ഫ്ലോറിഡ: ഇന്ത്യൻ ബഹിരാകാശ യാത്രികൻ ശുഭാംശു ശുക്ല ഉൾപ്പെടെ നാല് പേരുമായി പുറപ്പെട്ട പേടകം അന്താരാഷ്ട്ര ബഹിരാകാശ നിലയത്തില്‍ (ഐഎസ്എസ്) ഡോക്ക് ചെയ്തു. ആക്സിയം 4 ദൗത്യത്തിലെ ഗ്രേസ് ക്രൂ ഡ്രാഗണ്‍ പേടകമാണ് ബഹിരാകാശ നിലയത്തിലെത്തിയത്. സോഫ്റ്റ് ക്യാപ്ചർ പൂർത്തിയായതോടെ വൈകാതെ സംഘം നിലയത്തിൽ പ്രവേശിക്കും. 28.5 മണിക്കൂർ സഞ്ചരിച്ചാണു പേടകം അന്താരാഷ്ട്ര ബഹിരാകാശ നിലയത്തിൽ എത്തിയത്. വ്യോമസേന ഗ്രൂപ്പ് ക്യാപ്റ്റന്‍ ശുഭാംശു ശുക്ല നിലയത്തിലേക്ക് പ്രവേശിക്കുന്നതോടെ അന്താരാഷ്ട്ര ബഹിരാകാശ നിലയത്തിലെത്തുന്ന ആദ്യ ഇന്ത്യക്കാരൻ എന്ന ചരിത്ര നേട്ടത്തിന് ഉടമയാകും.

ഇന്ത്യൻ സമയം വൈകിട്ട് നാലോടെയാണ് ആക്സിയം –4 രാജ്യാന്തര ബഹിരാകാശ നിലയത്തിൽ ഡോക്ക് ചെയ്തു. പേടകം ബഹിരാകാശ നിലയത്തിന്റെ ഹാർമണി മൊഡ്യൂളിന്റെ ബഹിരാകാശത്തെ അഭിമുഖീകരിക്കുന്ന പോർട്ടിലാണ് ഡോക്ക് ചെയ്തത്. നിലയവും ഡ്രാഗൺ പേടകവും തമ്മിൽ ഒന്നാകുന്ന ഡോക്കിങ് പ്രക്രീയ പൂർത്തിയായി. ഇനി ഇരു പേടകങ്ങളിലെയും മർദ്ദവും മറ്റും ഏകീകരിക്കുന്ന ഹാർഡ് ക്യാപ്ചർ നടക്കും. ഇതിന് പിന്നാലെ യാത്രികർ നിലയത്തിലേക്ക് പ്രവേശിക്കും. ഇതിനായി ഇനി ഒന്നോ രണ്ടോ മണിക്കൂർ കൂടി കാത്തിരിക്കേണ്ടി വരും.

ALSO READ: പൊലിസ് മേധാവി സ്ഥാനത്തേക്കുള്ള മൂന്ന് പേരുടെ ചുരുക്കപ്പട്ടിക തയ്യാറായി; എം.ആർ അജിത് കുമാർ പട്ടികയിൽ ഇല്ല

ഇന്നലെയാണ് ശുഭാംശു ശുക്ല അടക്കം നാല് പേര്‍ ആക്സിയം 4 ദൗത്യത്തില്‍ അന്താരാഷ്ട്ര ബഹിരാകാശ നിലയത്തിലേക്ക് യാത്ര തിരിച്ചത്. മുതിർന്ന ആസ്ട്രനോട്ട് പെഗ്ഗി വിറ്റ്സൻ (യുഎസ്), സ്ലാവോസ് വിസ്നീവ്സ്കി (പോളണ്ട്), ടിബോർ കാപു (ഹംഗറി)  എന്നിവരാണ് ദൗത്യത്തിലെ മറ്റു യാത്രക്കാർ. 14 ദിവസം നിലയത്തിൽ കഴിയുന്ന സംഘം 60 പരീക്ഷണങ്ങൾ നടത്തും. ഇതിൽ ഏഴെണ്ണം ശുഭാംശു തനിയെ നടത്തുന്നതായിരിക്കും. 

സ്പേസ് എക്‌സിന്‍റെ 'ഗ്രേസ്' ക്രൂ ഡ്രാഗണ്‍ പേടകത്തിലാണ് സംഘം യാത്ര തിരിച്ചത്. സ്പേസ്എക്സ് ഫാൽക്കൺ 9 ബ്ലോക്ക് 5 എന്ന റോക്കറ്റ്, അമേരിക്കയിലെ കെന്നഡി സ്പേസ് സെന്ററിലെ 39 എ വിക്ഷേപണത്തറയി‍ൽ നിന്നാണ് കുതിച്ചുയർന്നത്. റോക്കറ്റിനു മുകളിൽ ഘടിപ്പിച്ച ഡ്രാഗൺ സി 213 പേടകത്തിലാണു യാത്രാസംഘമുള്ളത്. പെഗ്ഗിയായിരുന്നു ദൗത്യ കമാന്‍ഡര്‍. ദൗത്യം നയിക്കുന്ന മിഷന്‍ പൈലറ്റ് ശുഭാംശു ശുക്ലയായിരുന്നു. 28.5 മണിക്കൂർ സഞ്ചരിച്ചാണ് സംഘം നിലയത്തിൽ എത്തിയത്.