കൊച്ചി: പശ്ചിമേഷ്യയില്‍ യുദ്ധാശങ്കള്‍ക്ക് താല്‍ക്കാലിക വിരാമമായതിന് പിന്നാലെ സ്വര്‍മ വില കുറഞ്ഞിരുന്നു. ഇന്നും ഇന്നലത്തെ അതേ വിലയില്‍ തുടരുകയാണ്. അതേസമയം , വമ്പന്‍ ഇടിവിലേക്ക് പോയിട്ടുമില്ല. അമേരിക്കയിലെ രാഷ്ട്രീയ സാഹചര്യങ്ങളാണ് നിലവില്‍ സ്വര്‍ണവിലയെ സ്വാധീനിക്കുന്നത്. ട്രംപും ഫെഡ് റിസര്‍വ് ചെയര്‍മാനും തമ്മിലെ പോര് ഉള്‍പെടെ സ്വര്‍ണവില നിര്‍ണയിക്കുന്നതില്‍ പ്രധാനമാണ്. 

ഡോളര്‍ തുടര്‍ച്ചയായി കരുത്ത് കുറയുന്നത് ഇന്ത്യന്‍ രൂപ ശക്തിപ്പെടാന്‍കാരണമായി. രൂപ മാത്രമല്ല, ലോകത്തെ പല കറന്‍സികള്‍ക്കും ഇതോടെ മൂല്യം വര്‍ധിച്ചു. ഇത് സ്വര്‍ണവില കൂടാനുള്ള കാരണമാകേണ്ടതായിരുന്നു. എന്നാല്‍ അമേരിക്കന്‍ കേന്ദ്ര ബാങ്കായ ഫെഡറല്‍ റിസര്‍വ് പലിശ നിരക്കില്‍ മാറ്റം വരുത്താനിടയുണ്ടെന്ന വാര്‍ത്തയും ബാങ്കിന്റെ ചെയര്‍മാനെ ട്രംപ് മാറ്റാനിടയുണ്ടെന്ന സൂചനയും വിപണിയ ഉലക്കുകയാണ്. 

സ്വതന്ത്രമായ തീരുമാനങ്ങളെടുത്ത് മുന്നോട്ട് പോകുന്ന സംവിധാനമാണ് ഫെഡറല്‍ റിസര്‍വ്. എന്നാല്‍ സര്‍ക്കാരിന്റെ നിലപാടിന് ഒപ്പം ബാങ്ക് നില്‍ക്കണം എന്നാണ് ട്രംപ് ആവശ്യപ്പെടുന്നത്. പലിശ നിരക്കില്‍ മാറ്റം വരുത്തുന്നത് സര്‍ക്കാരിന്റെ ഹിതം കൂടി പരിഗണിച്ചാകണം എന്ന ട്രംപിന്റെ ആവശ്യത്തെ അംഗീകരിക്കില്ലെന്ന് നിലപാട് ഫെഡ് ചെയര്‍മാന്‍ ജെറോം പവല്‍ വ്യക്തമാക്കിക്കഴിഞ്ഞു.

ALSO READ: ഇറാന്റെ തിരിച്ചടിയില്‍ തകര്‍ന്ന് തരിപ്പണമായി ഇസ്രാഈല്‍; 20 ബില്യണ്‍ ഡോളറിന്റെ നഷ്ടം, കരകയറാന്‍ ഫണ്ട് പിരിവ്

അതേസമയം, ജെറോം പവലിന്റെ പിന്‍ഗാമിയെ പ്രഖ്യാപിക്കാനുള്ള നീക്കത്തിലാണ് ട്രംപ് എന്നും റിപ്പോര്‍ട്ടുകള്‍ വരുന്നുണ്ട്. ഫെഡ് തീരുമാനങ്ങള്‍ തന്റെ വരുതിയില്‍ നിര്‍ത്താന്‍  കഴിയുന്ന ഒരാളെയാവും ട്രംപ് നിര്‍ദ്ദേശിക്കുക. ഇത് എന്താവും എന്നത് കൂടി ആശ്രയിച്ചായിരിക്കും വിപണിയിലെ മാറ്റങ്ങളെന്നും വിദഗ്ധര്‍ ചൂണ്ടിക്കാട്ടുന്നു. 

ഇന്നത്തെ സ്വര്‍ണവില

കേരളത്തില്‍ ഇന്ന് ഒരു പവന്‍ 22 കാരറ്റ് ിന് 72560 രൂപയാണ് വില. ഗ്രാമിന് 9070 രൂപയും. 18 കാരറ്റ് സ്വര്‍ണം ഗ്രാമിന് 7440 രൂപയാണ്.  കഴിഞ്ഞ രണ്ട് ദിവസങ്ങളില്‍ സ്വര്‍ണവില കുറഞ്ഞിരുന്നു. വെള്ളിയുടെ വില ഗ്രാമിന് 116 രൂപയില്‍ നില്‍ക്കുന്നു. രാജ്യാന്തര സ്വര്‍ണ വില ഔണ്‍സിന് 3338 ഡോളറിലെത്തിയിട്ടുണ്ട്. വെള്ളിയുടെ വിലയും ഇന്ന് കുറഞ്ഞിട്ടുണ്ട്. ഇതെല്ലാം പരിഗണിച്ചാണ് കേരളത്തിലെ ജ്വല്ലറി വ്യാപാരികള്‍ വില കുറക്കുന്നത്.

വെടിനിര്‍ത്തലിന് പിന്നാലെ വില കുറഞ്ഞു
ഇസ്റാഈലും ഇറാനും തമ്മില്‍ വെടിനിര്‍ത്തലിന് ധാരണയായെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ പ്രഖ്യാപനമാണ് ഇപ്പോള്‍ വില കുറയാന്‍ കാരണമെന്ന് വിദഗ്ധര്‍ ചൂണ്ടിക്കാട്ടുന്നു. ഓഹരി വിപണിയിലും മുന്നേറ്റം പ്രകടമാണ്. ക്രൂഡ് ഓയില്‍ വിലയും കുറഞ്ഞിട്ടുണ്ട്. ഡോളര്‍ കരുത്ത് കുറഞ്ഞതോടൊപ്പം ഇന്ത്യന്‍ രൂപ കരുത്ത് വര്‍ധിപ്പിച്ചു. വെടിനിര്‍ത്തല്‍ നിലവില്‍ വന്നതായി ട്രംപ് പ്രഖ്യാപിച്ചെന്ന് അല്‍ ജസീറ റിപ്പോര്‍ട്ട് ചെയ്യുന്നു. ഇസ്റാഈല്‍ തുടക്കമിട്ട യുദ്ധത്തില്‍ പിന്നീട് അവര്‍ക്കൊപ്പം അമേരിക്കയും ചേര്‍ന്നിരുന്നു. എന്നാല്‍ അമേരിക്കയുടെ ഖത്തറിലെ സൈനികത്താവളത്തിന് നേരെ മിസൈല്‍ അയച്ച് ഇറാന്‍ കനത്ത മുന്നറിപ്പാണ് അമേരിക്കക്ക് നല്‍കിയത്. തുടര്‍ന്നാണ് വെടിനിര്‍ത്തല്‍ നിര്‍ദ്ദേശവുമായി പ്രസിഡന്റ് ട്രംപ് രംഗത്തെത്തിയത്.