തിരുവനന്തപുരം: കാവിക്കൊടിയേന്തിയ ഭാരതാംബ വിവാദത്തിൽ ഗവർണറെ സർക്കാർ രേഖാമൂലം എതിർപ്പ് അറിയിച്ചു. ഇന്നലെ ചേര്‍ന്ന മന്ത്രിസഭാ യോഗത്തില്‍ ഇതേ സംബന്ധിച്ച് തീരുമാനം എടുത്തിരുന്നു. സര്‍ക്കാര്‍ പരിപാടികളില്‍ കാവിപ്പതാകയേന്തിയ ഭാരതാംബ ഉള്‍പ്പെടെയുള്ള ആര്‍.എസ്.എസിന്റെ ചിത്രങ്ങള്‍ ഉപയോഗിക്കുന്നതില്‍ വിയോജിപ്പ് രേഖപ്പെടുത്തി മുഖ്യമന്ത്രി കത്ത് നല്‍കി. ഔദ്യോഗിക പരിപാടികളില്‍ നിര്‍ദിഷ്ട ചിഹ്നങ്ങളും ചിത്രങ്ങളും മാത്രമേ ഉപയോഗിക്കാവൂവെന്നും മറ്റു ചിഹ്നങ്ങള്‍ സ്വന്തം താല്‍പര്യത്തില്‍ ഉപയോഗിക്കുന്നത് ഭരണഘടനാ ചട്ടങ്ങള്‍ക്ക് വിരുദ്ധമാണെന്ന കാര്യവും കത്തില്‍ ഉണ്ടെന്നാണ് വിവരം.

ALSO READ: കാവിക്കൊടിയേന്തിയ ഭാരതാംബ ചിത്രം;കേരള സർവകലാശാലയിൽ ഗവർണർ പങ്കെടുത്ത പരിപാടിയിൽ സംഘർഷം; ഏറ്റുമുട്ടി എസ്എഫ്ഐ എബിവിപി പ്രവർത്തകർ

നേരത്തേ കേരള സര്‍വകലാശാലയുടെ സെനറ്റ് ഹാളില്‍ ശ്രീ പദ്മനാഭ സേവാസമിതി സംഘടിപ്പിച്ച 'അടിയന്തരാവസ്ഥയുടെ 50 വര്‍ഷങ്ങള്‍' എന്ന പരിപാടിയില്‍ കാവിക്കൊടിയേന്തിയ ഭാരതാംബയുടെ ചിത്രം സ്ഥാപിച്ചത് വിവാദവും സംഘര്‍ഷവും സൃഷ്ടിച്ചിരുന്നു. മതചിഹ്നമെന്ന് ആരോപിച്ച് സര്‍വകലാശാല രജിസ്ട്രാര്‍ പരിപാടിക്ക് അനുമതി നിഷേധിച്ചെങ്കിലും, പ്രതിഷേധങ്ങള്‍ അവഗണിച്ച് ഗവര്‍ണര്‍ രാജേന്ദ്ര അര്‍ലേകര്‍ പരിപാടിയില്‍ പങ്കെടുക്കുകയായിരുന്നു.

സെനറ്റ് ഹാളിന് പുറത്ത് എസ്എഫ്ഐ, കെഎസ്‌യു പ്രവർത്തകർ പ്രതിഷേധിച്ചത് പൊലിസുമായുള്ള ഏറ്റുമുട്ടലിൽ കലാശിച്ചു. സിപിഎം നേതാക്കളായ സിൻഡിക്കേറ്റ് അംഗങ്ങളും പ്രതിഷേധവുമായി രംഗത്തെത്തി. ബിജെപി-ആർഎസ്എസ് അനുകൂലികൾ മറുവശത്ത് തടിച്ചുകൂടിയത് സംഘർഷാവസ്ഥക്ക് കാരണമായി. സർവകലാശാല ചട്ടങ്ങൾ ലംഘിച്ചാണ് ചിത്രം സ്ഥാപിച്ചതെന്ന് രജിസ്ട്രാറും പൊലിസും ചൂണ്ടിക്കാട്ടി, ചിത്രം നീക്കണമെന്ന് ആവശ്യപ്പെട്ടെങ്കിലും സംഘാടകർ വഴങ്ങിയില്ല.

സർവകലാശാലയിൽ മതചിഹ്നങ്ങൾ പ്രദർശിപ്പിക്കുന്നത് ചട്ടവിരുദ്ധമാണെന്നും പരിപാടി അനുവദിക്കില്ലെന്നും ഇടത് പ്രവർത്തകർ വ്യക്തമാക്കി. എന്നാൽ, ഗവർണർ പരിപാടിയിൽ പങ്കെടുക്കുമെന്ന് വ്യക്തമാക്കി വേദിയിലെത്തി. ആർഎസ്എസ് നേതാവ്  സുരേന്ദ്രന്റെ പുസ്തക പ്രകാശനവും ചടങ്ങിന്റെ ഭാഗമായി നടന്നു.

ALSO READ: കാവിക്കൊടിയേന്തിയ ഭാരതാംബ ചിത്രം; കേരള സർവകലാശാലയിൽ നാടകീയ രംഗങ്ങൾ; പരിപാടി റദാക്കിയെന്ന് രജിസ്ട്രാർ, റദാക്കിയില്ലെന്ന് സംഘാടകർ

സംഘാടകർക്ക് ഹാൾ ബുക്ക് ചെയ്യുമ്പോൾ തന്നെ നിബന്ധനകൾ വ്യക്തമാക്കിയിരുന്നുവെന്ന് രജിസ്ട്രാർ വ്യക്തമാക്കി. സംഘർഷ സാഹചര്യം കണക്കിലെടുത്ത് ഗവർണർ പങ്കെടുക്കരുതെന്ന് രാജ്ഭവനെ അറിയിച്ചിരുന്നു, എന്നിട്ടും പരിപാടി നടത്തുകയായിരുന്നു.