കൊച്ചി: മന്ത്രവാദവും ആഭിചാര പ്രവൃത്തികളും നിരോധിക്കാനുള്ള നിയമനിർമാണത്തിൽ നിന്ന് പിന്മാറിയതായി സംസ്ഥാന സർക്കാർ ഹൈക്കോടതിയെ അറിയിച്ചു. ഇത്തരം ദുരാചാരങ്ങൾ സർക്കാർ അംഗീകരിക്കുകയാണോ എന്ന് ചീഫ് ജസ്റ്റിസ് നിതിൻ ജാംദാർ, ജസ്റ്റിസ് ബസന്ത് ബാലാജി എന്നിവർ ഉൾപ്പെട്ട ഡിവിഷൻ ബെഞ്ച് രൂക്ഷമായി ചോദിച്ചു. കേരള യുക്തവാദി സംഘം സമർപ്പിച്ച ഹരജിയിൽ, മന്ത്രവാദ-ആഭിചാര നിരോധന നിയമനിർമാണത്തിന് നിർദേശം നൽകണമെന്ന് ആവശ്യപ്പെട്ടിരുന്നു.

ആഭ്യന്തര വകുപ്പ് ഡെപ്യൂട്ടി സെക്രട്ടറി എം. മഞ്ജു സമർപ്പിച്ച സത്യവാങ്മൂലം തള്ളിയ കോടതി, സാമൂഹിക പ്രാധാന്യമുള്ള ഈ വിഷയത്തിൽ ഇത്തരമൊരു വിശദീകരണം അപര്യാപ്തമാണെന്ന് വിമർശിച്ചു. മൂന്നാഴ്ചയ്ക്കകം ഉന്നത ഉദ്യോഗസ്ഥനായ സെക്രട്ടറി തന്നെ വിശദമായ സത്യവാങ്മൂലം സമർപ്പിക്കണമെന്നും, നിയന്ത്രണ നടപടികൾ വ്യക്തമാക്കണമെന്നും കോടതി നിർദേശിച്ചു.

നിയമനിർമാണത്തിൽ നിന്നുള്ള പിന്മാറ്റം

ജസ്റ്റിസ് കെ.ടി. തോമസ് അധ്യക്ഷനായ നിയമ പരിഷ്കരണ കമ്മിഷന്റെ ശുപാർശ പ്രകാരം, ‘കേരള പ്രിവൻഷൻ ആൻഡ് ഇറാഡിക്കേഷൻ ഒഫ് ഇൻഹ്യൂമൻ ഈവിൾ പ്രാക്ടീസസ്, സോർസെറി ആൻഡ് ബ്ലാക് മാജിക് ബിൽ 2022’ എന്ന നിയമനിർമാണം ആലോചനയിലുണ്ടായിരുന്നുവെന്ന് സർക്കാർ വ്യക്തമാക്കി. എന്നാൽ, 2023 ജൂലൈ 5-ന് നടന്ന മന്ത്രിസഭാ യോഗം ഈ നിയമനിർമാണവുമായി മുന്നോട്ടുപോകേണ്ടെന്ന് തീരുമാനിച്ചു.

നിയമനിർമാണത്തിന് കോടതിക്ക് നിർദേശം നൽകാനാകില്ലെന്നും ഹരജി തള്ളണമെന്നും ഡെപ്യൂട്ടി സെക്രട്ടറിയുടെ സത്യവാങ്മൂലത്തിൽ വാദിച്ചിരുന്നു. എന്നാൽ, നിയമനിർമാണത്തിന് നിർബന്ധിക്കാനാകില്ലെങ്കിലും, ദുരാചാരങ്ങൾക്കെതിരെ യാതൊരു ഇടപെടലും വേണ്ടെന്ന് അർഥമില്ലെന്ന് കോടതി ചൂണ്ടിക്കാട്ടി. “നിയമമില്ലാത്ത സാഹചര്യത്തിൽ സർക്കാർ സ്വീകരിക്കുന്ന നിയന്ത്രണ നടപടികൾ എന്താണ്? ദുരാചാരങ്ങൾ അംഗീകരിച്ച് മുന്നോട്ടുപോകാനാണോ നിലപാട്?” എന്ന് കോടതി ചോദിച്ചു.