കൊണ്ടോട്ടി(മലപ്പുറം): ഹജ്ജിന്റെ പുണ്യം നുകര്‍ന്ന് ആത്മനിര്‍വൃതിയില്‍  നാട്ടില്‍ തിരിച്ചെത്തിയ ഹാജിമാര്‍ക്ക് കരിപ്പൂര്‍ വിമാനത്താവളത്തില്‍ സ്‌നേഹോഷ്മള സ്വീകരണം. സംസ്ഥാന ഹജ്ജ് കമ്മിറ്റിക്കു കീഴില്‍ യാത്രതിരിച്ച തീർഥാടകരുടെ ആദ്യസംഘമാണ് ഇന്നലെ കരിപ്പൂരില്‍ തിരിച്ചെത്തിയത്. 76 പുരുഷന്മാരും 94 സ്ത്രീകളുമടക്കം 170 ഹാജിമാരുമായി എയര്‍ഇന്ത്യ എക്‌സ്പ്രസിന്റെ വിമാനം വൈകീട്ട്  5.20 ഓടെയാണ് മദീനയില്‍നിന്ന് റാസല്‍ ഖൈമവഴി കരിപ്പൂരിലെത്തിയത്.  
ഖത്തറില്‍ ഇറാന്‍ നടത്തിയ മിസൈല്‍ ആക്രമണത്തെ തുടര്‍ന്ന് വ്യോമയാന മേഖലയിലെ താളപ്പിഴകൾ കാരണം ഷെഡ്യൂൾ ചെയ്തതിലും രണ്ട് മണിക്കൂർ വൈകിയാണ്  വിമാനം എത്തിയത്.  

കരിപ്പൂരിൽ തീര്‍ഥാടകരെ ഹജ്ജ് കമ്മറ്റി റോസാ പൂക്കള്‍ നല്‍കിയാണ് സ്വീകരിച്ചത്.  കസ്റ്റംസ്, എമിഗ്രേഷന്‍ പരിശോധനകള്‍ വേഗത്തില്‍ പൂര്‍ത്തിയാക്കി സംസം തീര്‍ഥജലം നല്‍കിയാണ് ഹാജിമാരെ വിമാനത്താവളത്തില്‍നിന്ന് പുറത്തിറക്കിയത്.  സംസം വിതരണോദ്ഘാടനം പി.ടി.എ റഹീം എം.എൽ.എ നിർവഹിച്ചു. വിമാനത്താവളത്തിൽ പരിശോധനകള്‍ വേഗത്തിൽ പൂര്‍ത്തിയാക്കാന്‍ എമിഗ്രേഷന്‍, കസ്റ്റംസ് കൗണ്ടറുകളില്‍ കൂടുതല്‍ ജീവനക്കാരെ എയര്‍പോര്‍ട്ട് അതോറിറ്റി നിയമിച്ചിട്ടുണ്ട്. ഹാജിമാരെ സഹായിക്കാനായി 14 ഹജ്ജ് സെൽ ഓഫിസര്‍മാരും സജ്ജരായിരുന്നു. ടെര്‍മിനലിനകത്തും പുറത്തുമായി ഹജ്ജ് കമ്മിറ്റി വളണ്ടിയര്‍മാരാണ് ഹാജിമാരുടെ ലഗേജ് പുറത്തെത്തിക്കാന്‍ സേവകരായുള്ളത്.

കൊച്ചിയിലേക്കുള്ള ഹജ്ജ് മടക്ക സർവിസുകള്‍ ഇന്ന് പുലർച്ചെയിലേക്കാണ് ഷെഡ്യൂൾ ചെയ്തിരിക്കുന്നത്. കണ്ണൂര്‍ വിമാനത്താവളങ്ങളിലേക്കുള്ള ഹാജിമാരുടെ മടക്കം ഈ മാസം 30 മുതലും ആരംഭിക്കും. സംസ്ഥാന ഹജ്ജ് കമ്മിറ്റി മുഖേന കരിപ്പൂര്‍, കണ്ണൂര്‍, കൊച്ചി വിമാനത്താവളങ്ങളില്‍ നിന്നായി 16,482 പേരാണ് ഇത്തവണ വിശുദ്ധ ഹജ്ജ് കർമത്തിനായി പുറപ്പെട്ടത്. ഇതില്‍ 16,040 പേര്‍ കേരളത്തില്‍ നിന്നുള്ളവരും 442 പേര്‍ ഇതര സംസ്ഥാനക്കാരുമാണ്. ഹജ്ജിന് പോയവരില്‍ എട്ട് പേര്‍ മക്കയില്‍ വച്ച് ഇതിനകം മരിച്ചു. ഹാജിമാരുടെ മടക്കയാത്ര അടുത്ത മാസം എട്ടിന് അവസാനിക്കും.

തിരിച്ചെത്തിയ ആദ്യ  സംഘത്തെ സ്വീകരിക്കാൻ ഹജ്ജ് കമ്മിറ്റി ചെയര്‍മാന്‍ ഹുസൈന്‍ സഖാഫി ചുള്ളിക്കോട്,  മെംബര്‍മാരായ ഉമര്‍ ഫൈസി മുക്കം, അഡ്വ പി മൊയ്തീൻ കുട്ടി, അസ്ക്കർ കോറാട്, യൂസുഫ് പടനിലം, ഹജ്ജ് അസിസെക്രട്ടറി  ജാഫർ കക്കൂത്ത്, പി.കെ അസൈൻ, എയര്‍പോര്‍ട്ട് ഡയറക്ടര്‍ മുനീര്‍ മാടമ്പാട്ട് എന്നിവരും സന്നിഹിതരായിരുന്നു.