൻ വേണ്ടി പറഞ്ഞതാണെന്ന് പൈലറ്റ് പറഞ്ഞു. ജോലി രാജിവയ്ക്കാൻ നിർബന്ധിക്കാനായി മനഃപൂർവം പീഡിപ്പിച്ചതാണെന്നും പരാതിയിൽ ആരോപിക്കുന്നു.

വാക്കാലുള്ള അധിക്ഷേപത്തിന് പുറമേ, ശമ്പളം കുറയ്ക്കൽ, നിർബന്ധിത പരിശീലനം, യാത്രാ ആനുകൂല്യങ്ങൾ റദ്ദാക്കൽ, അനാവശ്യ മുന്നറിയിപ്പ് കത്തുകൾ തുടങ്ങിയവയും പീഡനത്തിന്റെ ഭാഗമായിരുന്നതായി പൈലറ്റ് പറഞ്ഞു. മുതിർന്ന മാനേജ്മെന്റിനും കമ്പനിയുടെ ആഭ്യന്തര എത്തിക്സ് കമ്മിറ്റിക്കും പരാതി നൽകിയെങ്കിലും നടപടിയുണ്ടായില്ല. ഇതോടെയാണ് എസ്‌സി/എസ്ടി സെല്ലിനെ സമീപിച്ചത്.

പൊതുസ്ഥലത്ത് അപമാനിക്കലും ഭീഷണിപ്പെടുത്തലും ഉൾപ്പെടെ എസ്‌സി/എസ്ടി നിയമത്തിലെ 3(1)(ആർ), 3(1)(എസ്) വകുപ്പുകളും ബിഎൻഎസിലെ 351(2), 352, 3(5) വകുപ്പുകളും ചേർത്താണ് കേസ് രജിസ്റ്റർ ചെയ്തിരിക്കുന്നത്.

വിവേചനമോ പീഡനമോ അനുവദിക്കില്ലെന്നും എല്ലാവരെയും ഉൾക്കൊള്ളുന്ന ജോലിസ്ഥലം ഉറപ്പാക്കാൻ ഞങ്ങൾ പ്രതിജ്ഞാബദ്ധരാണെന്നും ഇൻഡിഗോ വക്താവ് പറഞ്ഞു. ഈ ആരോപണങ്ങൾ അടിസ്ഥാനരഹിതമാണെന്ന് വിശ്വസിക്കുകയും നിയമനിർവഹണ ഏജൻസികൾക്ക് എല്ലാ പിന്തുണയും നൽകുകയും ചെയ്യുമെന്നും പറഞ്ഞു.