അജ്‌മാൻ: അംബ നാട്യ കലാ ക്ഷേത്ര നേതൃത്വത്തിൽ പ്രമുഖ നൃത്താധ്യാപികയായ അംബ ശിവരാഗിന്റെ നൃത്ത സംവിധാനത്തിൽ അരങ്ങേറിയ 'മുദ്രാങ്കിതം' ആസ്വാദകർക്ക് അവിസ്മരണീയാനുഭവമായി. നാടകം, നൃത്തം, നങ്ങ്യാർകൂത്ത്, കഥകളി തുടങ്ങിയ കലകളെ സന്നിവേശിപ്പിച്ച് അംബ ശിവരാഗ് രൂപം കൊടുത്ത രസ-ലാസ്യ-താണ്ഡവ അവതരണ രീതിയിൽ അരങ്ങേറിയ രൗദ്ര ഭീമൻ എന്ന നൃത്ത നാടകമായിരുന്നു കാണികളെ ഏറെ ആകർഷിച്ചത്. ചൂതുകളി മുതൽ കൗരവ-പാണ്ഡവ യുദ്ധാവസാനം വരെയുള്ള മഹാഭാരത കഥ സാധാരണക്കാർക്ക് ആസ്വദിക്കാനാകും വിധമാണ് അവതരിപ്പിച്ചത്. രൗദ്ര ഭീമനായി റിതിക രതീഷും ദുര്യോധനനായി സോണിയ ദാസും പാഞ്ചാലിയായി ദേവാൻഷി അരുണും തികച്ച പ്രകടനം നടത്തി. 

പ്രമുഖ സംഗീതജ്ഞൻ പ്രണവം മധുവിന്റെ ഗാനാലാപനവും കൃഷ്ണ പ്രസാദിന്റെ ചെണ്ട വാദ്യവും ശ്യാം ചേർത്തലയുടെ വയലിൻ വാദനവും രാജേഷ് രാഘവന്റെ മൃദംഗ വായനയും ശ്രീജിത്ത്‌ ചെറുകുന്നിന്റെ മദ്ദള വായനയും ഹൃദ്യമായിരുന്നു. 

പല്ലവി പവിത്രൻ, മനു, എബിസൺ, സലാം, പവിത്രൻ, അരുൺ പാർത്ഥൻ, ചമയം നൗഷാദ്, ചന്ദ്ര പ്രതാപ്, രഘുറാം പൊതുവാൾ, സുജിത് മോഹൻ, രാജീവ് രവീന്ദ്രൻ, ആര്യക സുരേഷ്, ഹൃദ്യ, ഷൈജു പാത്രമംഗലം വിവിധ വേഷങ്ങൾ കൈകാര്യം ചെയ്തു. ചമയം തിയറ്റേഴ്സിലെ നാടക കലാകാരന്മാരുടെ സഹകരണത്തോടെയാണ് രൗദ്ര ഭീമന്റെ അവതരണം നടത്തിയത്. അജ്‌മാൻ ഇന്റർനാഷണൽ ഇന്ത്യൻ സ്കൂളിൽ നടന്ന പരിപാടി സംഗീതജ്ഞൻ പ്രണവം മധു ഉദ്‌ഘാടനം ചെയ്തു.

പ്രമുഖ മാധ്യമ പ്രവർത്തകരായ സാദിഖ് കാവിൽ, ടി.ജമാലുദ്ദീൻ, റോയ് റാഫേൽ, ശ്രീരാജ് കൈമൾ, രക്ഷാധികാരികളായ വിനീത റിതേഷ്, പവിത്രൻ തുടങ്ങിയവർ സംസാരിച്ചു. അംബ നാട്യ കലാക്ഷേത്രയിൽ അംബ ശിവരാഗിന്റെ കീഴിൽ വിവിധ നൃത്തരൂപങ്ങൾ അഭ്യസിച്ച കുട്ടികളുടെ അരങ്ങേറ്റവും അമ്മമാരുടെ നൃത്താവതരണവും ഇതോടൊപ്പം നടന്നു.

 
അജ്‌മാൻ ഇന്റർനാഷണൽ ഇന്ത്യൻ സ്കൂളിൽ അരങ്ങേറിയ 'മുദ്രാങ്കിതം' പരിപാടിയിൽ നിന്നും