ഫിഫ ക്ലബ്ബ് ലോകകപ്പിലെ ഗ്രൂപ്പ് ഘട്ടത്തിലെ അവസാന മത്സരത്തിൽ ബ്രസീലിയൻ ക്ലബ്ബ് പാൽമിറാസിനെയാണ് ഇന്റർ മയാമി നേരിടുക. ജൂൺ 24നാണ് ഈ മത്സരം നടക്കുന്നത്. നിലവിൽ ഗ്രൂപ്പ് എയിൽ രണ്ടാം സ്ഥാനത്താണ് ഇന്റർ മയാമി.രണ്ടു മത്സരങ്ങളിൽ നിന്നും ഓരോ വീതം വിജയവും സമനിലയുമായി നാല് പോയിന്റാണ് മയാമിയുടെ കൈവശമുള്ളത്. മറുഭാഗത്ത് ഇത്രതന്നെ പോയിന്റോടെ ഒന്നാം സ്ഥാനത്താണ് ബ്രസീലിയൻ ക്ലബ്ബ്. ഗോൾ ശരാശരിയിൽ മുന്നിൽ ഉള്ളതാണ് ബ്രസീലിയൻ ക്ലബ്ബിനെ ഒന്നാം സ്ഥാനത്ത് നിലനിർത്തുന്നത്. 

ഈ മത്സരത്തിന് മുന്നോടിയായി ഇന്റർ മയാമിയെ നേരിടുന്നതിനെക്കുറിച്ച് സംസാരിക്കുകയാണ് പാൽമിറാസിന്റെ ബ്രസീലിയൻ ഡിഫൻഡർ മുറിലോ. മത്സരത്തിൽ ഇന്റർ മയാമിക്കെതിരെ ഗോൾ നേടിയാൽ റൊണാൾഡോയുടെ ഐകോണിക് സെലിബ്രേഷൻ നടത്തുമെന്നാണ് മുറിലോ പറഞ്ഞത്.  

"ഞാൻ 'ടീം സിആർ7' ആണ്. അദ്ദേഹം വളരെ പൂർണ്ണനാണെന്ന് ഞാൻ കരുതുന്നു. ഫുട്ബോളിൽ റൊണാൾഡോ വളരെ വ്യത്യസ്തമായ അച്ചടക്കം പുലർത്തുന്ന ഒരാളാണ്. അദ്ദേഹം ഓരോ ദിവസവും ചെയ്യുന്ന കാര്യങ്ങളിൽ ഞാൻ എന്നെ തന്നെയാണ് കാണാൻ ശ്രമിക്കുന്നത്. എനിക്ക് അദ്ദേഹത്തെ ഒരുപാട് ഇഷ്ടമാണ്. അതെ ഞാൻ ഇന്റർ മയാമിക്കെതിരെ ഗോൾ നേടിയാൽ റൊണാൾഡോയുടെ ആഘോഷം നടത്തും" പാൽമിറാസ് ഡിഫൻഡർ ദി അത്‌ലറ്റിക്കോക്ക് നൽകിയ അഭിമുഖത്തിൽ പറഞ്ഞു.

അതേസമയം ടൂർണമെന്റിലെ രണ്ടാം മത്സരത്തിൽ പോർച്ചുഗൽ ക്ലബ് പോർട്ടോക്കെതിരെ ഒന്നിനെതിരെ രണ്ട് ഗോളുകൾക്കായിരുന്നു ഇന്റർ മയാമി വിജയിച്ചത്. ഒരു ഗോളിന് പിന്നിൽ നിന്ന ശേഷം രണ്ട് ഗോൾ തിരിച്ചടിച്ചാണ് ഇന്റർ മയാമി വിജയിച്ചത്. 8ാം മിനിറ്റിൽ സാമു അഘഹോവ നേടിയ പെനൽറ്റി ​ഗോളിലൂടെ പോർട്ടോ ലീഡെടുക്കയായിരുന്നു. എന്നാൽ രണ്ടാം പകുതിയിൽ 47ാം മിനിറ്റിൽ ടെലാസ്കോ സെഗോവിയയിലൂടെ ഇന്റർ മയാമി സമനില നേടി. തുടർന്ന് മത്സരം പുരോ​ഗമിക്കവെ 54 മിനിറ്റിൽ പോർട്ടോ ബോക്സിനു പുറത്തു നിന്ന് ഇന്റർ മയാമിക്ക് ലഭിച്ച ഫ്രീകിക്ക് ​ഗോളാക്കി മാറ്റി മെസി മത്സരത്തിൽ മയാമിക്ക് വിജയം നേടിക്കൊടുക്കുകയായിരുന്നു.

Brazilian player Murillo says he will do Ronaldos iconic celebration if he scores against Inter Miami