വെട്ടത്തൂര്‍: പഞ്ചായത്തിലെ നടപ്പുവര്‍ഷത്തെ പദ്ധതിനിര്‍വഹണം ഭരണസമിതിയുടെ  പിടിപ്പുകേടുമൂലം പ്രതിസന്ധിയിലായെന്ന് ആരോപിച്ച്  സി.പി.എം വെട്ടത്തൂര്‍ ലോക്കല്‍ കമ്മിറ്റി ജില്ലാ കലക്ടര്‍ക്കു പരാതി നല്‍കി. പതിനാറു വാര്‍ഡുകളുള്ള പഞ്ചായത്തില്‍ വൈസ് പ്രസിഡന്റ് സ്ഥാനം ധനകാര്യം, വികസനം, ആരോഗ്യവിദ്യാഭ്യാസം തുടങ്ങിയ മൂന്നു സ്റ്റാന്‍ഡിങ് കമ്മിറ്റികളടക്കം എല്‍.ഡി.എഫിന് എട്ടംഗങ്ങളുണ്ട്. എന്നാല്‍, മുഴുവന്‍ സ്റ്റാന്‍ഡിങ് കമ്മിറ്റി അംഗങ്ങളും ഒപ്പിടാതെയും ആസൂത്രണ മാനദണ്ഡങ്ങള്‍ പാലിക്കാതെയും ഡാറ്റാ എന്‍ട്രി നടത്താതെയും ങ്യാറാക്കിയ പദ്ധതി രേഖ ജില്ലാ പ്ലാനിങ് ബോര്‍ഡിന് അംഗീകരിക്കാന്‍ കഴിയില്ല. ഈ മാസം ഒന്‍പതിനാണ് പദ്ധതി രേഖ പ്ലാനിങ് ബോര്‍ഡിന് സമര്‍പ്പിക്കാനുള്ള അവസാന തിയതി.
നടപടിക്രമങ്ങള്‍ പാലിക്കാതെ വാര്‍ഷിക പദ്ധതിയുടെ കരടുരേഖ അംഗീകരിക്കാനുള്ള നടപടിയില്‍ പ്രതിഷേധിച്ചു പ്രതിപക്ഷം ബോര്‍ഡ് യോഗം ബഹിഷ്‌ക്കരിച്ചിരുന്നു. തുടര്‍ന്ന് പ്രസിഡന്റിന്റെ കാസ്റ്റിങ് വോട്ടോട്ടുകൂടി ഭരണസമിതി കരടു രേഖയ്ക്ക് അംഗീകാരം നല്‍കി.