മുംബൈ: ഉച്ചഭാഷണികള്‍ നീക്കംചെയ്തതോടെ വിശ്വാസികളിലേക്ക് ബാങ്ക് വിളിയുടെ സന്ദേശം എത്താനായി പ്രത്യേക മൊബൈല്‍ ആപ്പ് വികസിപ്പിച്ച് മുംബൈയിലെ പള്ളികള്‍. തമിഴ്‌നാട് ആസ്ഥാനമായ കമ്പനി വികസിപ്പിച്ചെടുത്ത സൗജന്യ ആപ്പ് രജിസ്റ്റര്‍ ചെയ്ത പള്ളികളില്‍ നിന്നുള്ള തത്സമയ ബാങ്കിന്റെ ഓഡിയോ സ്ട്രീം ചെയ്യും. പൊലിസ് മുന്നറിയിപ്പുകളും ശിക്ഷാ നടപടികളും ഒഴിവാക്കാനും പള്ളിയിലെ ഉച്ചഭാഷണികള്‍ താല്‍ക്കാലികമായി നീക്കംചെയ്തതിനാലുമാണ് ആപ്പുകള്‍ വികസിപ്പിക്കുന്നതിനെക്കുറിച്ച് ആലോചിച്ചതെന്ന് മാഹിം ജുമാ മസ്ജിദ് മാനേജിങ് ട്രസ്റ്റി ഫഹദ് ഖലീല്‍ പത്താന്‍ പറഞ്ഞു.

ബാങ്ക് കേള്‍ക്കാന്‍ താല്‍പ്പര്യമുള്ള ആര്‍ക്കും ആപ്പ് ഡൗണ്‍ലോഡ് ചെയ്യാം. അവരുടെ പ്രദേശവും ഇഷ്ടപ്പെട്ട പള്ളിയും തിരഞ്ഞെടുക്കുന്നതോടെ തത്സമയ ബാങ്ക് വിളി ആസ്വദിക്കാവുന്നതാണെന്നും അദ്ദേഹം അറിയിച്ചു. മാഹിം ജുമാ മസ്ജിദിന് സമീപമുള്ള ആയിരത്തിലധികം പേര്‍ ഇതിനകം ആപ്പ് ഡൗണ്‍ലോഡ് ചെയ്തിട്ടുണ്ട്. കഴിഞ്ഞ മൂന്ന് വര്‍ഷത്തിനിടെ തമിഴ്‌നാട്ടിലെ 250 ഓളം പള്ളികള്‍ ബാങ്ക് വിളി ഓണ്‍ലൈന്‍ സംവിധാനത്തിലേക്ക് മാറിയതായി ആപ്പ് സഹസ്ഥാപകനായ മുഹമ്മദ് അലി പറഞ്ഞു. OnlineAzan എന്ന് തന്നെയാണ് ആപ്പിന്റെ പേര്.

ശബ്ദമലിനീകരണ നിയന്ത്രണങ്ങള്‍ പാലിക്കുന്നതിനെച്ചൊല്ലി മാസങ്ങള്‍ നീണ്ട തര്‍ക്കത്തിനൊടുവില്‍ മുംബൈയിലെ എട്ട് പള്ളികളില്‍ നിന്ന് കഴിഞ്ഞദിവസം പോലിസ് ഉച്ചഭാഷിണികള്‍ നീക്കം ചെയ്തിരുന്നു. യാതൊരു മുന്നറിയിപ്പുകള്‍ നല്‍കുകയോ ശബ്ദ പരിശോധനകള്‍ നടത്തുകയോ ചെയ്യാതെയാണ് പോലീസ് അവ നീക്കിയതെന്ന് നാട്ടുകാര്‍ പരാതിപ്പെട്ടതായി സിയാസറ്റ് ന്യൂസ് റിപ്പോര്‍ട്ട്‌ചെയ്തു.

ബോംബെ ഹൈക്കോടതി നിശ്ചയിച്ച പരമാവധി 45 - 56 ഡെസിബെല്‍ എന്ന പരിധിക്ക് അനുസൃതമായി ഉച്ചഭാഷിണികള്‍ ഉണ്ടായിരുന്നെങ്കിലും യാതൊരു പരിശോധനയോ അറിയിപ്പോ കൂടാതെയാണ് അവ നീക്കം ചെയ്തതെന്ന് പള്ളി കമ്മിറ്റി ഭാരവാഹികള്‍ ചൂണ്ടിക്കാട്ടി. 

ധൃതിപിടിച്ചുള്ള പോലീസ് നടപടിയുടെ വീഡിയോകള്‍ സോഷ്യല്‍മീഡിയയിലൂടെ പ്രചരിക്കുന്നുണ്ട്. ഉദ്യോഗസ്ഥര്‍ മോശമായി പെരുമാറുന്നതും മുസ്ലിംകളെ വഴിയില്‍ നിന്നതിന് ഭീഷണിപ്പെടുത്തുന്നതും വിഡിയോയില്‍ കാണാം.

ഉച്ചഭാഷിണികളുടെ ഉപയോഗം ഒരു മതത്തിന്റെയും അനിവാര്യ ഭാഗമല്ലെന്ന് ചൂണ്ടിക്കാട്ടി ഈ വര്‍ഷം ജനുവരി 23 ന് ബോംബെ ഹൈക്കോടതി ഉത്തരവ് പുറപ്പെടുവിക്കുകയും, ശബ്ദമലിനീകരണ ചട്ടങ്ങള്‍ പാലിക്കുന്നുണ്ടെന്ന് ഉറപ്പാക്കാന്‍ മഹാരാഷ്ട്ര പോലീസിനോട് നിര്‍ദ്ദേശിക്കുകയും ചെയ്തിരുന്നു.

ഹൈക്കോടതി ഉത്തരവിന് ശേഷം മെയ് 11 ന് മുംബൈ പോലീസ് എല്ലാ മതസ്ഥലങ്ങളിലും ഉച്ചഭാഷിണികള്‍ ഉപേക്ഷിക്കാന്‍ നിര്‍ദ്ദേശിച്ച് സര്‍ക്കുലര്‍ ഇറക്കി. ഇതിനിടെയാണ് പൊലിസ് നടപടിയുണ്ടായത്.

അതേസമയം, ഇപ്പോള്‍ മുംബൈ മതകേന്ദ്രങ്ങളിലെ ഉച്ചഭാഷിണികളില്‍ നിന്ന് മുക്തമായെന്നും ശബ്ദമലിനീകരണം കുറഞ്ഞെന്നും പോലീസ് കമ്മീഷണര്‍ ദേവന്‍ ഭാരതി പറഞ്ഞു. 1,500ലധികം സ്ഥാപനങ്ങളില്‍ നിന്ന് ഉച്ചഭാഷിണികള്‍ നീക്കം ചെയ്യണമെന്നാവശ്യപ്പെട്ട് സമൂഹത്തെയും രാഷ്ട്രീയ നേതാക്കളെയും മത ട്രസ്റ്റികളെയും ബോധ്യപ്പെടുത്താന്‍ യോഗങ്ങളും ചര്‍ച്ചകളും സഹായിച്ചതായും ഇത് നഗരത്തെ 'ഉച്ചഭാഷിണി രഹിത'മാക്കിയതായും പോലീസ് അവകാശപ്പെട്ടു.

In the backdrop of curbs over the use of loudspeakers, some mosques in Mumbai have registered on a dedicated mobile phone application which relays the 'azan', or call to prayer, directly to the muslims in real-time