നിലമ്പൂർ: പി.വി. അൻവറിനെ യു.ഡി.എഫ് മുന്നണിയിൽ ഉൾപ്പെടുത്തേണ്ട സാഹചര്യം നിലവിലില്ലെന്ന് പ്രതിപക്ഷ നേതാവ് വി.ഡി. സതീശൻ. സ്വകാര്യ ചാനലിന് നൽകിയ അഭിമുഖത്തിൽ, അൻവറിന് മുന്നണിയിൽ ‘നോ എൻട്രി’ എന്ന് വ്യക്തമാക്കിയ സതീശൻ, ഈ തീരുമാനം ബോധപൂർവമാണെന്നും കൂട്ടായ ചർച്ചകൾക്ക് ശേഷമാണ് വാതിൽ അടച്ചതെന്നും പറഞ്ഞു. “വിലപേശൽ രാഷ്ട്രീയത്തിനോ പ്രശംസകൾക്കോ വഴങ്ങില്ല; തീരുമാനം റിവ്യൂ കമ്മിറ്റിയാണ് എടുക്കേണ്ടത്,” അദ്ദേഹം കൂട്ടിച്ചേർത്തു.

നിലമ്പൂർ ഉപതെരഞ്ഞെടുപ്പിൽ സർക്കാരിന്റെ വോട്ടുകൾ കുത്തനെ കുറഞ്ഞത് ഭരണവിരുദ്ധ വികാരത്തിന്റെ തെളിവാണെന്ന് സതീശൻ ചൂണ്ടിക്കാട്ടി. “നിലമ്പൂർ യു.ഡി.എഫിന്റെ വിജയം ടീം വർക്കിന്റെ ഫലമാണ്. മന്ത്രിമാർ ക്യാംപ് ചെയ്ത് ജനകീയ വിഷയങ്ങളിൽ നിന്ന് ശ്രദ്ധ തിരിക്കാൻ ശ്രമിച്ചെങ്കിലും, യു.ഡി.എഫിന്റെ ചെറുപ്പക്കാരായ രണ്ടാംനിര നേതൃത്വവും മുതിർന്ന നേതാക്കളുടെ സാന്നിധ്യവും വിജയത്തിന് കരുത്തായി,” അദ്ദേഹം പറഞ്ഞു. നിലമ്പൂർ യു.ഡി.എഫ് മണ്ഡലമല്ലെന്ന സി.പി.എം വിലയിരുത്തലിനെ തള്ളിയ സതീശൻ, കടുത്ത വെല്ലുവിളിയെ മറികടന്നാണ് മുന്നണി വിജയിച്ചതെന്നും വ്യക്തമാക്കി.

അൻവർ വിഷയത്തിൽ യു.ഡി.എഫിൽ ഭിന്നത

അൻവറിന് മുന്നണിയുടെ വാതിൽ അടച്ചിട്ടില്ലെന്നും, ആവശ്യമെങ്കിൽ തുറക്കാൻ താക്കോൽ കൈവശമുണ്ടെന്നും കെ.പി.സി.സി അധ്യക്ഷൻ സണ്ണി ജോസഫ് ഇന്നലെ പ്രസ്താവിച്ചിരുന്നു. നിലമ്പൂരിൽ അൻവർ ഏകദേശം 20,000 വോട്ടുകൾ നേടിയതിന് പിന്നാലെയാണ് ഈ പരാമർശം. അൻവർ മുന്നണിയോടൊപ്പം ഉണ്ടായിരുന്നെങ്കിൽ ഭൂരിപക്ഷം 25,000 കടന്നേനെയെന്ന് കോൺഗ്രസ് പ്രവർത്തക സമിതി അംഗം രമേശ് ചെന്നിത്തലയും അഭിപ്രായപ്പെട്ടു. എന്നാൽ, ഈ നേതാക്കളുടെ അഭിപ്രായങ്ങൾക്ക് വിരുദ്ധമായാണ് വി.ഡി. സതീശന്റെ ഉറച്ച നിലപാട്.

വിജയാഹ്ലാദവുമായി ആര്യാടൻ ഷൗക്കത്ത് പാണക്കാട്ട്

നിലമ്പൂർ ഉപതെരഞ്ഞെടുപ്പിൽ വിജയിച്ച നിയുക്ത എം.എൽ.എ ആര്യാടൻ ഷൗക്കത്ത് വിജയാഹ്ലാദം പങ്കിടാൻ പാണക്കാട്ടെത്തി. “ഒറ്റക്കെട്ടായ പ്രവർത്തനത്തിന്റെ വിജയമാണ് നിലമ്പൂർ,” എന്ന് സാദിഖലി ശിഹാബ് തങ്ങൾ പറഞ്ഞു. “കോൺഗ്രസിന് മുമ്പേ മുസ്ലിം ലീഗ് നിലമ്പൂരിൽ പ്രവർത്തനം ആരംഭിച്ചിരുന്നു. താഴെത്തട്ടിലുള്ള അണികളെ സജ്ജമാക്കാൻ ലീഗിന് കഴിഞ്ഞു,” എന്ന് ഷൗക്കത്ത് ചൂണ്ടിക്കാട്ടി. എം.എൽ.എമാരായ പി.കെ. ബഷീർ, അഡ്വ. യു.എ. ലത്തീഫ്, മലപ്പുറം ജില്ലാ പഞ്ചായത്ത് വൈസ് പ്രസിഡന്റ് ഇസ്മായിൽ മൂത്തേടം തുടങ്ങിയവർ ഷൗക്കത്തിനൊപ്പം ഉണ്ടായിരുന്നു.