കണ്ണൂർ: സംസ്ഥാനത്തിന്റെ സാമ്പത്തികസ്ഥിതി ഭദ്രമല്ലെന്ന് മുഖ്യമന്ത്രി പിണറായി വിജയൻ. പിണറായിയിൽ പൊലീസ് സ്റ്റേഷന് പുതുതായി നിർമിക്കുന്ന കെട്ടിടത്തിന്റെ ശിലാസ്ഥാപന ചടങ്ങിൽ സംസാരിക്കുകയായിരുന്നു അദ്ദേഹം. സാമ്പത്തിക പ്രതിസന്ധി മൂലം നിരവധി വികസന പ്രവർത്തനങ്ങൾ നിശ്ചിത സമയത്ത് പൂർത്തിയാക്കാൻ കഴിയാതെ വൈകുന്നുണ്ടെന്നും അദ്ദേഹം വ്യക്തമാക്കി.

“സാമ്പത്തികസ്ഥിതി ദുർബലമായതിനാൽ പല പദ്ധതികളും വൈകുന്നു. കണ്ണൂർ ജില്ലയിലെ പല പൊലീസ് സ്റ്റേഷനുകളും വാടക കെട്ടിടങ്ങളിലാണ് പ്രവർത്തിക്കുന്നത്. എല്ലാ പദ്ധതികളും സമയബന്ധിതമായി പൂർത്തിയാക്കണമെന്നാണ് സർക്കാരിന്റെ ആഗ്രഹം,” മുഖ്യമന്ത്രി പറഞ്ഞു.

കേരള പൊലീസിനെ മറ്റു സംസ്ഥാനങ്ങളിലെ പൊലീസ് സേനകളുമായി താരതമ്യം ചെയ്യുമ്പോൾ അഴിമതി താരതമ്യേന കുറവാണെന്ന് അദ്ദേഹം അവകാശപ്പെട്ടു. എന്നാൽ, “കേരള പൊലീസിനുള്ളിൽ ചില പുഴുക്കുത്തുകൾ ഉണ്ട്. അത്തരക്കാരെ കണ്ടെത്തി ഒഴിവാക്കാൻ ശുദ്ധീകരണ പ്രവർത്തനങ്ങൾ നടക്കുന്നു,” മുഖ്യമന്ത്രി വ്യക്തമാക്കി.

ALSO READ: ആദ്യം ചികിത്സ വേണ്ടത് ആരോഗ്യവകുപ്പിന്: സർക്കാരിന്റെ പി.ആർ. പ്രചാരണം പൊള്ളയെന്ന് പ്രതിപക്ഷ നേതാവ്

കേരള പൊലീസിന്റെ സൈബർ സെൽ രാജ്യത്തിന് തന്നെ മാതൃകയാണെന്ന് അദ്ദേഹം അഭിപ്രായപ്പെട്ടു. “സൈബർ സെല്ലിന്റെ മികവ് രാജ്യവ്യാപകമായി അംഗീകരിക്കപ്പെട്ടിട്ടുണ്ട്. വർഗീയ സംഘടനകൾക്ക് കേരളത്തിൽ മറ്റു സംസ്ഥാനങ്ങളിലേതുപോലെ അഴിഞ്ഞാടാൻ കഴിയാത്തത് പൊലീസിന്റെ കൃത്യമായ ഇടപെടൽ മൂലമാണ്. ഇതാണ് കേരളത്തിൽ വർഗീയ സംഘർഷങ്ങൾ ഒഴിവാകാൻ കാരണം,” മുഖ്യമന്ത്രി കൂട്ടിച്ചേർത്തു.

Kerala Chief Minister Pinarayi Vijayan acknowledged the state's fragile financial situation, causing delays in development projects, including police station constructions. Speaking at the foundation stone-laying ceremony for a new police station in Pinarayi, he noted that while Kerala Police has less corruption compared to other states, it still has some "rotten elements" that are being identified and removed through ongoing reforms. He praised the state's cyber cell as a national model and credited police interventions for preventing communal tensions.