മാമ്പഴക്കാലമായാല്‍ പിന്നെ അടുക്കളയില്‍ കറികള്‍ക്കും പഞ്ഞമുണ്ടാവില്ല. മാമ്പഴം കൊണ്ട് അത്രയധികം വറൈറ്റി സാധനങ്ങള്‍ മലയാളികളുടെ അടുക്കളയിലുണ്ടാവും. ഇന്നു നമുക്ക് മധുരമുള്ള മാമ്പഴക്കറി ഉണ്ടാക്കാം. 
നന്നായി പഴുത്ത നാട്ടുമാങ്ങയാണ് ഇതിന് നല്ലത്. ചെറിയ പുളിയോടു കൂടിയ ഈ മാമ്പഴത്തിനൊപ്പം തേങ്ങയും ശര്‍ക്കരയും ചേര്‍ത്ത് മാമ്പഴക്കറി തയ്യാറാക്കാം.

ചേരുവകള്‍

മാങ്ങ - 5
ശര്‍ക്കര- 2
തേങ്ങ ചിരകിയത് -2 കപ്പ്
ഏലയ്ക്ക -1 
മഞ്ഞള്‍പ്പൊടി -കാല്‍ ടീസ്പൂണ്‍
നെയ്യ് - 2 ടീസ്പൂണ്‍

കറിവേപ്പില -ആവശ്യത്തിന്
വറ്റല്‍മുളക് - 3
കടുക് -1 ടീസ്പൂണ്‍
വെളിച്ചെണ്ണ - ആവശ്യത്തിന്

തയ്യാറാക്കുന്ന വിധം

ഒരു ചട്ടിയില്‍ മാങ്ങ തൊലി കളഞ്ഞ് വൃത്തിയാക്കിയത് ഇടുക. കത്തികൊണ്ട് ചെറിയ വരകള്‍ ഇട്ട് മാറ്റി വയ്ക്കാം.  
ഇനി തേങ്ങയിലേയ്ക്ക് ശര്‍ക്കര പൊടിച്ചു ചേര്‍ത്തുവയ്ക്കുക. അതിലേക്ക് ഏലയ്ക്ക് പൊടിച്ചതും ചേര്‍ക്കാം. ഇതിലേയ്ക്ക് കുറച്ച് വെള്ളം ഒഴിച്ച് അടുപ്പത്ത് വയ്ക്കാം.

ALSO READ: ആരോഗ്യത്തോടെയുള്ള മുടി വളരാന്‍ ബയോട്ടിന്‍ അടങ്ങിയ ഭക്ഷണങ്ങള്‍ ശീലമാക്കൂ 

ശര്‍ക്കര നന്നായി അലിഞ്ഞ് വെള്ളം വറ്റി തുടങ്ങുമ്പോള്‍ മാമ്പഴം അതിലേയ്ക്കു ഇട്ടു കൊടുക്കുക. ഇതിലേക്ക് നെയ്യ് ഒഴിച്ചു കൊടുക്കാം. കറി കുറുകുമ്പോള്‍ തീ ഓഫ് ചെയ്യുക. വറവിടാനായി ഒരു പാനില്‍ വെളിച്ചെണ്ണ ഒഴിച്ചു ചൂടാക്കിയതിനു ശേഷം അതിലേയ്ക്ക് കടുക് ചേര്‍ത്തു പൊട്ടിക്കാം. വറ്റല്‍മുളക്, കറിവേപ്പില എന്നിവ ചേര്‍ത്തു വറുക്കാം. ഇത് കറിയിലേയ്ക്കു ചേര്‍ത്ത് ചൂടോടെ കഴിക്കാം. അടിപൊളി മാമ്പഴക്കറി റെഡി