തിരുവനന്തപുരം: സി.പി.ഐയെ യു.ഡി.എഫിലേക്ക് ക്ഷണിച്ച് അടൂര്‍ പ്രകാശ്. സി.പി.ഐ നേരത്തേയും കോണ്‍ഗ്രസുമായി സഹകരിച്ചിട്ടുണ്ടെന്നും യു.ഡി.എഫ് കണ്‍വീനര്‍ ചൂണ്ടിക്കാട്ടി. അതേസമയം, അടൂര്‍ പ്രകാശിന്റെ ക്ഷണം കേള്‍ക്കുമ്പോള്‍ ചിരിവന്നുവെന്നാണ് സി.പി.ഐ സംസ്ഥാന സെക്രട്ടറി ബിനോയ് വിശ്വം പ്രതികരിച്ചത്.  മോദി സ്തുതി നടത്തുന്ന ആളുകള്‍ ബിജെപിയിലേക്ക് പോകാതിരിക്കാനാണ് കോണ്‍ഗ്രസ് നോക്കേണ്ടതെന്നും ബിനോയ് വിശ്വം ഒളിയമ്പെയ്തു.

ALSO READ: യു.ഡി.എഫ് മുന്നണിയിൽ പി.വി. അൻവറിന് ‘നോ എൻട്രി’: വാതിൽ അടച്ചത് കൂട്ടായ ചർച്ചകൾക്ക് ശേഷം; വി.ഡി. സതീശൻ

എം.ആര്‍ അജിത് കുമാറിനെ സംസ്ഥാന പൊലിസ് മേധാവിയാക്കരുതെന്ന് ബിനോയ് വിശ്വം പറഞ്ഞു. തൃശൂര്‍ പൂരത്തിനിടെ പ്രശ്‌നങ്ങളുണ്ടായപ്പോള്‍ മന്ത്രിയുടെ ഫോണ്‍ ഒരു തവണ പോലും എടുക്കാത്ത അജിത് കുമാര്‍ ആര്‍.എസ്.എസ് നേതാക്കളെ പലതവണ കണ്ടെന്നും ബിനോയ് വിശ്വം ചൂണ്ടിക്കാട്ടി. അങ്ങനെ ഒരാള്‍ ഡി.ജി.പി ആവാന്‍ പാടില്ലെന്നും അദ്ദേഹം കൂട്ടിച്ചേര്‍ത്തു.

നിലമ്പൂര്‍ ഉപതെരഞ്ഞെടുപ്പുമായി ബന്ധപ്പെട്ട് വിശദമായ റിപ്പോര്‍ട്ട് ആവശ്യപ്പെട്ടിട്ടുണ്ടെന്നും അദ്ദേഹം വ്യക്തമാക്കി. മികച്ച സ്ഥാനാര്‍ത്ഥിയായിരുന്നുവെന്നും രാഷ്ട്രീയം പറഞ്ഞാണ് വോട്ട് തേടിയതെന്നും ബിനോയ് വിസ്വം പറഞ്ഞു. എന്നാല്‍ ഭരണ വിരുദ്ധ വികാരമടക്കം പല ഘടകങ്ങളുണ്ട്. സര്‍ക്കാരിന്റെ നേട്ടങ്ങള്‍ വേണ്ടവിധം ജനങ്ങളിലേക്ക് എത്തിക്കാനായോ എന്ന് പരിശോധിക്കുമെന്നും ബിനോയ് വിശ്വം കൂട്ടിച്ചേര്‍ത്തു. 

UDF Convenor Adoor Prakash has invited the CPI to join the UDF, citing past cooperation. CPI State Secretary Binoy Viswam dismissed the suggestion with a smile, urging Congress to focus on those praising Modi instead.