തിരുവനന്തപുരം: കേരള ക്രിക്കറ്റ് ലീഗ് രണ്ടാം സീസണിന് ഓഗസ്റ്റ് 22ന് തുടക്കമാവും. സെപ്റ്റംബർ ഏഴ് വരെയാണ് ടൂർണമെന്റ് നടക്കുക. രണ്ടാം സീസൺ തുടങ്ങുന്നതിനു മുന്നോടിയായുള്ള താര ലേലം ജൂലൈ അഞ്ചിനാണ് നടക്കുക. തിരുവനന്തപുരം ഹയാത്ത് റീജൻസിയിൽ വെച്ചാണ് ലേലം നടക്കുക. ഇത്തവണത്തെ കേരള ക്രിക്കറ്റ് ടീമിന് ഏറെ പ്രത്യേകതകളുണ്ട്. മലയാളി സൂപ്പർ താരം സഞ്ജു സാംസൺ ടൂർണമെന്റിൽ കളിക്കുമെന്നതാണ് രണ്ടാം സീസണിനെ വ്യത്യസ്തമാക്കുന്നത്.

താര ലേലത്തിൽ സഞ്ജു തന്റെ പേരും രജിസ്റ്റർ ചെയ്തിട്ടുണ്ട്. ലേലത്തിൽ സഞ്ജുവിനെ സ്വന്തമാക്കാൻ ശക്തമായ പോരാട്ടം ടീമുകൾ കാഴ്ചവെക്കുമെന്ന് ഉറപ്പാണ്. ലേലത്തിൽ ഏറ്റവും തുക ലഭിക്കാൻ സാധ്യത കൽപ്പിക്കപ്പെടുന്ന താരവും സഞ്ജുവാണ്. 

അതേസമയം കഴിഞ്ഞ സീസണിൽ ആലപ്പി റിപ്പിൾസിനായി കളിച്ച യുവതാരം വിഗ്നേഷ് പുത്തൂരും ഇത്തവണ ടൂർണമെന്റിന്റെ ഭാഗമാകും എന്നാണ് പ്രതീക്ഷിക്കുന്നത് . കഴിഞ്ഞ ഐപിഎല്ലിൽ മുംബൈ ഇന്ത്യൻസിനു വേണ്ടി അരങ്ങേറ്റ മത്സരത്തിൽ തന്നെ തകർപ്പൻ പ്രകടനമായിരുന്നു വിഘ്നേശ് പുറത്തെടുത്തിരുന്നത്. ചെന്നൈ സൂപ്പർ കിങ്സിനെതിരായ മത്സരത്തിൽ രോഹിത് ശർമ്മയ്ക്ക് പകരം ഇമ്പാക്ട് പ്ലെയർ ആയാണ് താരം കളത്തിലിറങ്ങിയിരുന്നത്. മത്സരത്തിൽ മൂന്ന് വിക്കറ്റുകളാണ് താരം നേടിയത്.

ടൂർണമെന്റിലെ നിലവിലെ ചാമ്പ്യന്മാർ കൊല്ലം സെയ്ലേഴ്സാണ്. കഴിഞ്ഞ സീസണിലെ ലേലത്തിലെ ഏറ്റവും വിലയേറിയ താരം എം എസ് അഖില്‍ ആയിരുന്നു. 7.4 ലക്ഷം രൂപയ്ക്ക് ട്രിവാൻഡ്രം റോയൽസ് ആയിരുന്നു അഖിലിനെ സ്വന്തമാക്കിയിരുന്നത്.