ഉത്തർപ്രദേശിലെ ബഹ്റായിച്ചിൽ ഐഫോൺ മോഷ്ടിക്കുന്നതിനായി പ്രായപൂർത്തിയാകാത്ത രണ്ട് ആൺകുട്ടികൾ ചേർന്ന് 19 വയസുകാരനെ ക്രൂരമായി കൊലപ്പെടുത്തി. സംഭവത്തിൽ 14, 16 വയസുള്ള രണ്ട് പ്രതികളെ പൊലിസ് കസ്റ്റഡിയിലെടുത്തു. ഉയർന്ന നിലവാരമുള്ള റീലുകൾ ചിത്രീകരിച്ച് സമൂഹമാധ്യമങ്ങളിൽ കൂടുതൽ ലൈക്കുകൾ നേടാനാണ് കുട്ടികൾ ഐ ഫോൺ മോഷണത്തിനും, കൊലപാതകത്തിനും മുതിർന്നതെന്നും പൊലിസ് വെളിപ്പെടുത്തി.

ബെംഗളൂരു സ്വദേശിയായ ഷദാബ് (19) ആണ് കൊല്ലപ്പെട്ടത്. അമ്മാവന്റെ വിവാഹത്തിൽ പങ്കെടുക്കാൻ ബഹ്റായിച്ചിലെ നാഗൗർ ഗ്രാമത്തിലെത്തിയതായിരുന്നു ഷദാബ്. 

അഡീഷണൽ പൊലിസ് സൂപ്രണ്ട് രാമാനന്ദ് പ്രസാദ് കുശ്‌വാഹയുടെ അഭിപ്രായത്തിൽ, ജൂൺ 20-ന് രാത്രിയാണ് കൊലപാതകം നടന്നത്. തുടർന്ന്, ജൂൺ 21-ന് ഷദാബിനെ കാണാതായതായി പരാതി ലഭിച്ചതിനെ തുടർന്ന് നടത്തിയ തിരച്ചിലിൽ, ഗ്രാമത്തിന് പുറത്തെ ഒരു പേരക്കത്തോട്ടത്തിന് സമീപമുള്ള പൊട്ടിപ്പൊളിഞ്ഞ കുഴൽക്കിണറിനടുത്ത് നിന്ന് മൃതദേഹം കണ്ടെടുത്തു. ഷദാബിന്റെ മൃതദേഹം കഴുത്തറുത്ത നിലയിലായിരുന്നു. തലയിൽ ഇഷ്ടിക കൊണ്ട് അടിച്ച പാടുകളുമുണ്ടായിരുന്നുവെന്ന് പൊലിസ് വ്യക്തമാക്കി.

ALSO READ: ടെമ്പോയുടെ മുൻ സീറ്റിൽ ആര് ഇരിക്കുമെന്നതിനെച്ചൊല്ലി തർക്കം; മകൻ പിതാവിനെ വെടിവെച്ച് കൊന്നു

അന്വേഷണത്തിനൊടുവിൽ, ശനിയാഴ്ച രണ്ട് പ്രതികളെയും അവരുടെ കുടുംബാംഗങ്ങളിൽ രണ്ട് പേരെയും പൊലിസ് അറസ്റ്റ് ചെയ്തു. ഐഫോൺ മോഷ്ടിക്കാൻ ലക്ഷ്യമിട്ടാണ് കൊലപാതകം നടത്തിയതെന്ന് പ്രതികൾ സമ്മതിച്ചു. നാല് ദിവസം മുമ്പുതന്നെ ഇവർ കൊലപാതകം ആസൂത്രണം ചെയ്തിരുന്നു. സംഭവദിനത്തിൽ, റീലുകൾ ചിത്രീകരിക്കാനെന്ന വ്യാജേന ഷദാബിനെ ഗ്രാമത്തിന് പുറത്തുള്ള ഒഴിഞ്ഞ സ്ഥലത്തേക്ക് കൂട്ടിക്കൊണ്ടുപോയി. അവിടെവെച്ച് ഷദാബിനെ ആക്രമിച്ച് കൊലപ്പെടുത്തി.

കൊലപാതകത്തിന് ഉപയോഗിച്ച കത്തിയും ഇഷ്ടികയും ഷദാബിന്റെ ഐഫോണും പൊലിസ് കണ്ടെടുത്തു. ഭാരതീയ ന്യായ സംഹിത (ബിഎൻഎസ്) സെക്ഷൻ 103(1) (കൊലപാതകം), 238 (തെളിവുകൾ മറച്ചുവെക്കൽ) എന്നീ വകുപ്പുകൾ പ്രകാരം പ്രതികൾക്കും അവരുടെ കുടുംബാംഗങ്ങൾക്കുമെതിരെ കേസ് രജിസ്റ്റർ ചെയ്തു. മൃതദേഹം കണ്ടെത്തിയതിനുശേഷം പ്രതികളും കുടുംബാംഗങ്ങളും ഒളിവിൽ പോയിരുന്നെങ്കിലും, വ്യാഴാഴ്ച പൊലിസ് ഇവരെ കണ്ടെത്തി. പ്രായപൂർത്തിയാകാത്ത പ്രതികളെ ഗോണ്ടയിലെ ജുവനൈൽ റിഫോം ഹോമിലേക്ക് അയച്ചതായി പൊലിസ് അറിയിച്ചു.

In Bahraich, Uttar Pradesh, two minors were arrested for the murder of a 19-year-old over an iPhone theft. The boys, aged 14 and 16, allegedly killed the victim to capture high-quality reels and gain more social media likes. The police revealed the motive behind the heinous crime.