തിരുവണ്ണാമലൈ: തമിഴ്‌നാട്ടിലെ തിരുവണ്ണാമലൈ ജില്ലയിലെ ശ്രീ രേണുഗാംബാൽ അമ്മൻ ക്ഷേത്രത്തിലെ സംഭാവനപ്പെട്ടിയിൽ നിന്ന് 4 കോടി രൂപ വിലമതിക്കുന്ന സ്വത്ത് രേഖകൾ കണ്ടെത്തി. ആരണിക്കടുത്തുള്ള കൊണയ്യൂർ ഗ്രാമത്തിൽ നിന്നുള്ള എസ്. വിജയൻ (65) എന്നയാളാണ് തന്റെ പെൺമക്കളുടെയും ഭാര്യയുടെയും അവഗണിച്ചതിന്റെ വേദനയിൽ, തന്റെ 10 സെന്റ് ഭൂമിയുടെയും ഒരു നില വീടിന്റെയും രേഖകൾ ക്ഷേത്രത്തിന് സംഭാവന ചെയ്തത്. ഇദ്ദേഹം റിട്ടേർഡ്  സൈനിക ഉദ്യോ​ഗസ്ഥനാണ്. 

ക്ഷേത്രത്തിലെ 11 സംഭാവനപ്പെട്ടികളിൽ ഒന്ന് പതിവ് പരിശോധനയ്ക്കായി തുറന്നപ്പോൾ, നാണയങ്ങളും കറൻസി നോട്ടുകളും കൂടാതെ, 3 കോടി രൂപയ്ക്കടുത്ത് വരുന്ന ഭൂമിയുടെയും 1 കോടി രൂപയോളം വിലയുള്ള വീടിന്റെയും ആധാരം കണ്ടെത്തിയതോടെയാണ് അധികൃതർ ഞെട്ടിയത്. രേഖകൾക്കൊപ്പം വിജയൻ എഴുതിയ ഒരു കൈപ്പട കുറിപ്പും ലഭിച്ചു, "എന്റെ ദൈനംദിന ആവശ്യങ്ങൾക്ക് പോലും മക്കൾ എന്നെ അപമാനിച്ചു. അതിനാൽ ഈ സ്വത്ത് ഞാൻ ക്ഷേത്രത്തിന് സമർപ്പിക്കുന്നു," എന്നായിരുന്നു അതിൽ.

ഭാര്യ കസ്തൂരിയുമായുള്ള ദീർഘകാല അഭിപ്രായവ്യത്യാസവും പെൺമക്കളിൽ നിന്നുള്ള അവഗണനയുമാണ് വിജയനെ ഈ തീരുമാനത്തിലേക്ക് നയിച്ചത് എന്ന് അന്വേഷണത്തിൽ വ്യക്തമായി. കഴിഞ്ഞ ഒരു ദശാബ്ദമായി ഭാര്യയിൽ നിന്ന് അകന്ന് ഒറ്റപ്പെട്ട് കഴിയുകയായിരുന്നു അദ്ദേഹം. സമീപ മാസങ്ങളിൽ, പെൺമക്കൾ തങ്ങളുടെ പേര്‍ക്ക് സ്വത്ത് കൈമാറാൻ നിർബന്ധിച്ചിരുന്നതായും റിപ്പോർട്ടുകൾ സൂചിപ്പിക്കുന്നു.

ഇതുപോലൊരു സംഭവം ക്ഷേത്ര ചരിത്രത്തിൽ ആദ്യമാണ്. എന്നാൽ, സംഭാവനപ്പെട്ടിയിൽ രേഖകൾ ഇടുന്നത് നിയമപരമായി സ്വത്ത് കൈമാറ്റം ചെയ്യപ്പെടുന്നതിന് പര്യാപ്തമല്ല. ഔദ്യോഗികമായി ക്ഷേത്ര വകുപ്പിൽ രജിസ്റ്റർ ചെയ്യണം," ക്ഷേത്ര എക്സിക്യൂട്ടീവ് ഓഫീസർ എം. സിലംബരശൻ ദി ഹിന്ദുവിനോട് പറഞ്ഞു. ഇതിന്റെ അടിസ്ഥാനത്തിൽ, വിജയൻ തന്റെ തീരുമാനത്തിൽ ഉറച്ചു നിൽക്കുകയാണെന്നും സ്വത്ത് ഔദ്യോഗികമായി രജിസ്റ്റർ ചെയ്യുമെന്നും വ്യക്തമാക്കി. "എന്റെ മനസ്സിന് സമാധാനം തേടിയാണ് ഞാൻ ഈ വഴിപാട് നടത്തിയത്. തിരുപ്പതി ക്ഷേത്രത്തിന് മറ്റൊരു സ്വത്ത് ദാനം ചെയ്യാനും ഞാൻ ആലോചിക്കുന്നു," അദ്ദേഹം കൂട്ടിച്ചേർത്തു.

എന്നാൽ, വിജയന്റെ മൂത്ത മകൾ സുബ്ബുലക്ഷ്മി സംഭാവനയെ എതിർത്ത് രംഗത്തെത്തി. "ഈ സ്വത്ത് കുടുംബം ഒന്നിച്ച് സമ്പാദിച്ചതാണ്. അതിന്റെ രേഖകൾ ദാനം ചെയ്യുമ്പോൾ എന്റെ പിതാവ് മാനസികമായി അസ്വസ്ഥനായിരുന്നു," എന്നാണ് അവർ ആരോപിക്കുന്നത്. സ്വത്ത് തിരികെ ലഭിക്കാൻ കുടുംബം കോടതിയെ സമീപിച്ച് ഹരജി സമർപ്പിച്ചിട്ടുണ്ട്. 

എച്ച്ആർ & സിഇ അസിസ്റ്റന്റ് കമ്മീഷണർ ഷൺമുഖം സുന്ദരത്തിന്റെ മേൽനോട്ടത്തിൽ ചൊവ്വാഴ്ച നടന്ന പരിശോധനയിലാണ് ഈ രേഖകൾ കണ്ടെത്തിയത്. "നിയമപരമായി രജിസ്റ്റർ ചെയ്താൽ മാത്രമേ ക്ഷേത്രത്തിന് സ്വത്ത് സ്വീകരിക്കാനാകൂ. സംഭാവന വഴിയുള്ള രേഖകൾ തിരികെ നൽകാനാവില്ല," എച്ച്ആർ & സിഇ വകുപ്പ് വ്യക്തമാക്കി.